L’Angolo de la Wanda – Luglio 1999 – “I eredi de Umberto Boccioni”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“I eredi de Umberto Boccioni”

Penso che se sia in pochi a saver che i ultimi parenti del papà del futurismo italiàn; Umberto Boccioni, i vive a Padova.
Licia Boccioni Dal Pian e so marì, Giuseppe Dal Pian; do splendide persone che g’ò avù l’onor de conòssar, propio a Padova, grassie al Maestro Luciano Pollini, i è, oltre che i eredi, anca e soprattutto i custodi dei cimeli del grande artista, morto, staffà da ‘n caval, a Sorte de Chievo (VR) dove che’l faséa el militar, el 16-8-1916.
Se pól dir che se no’ ghe fusse stà’ Boccioni no’ ghe sarìa stà’ el futurismo, cusì, se no ghe fusse stà’ i sposi Boccioni-Dal Pian che i à speso la vita nel’ativo ricordo del celebre parente, el futurismo el sarìa ancora pressoché sconossudo.
De Boccioni e del so soprendente e discusso movimento artistico ò parlà su Quatro Ciacoe nel n°3 del 1986, informando pura i nostri letori che da Verona el “nostro” no’ l’era più andà via; sepelì ‘rènte a so mama nel nostro çimitero, déto: “albergo ai dú leoni”!
‘Péna nato, Umberto, i l’avéa portado a star a Morciano de Romagna dove che’l papà l’era stà’ trasferì da Reggio Calabria par ocupar la carica de ussier dela Prefetura.
Cusì, el bel çentro romagnolo l’è sempre stà’ orgolioso del celebre concitadin, tanto che zà nel 1982, par ricordarlo in maniera tangibile, i g’avéa comissionà a un altro grande artista morcianese; Arnaldo Pomodoro, ‘na belissima scultura dal titolo “Colpo d’ala”.
Po’, el 30 magio scorso, el Comune in colaborassion con “l’Associassion Morciano cità d’arte” l’à organisà la “Futurfesta” inaugurando ‘na inportante opara d’arte; ‘na fontana in bronso sul model del “svilupo de ‘na botilia nel spassio”; una dele più note sculture de Boccioni, realisà nel 1912. L’originale in gesso, de proprietà dela faméia Marinetti, l’èra stà crompà nel 1952 dal museo de l’Università de San Paolo, in Brasìl.
De ‘sta scultura, nel 1931, Luigi Ciampaglia par la Galeria Chiaruzzi, el ghe n’avea realisà do fusioni, una in bronso lucido, ‘dèsso a la Galeria Civica de Milan e l’altra in metal bianco, crompà nel 1947 dal Museo de Arte Moderna de New York.
Par l’inaugurassion de la fontana tuta la citadina s’à vestì “futurista”. Le vetrine le à fato gara con picoli e grandi capolaóri ispiradi a Boccioni, cusì par i foghi artificiai e la sfilada de paruche, anca quele rigorosamente futuriste. Idem par le poesie, i baleti, le musiche dal titolo “Suite par telegrafo mecanico” ecc… Se g’à messo parfin le scole materne laorando sul tema: “el futuro del futurismo”, insoma, l’è stà ‘na gran festa e un’esperiensa memorabile!
I signori Boccioni Dal Pian, scortadi da un altro inamorà de l’arte boccioniana; el Maestro Luciano Pollini e da la so bela e elegante signora, Luisa, i à taià l’inmancabile nastro tra l’entusiasmo dei morcianesi e dei tanti ospiti vegnù da fóra.
El Deus ex machina de tuto questo l’è stà’ el giornalista Fiorenzo Mancini, apassionado studioso de cronache morcianesi al quàl va el nostro sincero plauso.

Wanda Girardi Castellani