L’Angolo de la Wanda – Aprile 1999 – “NAPOLEON A RIVOLI VERONESE”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“NAPOLEON A RIVOLI VERONESE”

Napoleon Bonaparte, in premio par la vitoria riportà sui patani (o kruchi. Austriaci, in ‘taliàn) a Rivoli veronese, el g’à concesso al general Massena el titolo de Duca de Rivoli. Inoltre, l’à ciamà una dele magiori strade de Parigi, lónga la belessa de 2575 metri, sita nel soborgo de Bellevue: Rue de Rivolì e con ‘na lege del vice-re d’Italia, Principe Eugenio Napoleon, el teritorio comunal de Rivoli l’è stà ingrandì con l’anession del teritorio de Gaium.
Come se no bastasse, par esaltar el sacrificio dei so soldadi, Bonaparte l’à ordinà la costrussion de’n monumento trionfal, inalsà ne la località ciamà “Le torte de Incanàl”, frassion de Rivoli, dove piassè è infurià la batalia. El monumento l’èra costituì da un basamento quadrato rialsà de tri scalini e rivestì de lastre de marmo bianco, basamento sul qual postava ‘na grande colona dorica in marmo rosso veronese con fusto decorà de corone de aloro e un capitel, pura de marmo bianco, che’l tegnéa sóra ‘n’urna da la qual se alsava le fiame. Dise le cronache che’l laoro  l’è stà finì tra el 1° lùjo 1806 e el 7 otobre del stesso ano e l’è costà circa 26.000 franchi. Naturalmente i patàni ‘péna che i à podù rimétar pié a Verona el 12 febrar 1814, i s’à fato premura de far saltar subito co’ la dinamite el ricordo de la so precedente disfata. Nel lógo de quel che l’èra ciamà “la Guglia de Rivoli” ‘dèsso resta poco assè!
Rivoli l’èra paraltro zà nominà par la scoperta de ‘na caverna piena de atressi de selce del periodo neolitico, ilustrà dal prof. Gaetano Pellegrini che’l l’à giudicà ‘n’oficina de lavorassion de arnesi litici. Ma el paese l’è ricordà nei libri de storia anca par el fato che’l só castel sbarrando la “ciusa” (chiusa) el g’à dà ‘na barca de secadure anca a Federico Barbarossa che, vegnendo zo in Italia nel 1155, solo dopo 4 giorni l’è riussì a conquistarlo copando Alberico e i so ladroni (come i era definì dai kruchi). Çerto però che la magior rinomansa la ghe vièn da la batalia ne la qual el Bonaparte el 14 genar del 1797 l’è riussì a darghe la supa a l’Alwinzy, paràndolo definitivamente al de là de le Alpi.
In ricordo de ‘sta importante batalia Rivoli l’à riunì tuti i cimeli in un bel museo. Lì se pól amirar el leto pieghevole da campo del giovane Napoleon; primo model realisà e oferto dal so creator Desouches de Parigi nel 1803, al Primo Console. Po’, la tera de sant’Elena donà al museo da Pierre Orsat, ritrati, medaie, bandiere, sculture, lettere, editti, proclami, monede, de metal e de carta, quadri, stampe, ceramiche, divise indosso e dei manichini, decorassioni, armi, alamari e botoni, borse, plastici de batalie, statuete pressiose e antiche, de porcelana, spade, speroni ecc… ‘Na colession veramente interessante e inportante che val la pena de ‘ndàr a védar.
Ma, “dulcis in fundo”, el giorno che l’à vinto la batalia de Rivoli, Napoleon l’è montà su una de le çime più bele del  monte Moscal e incantà da la belessa del panorama el g’à lassà el cor. Infati, n’impronta simile a ‘n cór l’è visibile, marcà su ‘na piera. A voler èssar maligna, sicome propio da quele bande el “Napo”, sbrissiando, l’à fato un assè poco marsiàl rebalton,  l’impronta la podarìa èssar de ‘na parte…. manco nobile.
El Museo Napoleonico de Rivoli l’è verto tuti i giorni da le 9 a le 12 e da le 15 a le 18, Il bilieto el costa 4000 franchi a testa ma se s’è in tanti, alora l’ingresso el ghe ne costa 3000.

El telefono de la custode l’è 0457 281309 (Vaona Iole).

Wanda Girardi Castellani