L’Angolo de la Wanda – Febbraio 1999 – “Striossi o fature d’amor”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Striossi o fature d’amor”

Quela che, tra le done de la me generassion, no’ s’à fato far le carte almanco ‘na olta, la vegna fora… che l’è ‘na rarità! Mi, sui sedes’ani, andavo a fàrmele far da ‘na veceta in via Fama; 50 franchi a la bòta e a tute le baIe che la me contava ghe credevo come al vangelo. Però, ai me tempi, anca ne le çità se usava farse in casa, sensa l’aiuto de maghi e strie, “fature”, pentàcoli (pantacli) e amuleti, specie quando che s’ èra afliti da amori non corisposti. EI più classico de i striossi l’èra quel de l’incenso: sete grani che se ghe doveva butar indosso a l’”ogeto amato” quando se loincontrava. Par sete sere po’ se dovea impissar par qualche minuto ‘na candela bianca, recitando par sete olte, sta ciaculatoria: “Santa Rita benedeta / manda el sposo a ci ‘I ghe spèta / fa che lu el me spèta a mi / santa Rita pènseghe ti”… e a la fine de la setimana el s’avarìa inamorà come un pito.
Quando che in cel gh’èra la luna piena, pensando intensamente al proprio amor, gh’era da recitàr: “Luna che in cel te splendi / fame sognar dormendo / ci sposarò vivendo” e ‘l sogno rivelador no’l sarìa Pantaclo par conservar la mancà a salute. L’apèlo.
Ma de fature o striossi noialtre butele del tempo che fu ghe ne conossevimo più de uno.
Prima de tacar l’operassion l’ èra d’òbligo sempre dìr ‘ste parole “Sul me nome, e in quel de… (lu o ela) fasso ‘sta fatura d’amor”, po’… via co’i pastroci del caso.
EI striosso del sgulmarin: metar in un recipiente de cristal un poca de aqua boìda almanco par 10 minuti e zontarghe par ogni cuciar de aqua 2 foje de sgulmarin. Missiar par qualche minuto; pensando e ciamando par nome quel a ci l’èra indirissà la fatura ripetendo intramèso “Caldo amor del sgulmarin, fa che stemo sempre vissin”. Lassar passar 24 ore, poi filtrar l’aqua e fàrghela bear (o almanco bagnarghe ‘na man).
Un altro striosso antichìssimo l’è quel de impiantar un giacinto in un vaso novo pensando a la persona amada. Tute le matine e tute le sere se dovarà darghe da bear recitando: “La radisa la cressarà / e quando el fior se versarà / che sbòci pura la speransa mia / vojo, comando e pòsso… cussì sia!”. ‘N altro sistema bon l’è quel ciamà: “l’incantesimo del Sator”. Se trata de metarse indosso e scondarghe indosso o in casa a la “vìtima” un quadrato màgico, deto “palindromo”, che’l se trova disegnà anca in tante cese, specie medioevali, in Italia come a l’èstaro. L’è fato de 25 quadrati con le letere:

S  A  T  O  R
A  R  E  P  O
T  E  N  E  T
O  P  E  R  A
R  O  T  A  S

Come podì vedar, se po”I lesarlo partendo da sinistra in alto o da destra in basso, in senso vertical e Pantaclo par catar amor e fortuna, in senso orisontal, senpre partendo da sinistra in alto o da destra in basso.
Naturalmente el va disegnà de vènardi e con la luna in cressar, a le 8 de la matina, a le tre dopodisnàr o a le diese de sera, dopo de aver sparpajà incenso par la casa, onde alontanar le presense maligne. ‘N’ altro “pantaclo” d’amor, potente, valido anca contro i furti (incolarlo a la porta de casa e su la machina) l’è quelo deto “de Bidouh”: 9 quadrati cusì predisposti:

4  9  2
3  5  7
8  1  6

come notarì, in qualunque diression che se’l soma, vien fora 15. Ma anca i profumi i juta a farne conquistar l’amor Pantaclo contro tuti i calcitranti, vissi, debolesse e tentassion. Se l’è del segno de l’Ariete… inprofumeve de lavanda o basaricò. Se l’è del Toro… co’ la rosa e se l’è de i Gemèi, co’ l’orìgano o co’ la menta. Se l’è del Cancro, ghe vorà un profumo de lilà o de tilio, ma se l’è del Leon… òtimo l’incenso anca se va ben pur el ciclamìn. Par uno de la Vergine, invesse: giacinto e gardenia. La Balansa… la farà caolea (capitolerà) al profumo de verbena e de mus-cio, mentre el Scarpion el preferisse l’èrica, la tuberosa e la ginestra. Per el Sagitario, sarà ben negarse ne la violeta e, ne la stajon, metar in Pantaclo par I’amor, tóla ‘na rama de
calicanto. Al Capricorno, ricordemose che ghe piase el narciso e el giacinto, mentre l’Aquario el và in brodo davanti a ‘na felce o se’l snasa un mugheto. Bon ultimo, i Pessi (come mi, ma son za ocupada) se poI farli cascar ne la rede metendoghe soto al naso del glìcine o del gelsomin, ma no’ ghe despiase gnanca la peonia e la zàgara.
Nel caso po’ che si boni de disegnar, vedì de ripetar i pantacli che ve riporto, bòni par un saco de robe. Manca solo quelo contro el fisco… ma qua no’ gh’è barba de protession che tegna!

Wanda Girardi Castellani