L’Angolo de la Wanda – Ottobre bis 1999 – “Dai, ridi che te fa ben”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Dai, ridi che te fa ben

“Barzeleta”, I’è ‘na parola in uso za nel XVI sèc. Certi vocabolari i la fa derivar da “bargella” (donafurba e sfaciata), ma el me vecio, strassà dissionario “Novissimo Melzi” (fine Otosento) za el la definisse: “facezia o racconto spiritoso”.

Quando, in ocasion de nosse, conpleani, batesi ecc… se se cata ‘torno a la tòla, gonbio a gonbio con gente che no se conosse e co’ la qual, de conseguensa, no’ se sa come inviar la conversassion, par rònpar el generaI silensio, basta che uno el conta ‘na barzeleta che subito tuti i taca a contar la sua; se ànima la conpagnia e in quatro e quatr’oto se deventa tuti amiçi! Eco alora che se capisse l’inportansa, a livel mondial, de sta “arte”, probabilmente vecia come el mondo.
L’umorista Achille Campanile, nel so “Trattato delle barzellette” (1961), l’à scrito però che de nòve praticamente no ghe ne esiste. Al màssimo i è rimodernade. L’è un fato che, dopo averghene scoltà una, tuti i la riporta a la so maniera tanto da risultar ogni òlta nòva parfin a la fonte da ‘ndò l’è partì, specie se ci la ricicla l’è uno che “le sa contar”, ‘na persona de spìrito, insoma! A’ sto propòsito, Andrè Maurois (1885-1967) el dise che “‘na persona de spìrito l’è ci, avendoghe bona memoria, el g’à la fortuna de intivar gente che no’ ghe n’à”.
Personalmente, penso che par rèndarse antipàtici al pròssimo no’ ghe sia gnente de mèjo de dirghe, con un soriseto de suficiensa, a ci ne conta “l’ùltima”: “La sò”, l’è vecia come l’Arena!” Partanto, l’è bona educassion far finta de no’ saverla e po’, se ci la conta l’è un “papàvaro” del qual se poI ‘verghe un diman de bisogno, sforsarse a sganassar da sbregarse la boca, pura se la storia ormai la sta-sù co’ le fèrle (stanpele), tanto che a contàrnela l’è stà, ai tenpi de Marco Cuco, nostro nono. Barzeleta… che bela invension! Pensè, arniçi, che gh’è al mondo ci ghe n’à fato colession, come i giornalisti francesi Mina e Andrè Guillois che ai so tenpi i ghe n’à rancurà più de 200.000, stanpàndoghene po’ domila nel volume “El scaciapensieri” (1970).
La bibliogràfia esistente su sta materia, l’è grandissima e la porta nomi famosi come: Tony Martucci (Mursia 1974), E. Bertarelli (Hoepli 1936), G. Guasta (Omnia 1964), fin ai più recenti come el nostro inparegiàbile Dino Durante, Gino Bramieri, Giobbe Covatta, Forattini, lacovitti, Marcello Marchesi, ecc… La barzeleta, la bòta de spirito, la cosideta “facezia”, l’à lassà peste fonde ne la storia. Le più famose del 1500 i è quele che Giulio Cesare Croce (1550-1609) el g’à messo in boca a Bertoldo, ma prima ancora a scrìvar celebri “facezie” se g’avea messo el Boccaccio (1313-1375) semenàndole qua e là nel so Decamerone (el titolo el voI dir, in greco, Diese giornade).
Ma, fasendo un passo longo, parlemo adesso de l’umorismo moderno; quel che ne riva, non più da i tàoli de ostarìa, tra un goto e l’altro, ma a “bonba”, diretamente in casa, grassie ai mèsi de comunicassion (ùltimo “pòsso”, Internet). Questo, oviamente, da quando i comici i g’à ‘vù a disposission l’audio che l’à mandà in càneva la mìmica de i vari Ridolini, Charlot, ecc…
Tra i “barzeletieri” del cine e del teatro, non più muto, son del parer che in prima fila g’abia da starghe el grande Petrolini; quel de i salamini, par intèndarse. Po’, la copia Olio e Stanlio, el grande Macario e l’altretanto grande me concitadin, Walter Chiari.
Recentemente de boni còmici se ghe n’à incontrà pocheti, specie a la TV. El fato l’è che uno no’l se pòl inprovisar umorista. Ciapemo par esenpio Pippo Baudo ne la trasmission “la canson del secolo” (canal 5, 5 marso 1999). Ne la so “performance” a fianco de la Parietti, più che da rìdar l’à fato da pianzar. Idem par el spìrito de patata de la Alba del qual se n’ à incorto però solo le done (i òmeni no’ i g’à fato caso, ocupadi a vardarghe la scoladura a schermo panoràmico e co’ i oci a cuciarin ne la speransa che ghe ne scapasse fora una).
Ma tornando a le barzelete (le mèio i è quele che i ne conta i nostri parlamentari), i argomenti i è i più svariadi anca se generalmente se casca su: politica, sesso, carabinieri, quele “de grasso” che ghe piase tanto ai butini, i dotori, le suòcere, le bestie, el sport, i mati e via cusì. Tante barzelete i è riciclàbili, come a dir che se pòl tacàrghele, de òlta in òlta, de ano in ano, a le più svariade situassioni e personagi, a questo o a quel’omo polìtico. Celebri quele sul Duce che ancò i è tornà in sèna col novo “look” a l’indirisso de quei che da Montecitorio i tira le rèdene de noialtri… eterni mussi. Generalmente a contar barzelete se gode de più ci le dise che non ci le scolta. La desperassion l’è quando nò se se ricorda più come la finisse e se resta lì come i macachi.
Beh… vedemo de far, in còa a ‘sta ciaciarada, qualche esenpio, tegnendo presente che le barzelete mèjo i è quele che no’ se poI scrìvar su ‘na rivista seria come Q.C.

I MATI: “EI diretor del manicomio el ghe dimanda a un mato: “Ci sito? Son el Papa. E ci te l’à dito. Dio”. In quel mentre passa uno co’ ‘na bela barbona che’l siga da inrabià: “QueI lì el ghe conta bale parché mi gnanca el conosso”!

I DOTORI: “EI primario passando dal reparto el ghe dimanda a l’infermier: “Gh’èto dà l’ossìgeno al ’24′”? “Sì”! “E come vala? L’è deventà biondo”.

I CARABINIERI: Savìo parché i “caranba” prima de dormir i sbate la testa su la testiera del leto? Par andar in leto co’… ‘na bela “gnoca” (butèla).

RELIGIOSE: ‘Na coriera piena de done in gita par l’8 de marso, la casca in t’un buron e le more tute. ‘Pena rivà sù… San Piero el le schiera e par far prima el ghe dise: tute quele che g’à tradì el mari… le fassa un passo avanti. Tute le fa un passo avanti e Piero, incassà come ‘na bissa, el ghe òrdina: “A l’inferno”! Po’ el se incòrse che una no’ la s’avea mosso. A ‘sto punto se aviçina nostro Signor e el ghe dise in te na recia: “E de la sorda, cosa ghe ne femo”?

E ‘desso ve saludo, a la Mike Bongiorno: ” Alegrìa”! ! ! Ridemo, che a rìdar se canpa de più!

Wanda Girardi Castellani