L’Angolo de la Wanda – Giugno 1998 – “Dialma Seno Martello”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Dialma Seno Martello”

Do mane d’oro a servissio de’ n’ anima da poeta.

A vedarla, cusì, te la diressi ‘na studentessa, biondina, timidina, al de soto de i vint’ani, inveçe la me conta de èssar za nona… “‘na òlta e mèsa” (in quanto el secondo neodo l’è ancora in cantier). Sposà e mama de tre fiole, pur co’ un cotanto inpegno de fameia l’è riussida, dopo èssarse diplomà al liceo Artistico de Venessia, insegnando, po’, educassion artistica fin al giugno 1994, a partecipar, intramèso, dal 1986 a st’ano, con successo (primi, secondi e tersi premi), a ‘na çinquantina de concorsi nassionài e intemassionài (Francia, Germania ecc…), e a far mostre coletive e personali, un poco dapartuto, anca quele con sucesso.
Questa l’è la DIALMA SENO MARTELLO, scultrice, in legno, in piera, in teracota e in quant’altro se presta a èssar modelà da quele so mane de oro a servissio de ‘n anima da poeta! E l’è propio el caso di giurarlo parché soto la magia de i so dei, la materia la ciapa splendidamente vita e, soratuto, la “parla”!
Gh’è da precisar che la Dialma l’è anca ‘na vàlida pitrice e ‘na altretanto brava disegnatrice grafica.
A Soave, dove la risiede e dove quasi in permanensa, a le “Soaverie” (la casa de Beatrice, vedi Q.C. marso 1997) de via Roma n° 17, se poI amirar diverse tra le so opere, l’à anca realisà, in fero e aciaio, l’interessante monumento “al Donatore”. AVIS e AlDO. Inaugurà un par de ani fa nel parco dei ufici postài, nel so stile moderno, aereo, essensial, el sta a significar la vita de l’omo che a un certo momento, causa la malatia, la tènde a destacarse. Ma eco che intervien le do benemerite Associasioni, rapresentà da un anel d’aciaio, a tegnerla ancora unida!
Un altro cèlebre lavoro de l’artista l’è el murales che l’à ideado e realisado po’ co’ la colaborassion de un s-ciapo de giovani, su un muro de l’asilo de Soave. L’òpera la gh’è stà dedicada, da i compagni, a Nicoletta; ‘na butela che à lassà la vita nel fiorir de la so primavera. Ci va a amirar i capolavori de la Dialma el g’à però da ‘verghe ‘na particolar sensibilità de anima; un’anima de poeta inbonbegà de inteligensa e fantasia, parché ste opere le g’ à tuto un discorso drento che va ben al de là de quel che i oci i poI vedar de soravia. Le sculture, i disegni e le piture de ‘ sta artista ecessionale, le va lete tra le righe e, proprio par questo, quei come mi no’ i se stufa mai de amirarle in quanto, momento dopo momento, i ghe scopre un qualcosa di novo. Questa, a vardar ben, l’è la vera arte che no’ la g’à mai da èssar “fotografica” ma senpre interpretabile. De la Dialma se poI, infine, dir che in ogni so opera l’è difarente; un caleidosopio drento al qual, l’arte la se trasforma a l’infinido, in mile forme una più bela de l’altra. Daltronde, come el diseva el grande Picasso: EI vero artista el g’à da èssar senpre difarente parché, se l’è scusabile qualche òlta copiar i altri, no’ l’è mai scusabile copiar se stessi.

Wanda Girardi Castellani