L’Angolo de la Wanda – Giugno ter 1999 – “Tra “Castelane” e “Spadarini””
…a cura di Graziano M. Cobelli
gcobelli05@gmail.com
Quatro Ciàcoe: da Verona
“Tra “Castelane” e “Spadarini””
Malgrado le brute previsioni dei vari “Barnaca” radio e Tv, a incapelar el cortil d’onor del castel de Soave, pien come un ovo za da le prime ore del dopodisnar, domìnica 16 magio gh’èra un cel de’ n’azuro fondo dove sgreciando gariva inboressade le ròndene.
La festa parecià in onor de le nòve “Castelane” e de i nòvi ” Spadarini”, eleti a cavaleresca protession de la persona e de l’onor de le Dame insignide del blason “scaligero”, l’à tirà in canpo sbandieradori, arcieri, tamburini, balerine e figuranti, tuti in splendidi costumi medioevali (presente Rai3).
Finì el spetacolo e dopo l’intervento de la brava giornalista e “Castelana”, Vera Meneguzzo, mi, da 17 ani, “Castelana” e “Araldo” de la celebre onorificensa che anualmente, dal 1200, vien consegnà a le “Madone” e ai “Cavalieri”‘ più meritevoli, ò svolto, dal scalin piassè alto del castel scaligero e, co’ la sotoliniadura de du tanburini, el cerimonial in “latinorum” par po’ scominçiar l’apèlo e la letura de le benemerense, (senpre a son de tanburo), de i “neodecoradi”: Madona Iva Zanicchi (cantante e presentatrice Tv), Madona Cecilia Gasdia (notissimo soprano), Madona Teresa Bacco de le cantine Vicentini, Madona dot. Donatella Cinelli Colombini responsabile, tra l’altro, del premio “Barli Colombini” che à premià la scrittrice Susanna Tamaro e el giornalista Bruno Vespa, Madona Erminia Perbellini de la clinica omonima e assessor del Comune de Verona, Madona Lindsay Talas esperta in canpo enologico par tuta l’area europea e Madona Giovanna Verga presidente del grupo Clerici Sacco.
Per le dame el cerimonial el prevede, prima che ghe vegna consegnà la ciave del castel, che le se bagna la facia col “bianco Soave” bevendoghene po’ un bicer, parché, come l’à dito neI 16°sec. el filosofo Leonardo Fioravanti; “un poco de vin el serve a rasserenar e a colorir la facia, onde, ogni dona che sensa abuso la ghe ne bea, belìssima la deventarà” .
Tri, i Spadarini de corte: Cavalier Enzo Bolcato Presidente de la Camara de Comercio e de l’union dele fiere internassionali. Cavalier Giovanni Rana “papà dei tortelini più celebri de l’ltalia, l’Europa e… fra poco, del mondo. Cavalier Piero Sartori, noto, premiatissimo poeta, presidente del Cenacolo de Verona e conpositor (parole e musica) de cante da coro.
Par i òmeni, solo un gòto de vin e… gnente “ablussion” col medesimo!
La bela festa la s’à conclusa nel salon del ristorante “EI Ganbaro”, de Soave, tra piati “de casa nostra” e simpatici interventi da parte de la Iva Zanicchi (più bela de persona che non in Tv), de la Inperial castelana, Nenè Lovat, deus ex machina de la bela festa medioeval e de i rapresentanti de le confraternite vegnude a rapresentar altre coloride tradissioni.
Wanda Girardi Castellani
