L’Angolo de la Wanda – Dicembre 1998 – “COME CONSERVAR LE STRAFANTOLE PRESSIOSE”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“COME CONSERVAR LE STRAFANTOLE PRESSIOSE”

dal Maestro orafo Angelo Antoniazzi – Verona

Da  che  la dona l’è aparsa su ‘sta tera è aparso  al  so  seguito (con el scopo de mèio inganbarar l’omo) l’ornamento;  ornamento  natural  come un fior nei  cavéi, a la cintura  o  su  le  vesti, opur  ornamento  laorado,  de  oro, de argento,  perle  e  piére  più o manco  pressiose. Quindi, al servissio de la belessa feminìl, èco ch’è nata l’arte orafa; un’arte che se perde ne la note dei tenpi!
Par onor de cronaca bisogna, paraltro, dir che ‘sta arte, oltre che al servissio de la dona,  l’è andà anca a quelo de re e imperadori, tra corone, medaioni, colàri, bastoni  de comando ecc… nonché a quel de Dio, santi  e beati, par reliquiari e vari ogeti sacri, ma, torno a dir che, soratuto, l’è servì a adornar le done, siore o manco siore, parché mi penso che no’ ghe sia stà al mondo una che no la  g’abia ‘vù almanco na colanina, un anelìn un par de recineti da sfodrar a la festa.
‘Sti ogeti, che generalmente se se tramanda da mama a fiola, par generassioni, qualche òlta, par ignoransa o incuria, i va però a remengo. Come far parché no’ la suceda?
Eco quà alora qualche pressioso consilio:
ORO – no’l g’à mai da vègnar a contato col mercurio parché el finirìa in frègole. Oviamente, no’l g’à da vègnar a contato gnanca con pomate mercuriali.
Par farlo vègnar neto e lustro: métarlo in un pignatìn, magari postà su un fassoleto, e farlo bóiar qualche minuto coerto de aqua con un cuciarìn de bon detersivo legero, da lana. Po’ dopo aver lassà cha tuto se sòra, tirar su l’ogeto spassolandolo con delicatessa ne la so ‘stessa aqua. Infine, dopo ‘na resentadina in aqua freda, sugarlo.
Se gh’è dele piere, gnente paura; el sistema el va ben anca par quele (salvo che par le perle i corài e i turchesi).
ARGENTO – lustrarlo spesso con prodoti aposta e evitar che’l vaga a contato con roba acida (sal, asedo ecc…).
PERLE – el più belo e più aristocratico dei ornameti!
I antichi egissiani i amava le perle al punto da farsele métar anca nela sepoltura e se dise che Cleopatra l’abia desfà ‘na perla ne l’asedo par dopo bèarla, solo par vìnsar la scomessa fata con Marco Antonio che l’avarìa podù béarse in un pasto la richessa de un intiero paese. Nela antica Roma le perle i era considerà la suprema richessa mentre  nel medioevo la colana de perle l’èra la predileta da le “Madone” ma anca dei cavalieri che i le indossava quando i andava in batalia convinti che la magia de ste geme la l’avarìa preservà dai pericoli. Infine, durante el rinassimento, gh’è stà nele corti ‘na vera invasion de perle, vietade adiritura par lege a ci no apartenea a la nobiltà.
Fin a l’inissio del 1900 le perle naturali, rarissime, i era a la portada solo dei siori e dei potenti ma ancò con l’avento de le perle coltivade nei arlevamenti giaponesi, ‘na colana de perle l’è un lusso che pol parmetarse, se non tuti,  in tanti.
Le perle (e parlemo dunque de quele coltivade, specie se le g’à poca coltivassion e in sto caso le se sgrosta facilmente) i è delicate rispeto a le altre piere e ai metài pressiosi, perciò bisogna vérghene tanta cura. I cosmetici, i profumi, i spray par i cavèi i contièn sostanse chimiche che le finisse co’ l’apanàr el slusor de la perla. Cusì pura el sudor e i acidi de le lossioni oleose. Alora; l’è meio métarse le perle dopo èsserse trucà e dopo cavade l’è bona regola passarghe sora un pàno mòrbio inumidì. Le perle le g’à da èssar sempre separà dai altri gioièi parché no’ le se sfrisa. El posto mèio l’è ‘na busta de pano legero. Se se le mete spesso, l’è bona regola farghe cambiar el fil almanco ‘na volta a l’ano. El fil sarìa meio che’l fusse de seda ma va ben anca el nylon. Tra ‘na perla e l’altra va fato un gropeto de separassion. Inoltre, le perle no’ bisogna conservarle al scuro, l’ideal sarìa ‘na scatola de legno con dei buseti parchè gira aria. Se ‘na perla la se mala, cavarla via subito parchè se nò la intaca le altre.
Dopo l’istà, lavar la colana con aqua tièpida, saon neutro, detersivo legero o bicarbonato, spassolandole pian a pian ne la so aqua par po’ picarla via a la luce a sugarse.
CORAL – L’è delicado come le perle e come quele el va tratà. A le larghe, donca, dai acidi, dal sudor, da le làche ecc… Par farlo rispléndar bisogna, dopo lavado anca lu con aqua tiepidina, detersivo o bicarbonato, passarlo con un fioco de bombaso inumidì de oio de vaselina par po’ lustrarlo con un pano mòrbio.
TURCHESI – l’azuro ornamento dei egissiani el va tratà anca lu come le perle, anca se manco delicado.
Eco, me par de aver dito el più! Se me son desmentegà qualcosa e se qualcheduna g’à altre informassioni da dimandar… mi son qua, pronto a rispondarghe a tute le gentili letrici de Q.C.
Angelo Antoniazzi

Wanda Girardi Castellani