L’Angolo de la Wanda – Settembre bis 1998 – “Par vìvar ben”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Par vìvar ben”

“Da un manoscrito del 1692, trovà a Baltimora ne l’antica cesa de San Paolo”.

“Va avanti senpre co’ la calma tra el bordèl e la pressia e ricòrdete quanta paçe pòl èssarghe nel silensio.
Par quanto t’è possibile, sensa pèrdarte de corajo, çerca de mantegner boni raporti con tuti.
Disi la to opinion, ciara e con tono seren, ma scolta anca i altri: pure i noiosi e i ignoranti i ga la so storia!
Scansa le persone volgari e i prepotenti… i è un tormento par el spìrito.
Se te insisti a metarte a paragon, coi altri te ris-ci de deventar borioso o infelice parché ghe sarà senpre gente mèjo o pèso de ti!
Gòdete i to sucessi e i to progeti. Tien vivo l’interesse par el to laoro, par quanto che’l possa èssar umile; l’è questo el vero e unico patrimonio, el perno de la fortuna del tenpo.
Vàrda de èssar prudente nei afari parché el mondo l’è pien de inbròi, ma vàrda anca che questo no’l te renda orbo davanti a quel che gh’ è de bon: i è tanti quei che tende a alti ideali e dapartuto la vita l’ è piena de eroismi.
No’ sta’ metarte màscare e soratuto no’ sta’ recitar afeti che no’ te pròi.
No’ sta’ far mostra de cinismo verso l’amor parché, anca de fronte a qualsiasi delusion e aridità, l’è l’unica roba che resta eterna, al de là de le stajoni, come el senpreverde!
Aceta de bonagrassia la sagessa de l’età lassando andar con serenità tuti i fruti ligà a la giovinessa. Arleva la forsa d’animo par poderte difender da le disgrassie ma no’ sta, mai tormentarte con de le fantasìe; el più de le volte le paure le nasse da la solitudine o da la strachessa.
Al de là de’ na sana dissiplina, vòiete ben e sii un poco de mànega larga con ti stesso; te si fiol de l’universo, come i àlbari, le stele, le gosse del mar e te gh’è pien dirito anca ti de esìstar.
Par questo, sta’ in paçe con Dio, qualunque sia l’opinion che te gh’è de Lu e, qualsiasi i sia i to afani, le to aspirassioni, ne la confusion de sta esistensa, mantègnete in paçe col to spìrito.
Malgrado i so ingani, le fadighe, i sogni andà a remengo… sto qua l’è pur senpre un mondo maravejoso e ti, armà de santa passiensa e prudensa, sfòrsete de starghe drento… e feliçe”.

Wanda Girardi Castellani