L’Angolo de la Wanda – Marzo 1999 – POESIA DIALETAL A VERONA: “I çinquant’ani del Cenacolo de Poesia “B.Barbarani” de Verona”

…a cura di Graziano M. Cobelli

gcobelli05@gmail.com

Quatro Ciàcoe: da Verona

POESIA DIALETAL A VERONA: “I çinquant’ani del Cenacolo de Poesia “B.Barbarani” de Verona”

Çinquant’ani fa, verso la fine del 1948 el poeta Giuseppe Barni, déto Bepo Spela, co’n anuncio sul giornal “L’Arena”, l’à invità tuti i poeti e i apassionadi de poesia dialetal, a incontrarse par fondar un Cenacolo con sede provisoria a l’ostaria de l’Amelia in Cortesèla Sganzarie. A quela prima riunion è intervegnù i poeti: Italo Donatelli, Alberto Rovaldi, Giovanni Ceriotto, Ferruccio Castelli, Gianni e Dino Monicelli, Quirino Sacchetti, Mario Puppini, Ferruccio Mariani, Tolo Da Re e Oreste Franchi. Al Batéso del nóvo sodalissio gh’è stà alora, oltre a 17 poeti, ‘na trentina de amadori i più importanti dei quài: el “profe” Gino Beltramini e l’ator Toni Beltrami. Primo presidente: Mario Orna, sostituìdo poco dopo da l’avv. poeta Angelin Sartori, afiancà dal segretario e me amigo “terón” Michele Bichelli del quàl ò za parlà nel n°1 de Q.C., 1990.
Ai primi del 1949, po,’s’avemo subito iscrito: mi, Terio Ferrari, Mario Maimeri, Libio Da Santa Maria, Lucia Zago, Mirka Bertolaso e altri, noti e manco noti poeti veronesi.
In quel ‘stesso anno el Cenacolo el s’à trasferì in via Zambelli, al ristorante “Torcolotti” dove, oltre che a sentìr de le bele poesie gh’èra anca la possibilità de béar e magnar ben, tanto è vero che el pranso par el me matrimonio, el 9 magio del 1953, l’ò fato propio lì!
Ma, tornando al Cenacolo denominà “Berto Barbarani”; la notissia de la fondassion l’è stà dada nel n°1, anno primo, de “la musa triveneta”.
La prima fase, el primo obietivo de ‘sta nóva istitussion l’è servì a conossarse, strénzar amicissia e confrontarse fra poeti ma po’ bisognava rivar al publico più vasto par difóndar el gusto, un poco indormensà, de la poesia vernacola e far sentir che el dialeto, quando el tóca le corde più profonde del sentimento umano, no’l g’à gnente da invidiarghe a la poesia in lengua italiana, A ‘stó traguardo s’è rivadi co’ ‘na brìgola de recite sia in çità che in provincia.
Po’ emo rivolto l’atension al glorioso passato de la lengua veronese dedicandoghe diverse importanti serate ai poeti distanti nel tempo come Giacomino Da Verona e ai più recenti, come: Berto Barbarani, Gianfranco Betteloni, Fragiocondo (Giulio Cesare Zenari) ecc…
Nel 1976, ne la nóva sede de via Amanti, a la presidensa è stà’ eleto Gianni Faè. Presidente Onorario Angelin Sartori, segretaria la sotoscrita Wanda Girardi Castellani e adeta a le publiche relassioni, la nostra Lucia Cozzolino. In quel’ano è stà’ inoltre stilà el statuto po’
agiornà e completà ne l’april 1989.
Ancò, dei apartenenti al Cenacolo del 1948-49 semo restà in dù: mi e Tolo Da Re (e tuti dù tochemo fero!), ma par fortuna da la semensa sparpaià çinquant’ani fa è nato un splendido giardin de poesia: Piero Sartori (l’atual presidente), la Elena Piccoli Falezza, Giampaolo Feriani, Giovanni Benaglio, Michele Gragnato, Gianni Recchi, Berto Rossignolo, Clara Pagani, Mario Brazzoli, Glauco Pretto, Roberto Bissoli, Elsa Adami, Lucia Menini Beltrami ecc…, tuti poeti da primi premi dei quài, sia el sodalissio che la la çità i va giustamente orgoliosi!
Nel dicembre del 1998 par i festegiamenti del çinquantenario, el cenacolo, pilotà da un splendido e ativissimo “nochier”; el bravo e ativo presidente Piero Sartori, l’à organizà un concorso triveneto de poesia con la premiassion ne la loggia Fragiocondo. Inoltre, ‘na serata con el notissimo poeta Franco Loi, nel salon de Sant’Eufemia; manifestassioni che g’à ‘vú ‘na vasta partecipassion de poeti e simpatisanti. Ma no’ se finisse qua parché gh’émo in cantier tante altre robe, prima fra tute quela de strénsar frutuosi raporti con i altri cenacoli veneti con scambi culturali e simpatici incontri.
L’atual nostra sede l’è al Centro D’incontro de le scole elementari de Quinsan – via Fabricado Scolastico n.8. Telefono 045 561236, presso el segretario Mario Brazzoli.

Wanda Girardi Castellani