L’Angolo de la Wanda – Settembre bis 1999 – “TORNAR A LA FONTANA DEL FERO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“TORNAR A LA FONTANA DEL FERO”

Noialtri veronesi se usava andarghe, in brìgola, verso la fine de giugno, ne la note de San Giovanni Batista e ‘sta tradission la g’a radise ne le feste medioevali in onor del Santo; un missioto de cristianesimo e antiche feste pagane.
L’èra almanco çinquant’ani che no’ passavo de là, anca parché el posto, da tenpo in ‘bandono, el g’avéa fama d’èssar assè mal frequentado. Inoltre, tuto l’anèl colinare, pedonale, che, colegà ai caminamenti militari interni el menava da quele parte, l’èra deventà ‘na spece de foresta vergine, inpraticabile oltre che ris-ciosa. Epura nei ani trenta andar a la Fontana del Fero l’èra quasi un rito; la gita de la dominica da alternar a quela al “boscheto”, overo la spiagia dei pitòchi a porto San Pancrazio dove l’Adese, finalmente sensa àlsari, el sbrissiava-via corendo in “sata” (come el dise el poeta Da Re) basando stradèle bianche de giara e spaliere de’n verde tanto slusente da parer incerà.
A la Fontana del Fero, ne la bona stajón, se ghe andava anca in gita, de prima matina, armà de bosse e fiaschi, che, dopo aver beù tuto quel che se podeva béar, se inpeniva, par poder, ‘na volta a casa, proseguìr la cura che i nostri veci i assicurava miracolosa par tuti i mali, buganse conprese. Alora valèa la pena de scarpinar su par la stradeta quasi vertical che da la bela cesa de San Giovani in Vale la porta al spiasso de la fontana. L’aqua, purissima, l’èra fresca come ‘na rosa de magio e quel gustìn da fero el te faséa convinto che te te stavi propio dando ‘na resentà de bona salute. Dopo la prima rassion de aqua, la mama la tirava fóra da la sporta pan, salame o bóndola, fruti e fogassa e, sentà in tera o su quei sassi giali fodrà de conchiglie fossili, se tacava a rosegar de gusto. Tra le altre proprietà curative, la Fontana del Fero, la servìva par far andàr via i orsói. Bastava incolàr l’ocio malà su la bóca de’na bossa de ‘sta aqua recitando “orsól, orsól, va drento in te’l bossól” che in quatro e quatr’oto l’ocio l’èra sanà!
La tradission de la festa a la Fontana del Fero l’è vecia ci-sa mai quanto. Pàr che la vegna da un rito pagan in onor dele divinità dei canpi. Quanto a le só aque, po’, formade milioni de ani fa, le nasse, a l’interno de ‘na longa galeria, larga circa un metro e alta dú, dale ròce marnose del Priaboniano superior. ‘Rènte a la fontana, gh’è pura ‘na bela grota, scavà forsi ne l’età romana. Lì i conta che Pipino, re d’Italia, secondogenito de Carlo Magno, l’usasse sentarse a ciaciarar co’ la só corte, tra ‘na beùda e l’altra diretamente a la sorgente, fin che le guardie del seguito le se comodava su ‘na bancheta esterna scavà ne la rocia a la base dela falesia.
La sagra de San Giovani, fin ai ani vinti, subito dopo la prima guera mondial, la portava su la colina gente da la çità e la provincia e tuto intorno l’èra un fiorìr de canti, bàli, balonçini venessiani e vendidori de “tochi duri” (deti anca pearini).
El poeta Antonio Pasini, nel çinqueçento l’à scrito su la fontana un poemeto in latinorun. Anca Francesco Corna el n’à lassà ‘na bela testimoniansa poetico-storica: “E poco lonzi (de Castel san Piero) nasse ‘na Fontana / fóra de’n sasso dentro da la tera / la qual se ciama Fontana de Fero”.
La storia scrita la ne informa po’ che ‘sta aqua feruginosa l’è stà’ incanalada nel 1459 fin a la cisterna par servir ai bisogni del rión mentre ‘n’altra tubassion la le portava fin al convento de le Clarisse.
Ancò purtropo un cartel tacà a la fontana l’avisa che l’aqua no’ l’è più potabile. L’è sempre fresca ma la pól servir solo par darse ‘na spiansada quando che, dopo la salita quasi in vertical, se riva strachi e sudà.
Ai bei tenpi, tornando a casa, oltre a le bosse de aqua se podeva far provista anca de brocoleti; brocoleti con çerte fiore che raramente se pol catar dai frutarói. Par le strade e i vicoli de Verona, però, evitandoghe la fadigosa gita ai più veci e ai pelandroni, girava la “Lussia”; ‘na veciota che co’ ‘na cantilena da farghe invidia ai marcà de Napoli, la sigava a tuto buso: “brocoleti bei de la fontana de ferooooooo!” Dopo la stajón dei brocoleti la Lussia, canbià merce, la canbiava anca el disco: “Séole, salata e ravanèi, ‘na sesta par çinque schei!” .
“L’aqua de la Fontana / ve fa deventar mate / e i basi de ‘sta note / i è quei che g’à più sal…” scriveva Berto Barbarani, atribuendoghe a ‘sta aqua parfìn virtù erotiche. Un altro poeta; Atilio Turco, deto “Turcaine”, parón de ‘na ostaria, l’à a so volta cantà le tante virtù de la Fontana dàndoghe nóvo fià a la festa del 24 giugno, ospitando sul spiasso del so anbiente, de fianco a quel de la Fontana, bali e canti: “… gh’è l’antica fontana del fero / ci ghe ne beve se inbalsama el cor / le passioni d’amor là le se nega / là sparisse qualunque dolor!”.
Ultimamente l’ADA (ass. difesa de l’anbiente) dopo aver rimesso in sèsto fontana e dintorni, netà i sentieri e curà la bela flora, originariamente siora come un orto botanico, l’à fato rinàssar la festa del solstissio de istà organisando par la domìnica 27 giugno ‘na bela festa con tanto de balarine, banda musical e rinfresco par tuti.
Presenti, oltre a inportanti relatori, el nostro bel Sindaco Michela Sironi, un pàr de assessori del Comune e ‘na rapresentansa del Vescovo. Un aplauso al sign. Salvatore Cocozza, Presidente de l’ADA e ai so brài colaboradori, par averghe restituì a Verona uno tra i so più bei e romantici siti e a la memoria de noialtri dei “anta”, momenti de gioia spensierà, ligà a le verdi stajoni de la vita.

Wanda Girardi Castellani