L’Angolo de la Wanda – Gennaio 1998 – “UN VERONESE AL POLO… SETANT’ANI FA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“UN VERONESE AL POLO… SETANT’ANI FA”

“Tra l’equipagio del dirigibile “Italia”, anca un veronese, come mi de Porta Vescovo; el sotocapo motorista Ettore Arduino”

Su la fassada de ‘na casa a dú passi da quela andó son cressuda e più precisamente al numaro 11 de via Cantarane, in “Veroneta”, gh’è murà ‘na targa quasi oramai scancelà: “A Ettore Arduino, sottocapo motorista, che col suo sacrificio accese tra i ghiacci dell’Artide una fiamma tricolore”. Mi ero picenina ma, se anca vagamente, me ricordo davanti a ‘sta casa, ‘na cerimonia con tanto de bandiere; s’èrimo intorno al 1938, dies’ani dopo la scomparsa tra le bianche distese de l’Artide del me ilustre, ma anca lu desmentegado, concitadin.
A Verona, paraltro, in tenpo de fàssio, i g’à pura dedicà ‘na via, ansi, un vicolo; el terso a destra de via XX Setembre, partendo dal ponte Nave. A lu l’è stà’ anca dedicà l’Aero-club de Boscomantico, fondà, apunto, nel 1928 con a la presidensa Nico Piccoli.
“ETTORE ARDUINO”, sototenente de l’aviassion; un nome che par i più no’l dise gnente. Un poeta, un pitor, un ci-sa-cosa!!! Gnanca quei de la casa e de la strada i lo sà. Pura la tragedia del dirigibile Italia la s’à consumà ‘pèna setant’ani fa, tra le 2,20 del 24 magio 1928 e el 12 de lujo, quando el rompigiasso russo Krassin l’è riussì a portar in salvo el grupo dei superstiti de la famosa “tenda rossa”.
Dopo aver sorvolà el Polo zà nel 1926 insieme al grande Amundsen con el dirigibile Norge, (de l’equipagio avéa pura fato parte el nostro Arduino), du ani dopo el comandante Umberto Nobile (nato a Lauro de Avellino) l’à çercà de ripètar l’impresa con el gigantesco dirigibile “Italia”, da lu stesso progetà; longo 104 metri, dal qual, proprio a le do e mesa del 24 magio, l’à lancià su la banchisa ‘na croçe e ‘na bandiera tricolor.
A ‘stó punto, finì feliçemente la prima parte del programa, scominçiava el viajo de ritorno; un ritorno che subito el s’avèa preanuncià assè dificile parvia del vento e de la nebia. El giorno dopo, el dirigibile, apesantido dal giasso, l’à scominçià a sbassarse pericolosamente verso el pack.
Nobile, rivolto al me concitadìn Ettore Arduino, l’à sigà l’ordine de smorsar i motori par evitar el pericolo de incendio, lassando contemporaneamente cascar la zavora costituida da ‘na cadena de bale de bronso pesante 400 chili. L’urto però l’èra oramai inevitabile! “L’è tuto finido!” l’ha pensà el comandante, ferido a la testa e a le gambe, schissà soto le macerie in meso ai so omini; ci morti e ci feridi. I era le 10,33 del 25 de magio.
Nela sterminada destesa de giasso che sbarbajava i oci, rente a la navesèla s/ciantà, era restà vivi: Nobile, la so inseparabile cagneta Titina, miracolosamente ilesa, e 8 omeni (Mariano, Zappi, Viglieri, Trojani Biagi, Cecioni, Behounek e el meteorologo Malmgren. Pomella l’èra morto ‘ne l’inpato) mentre la parte de sóra del dirigibile, alegerì, l’èra sparida par sempre ne la nebia tiràndose drio altri 6 omeni (Caratti, Ciocca, Alessandrini, Pontremoli, Lago e el nostro Ettore Arduino), mai più ritrovadi.
I superstiti pèna rivegnùdi i s’à dà da far a catar-su tuto quel che se podeva ancora usar par la soravivensa. Una tenda che i à subito impiturà de rosso par rèndarla visibile in tuto quel bianco, la radio, arnesi vari e qualcosa da magnar.
La radio, co’ le baterie quasi scariche, riparà co’ la grafite de ‘n lapis, assionada dal bravo telegrafisca Biagi, l’à subito tacà a mandar l’SOS che, finalmente el 3 giugno un radioamador russo (tale Schmidt) l’è riussì a captar dando subito l’alarme. Da quel momento è partì i socorsi e Umberto Maddalena el 20 giugno l’à localisà la tenda rossa. Tri membri de l’equipagio i era partidi a pié ne l’intento de çercar socorsi ragiungendo la nave apogio “Çità de Milan” ancorà a le isole Svalbard; de ‘sti tri, uno l’è morto congelà (el svedese Malmgren) ma i altri dú (Mariano e Zappi) i è stà racolti, stremà de forse, da la nave russa in viaio verso la tenda rossa.
El 24 giugno un aviador svedese (Lundborg) l’è po’ riussì a aterar portando in salvo Nobile. Al secondo tentativo però el so “Fokker” l’è capotà su la banchisa. El grupo dei naufraghi el vegnarà salvado, a la fine, el 12 de lujo dal rompigiasso sovietico Krassin (po’, par questo, trasformà in nave-museo); i avéa passà sul Pack ben 48 tremendi giorni!
A le vitime de ‘sta sfortunada spedission se ghe n’èra zontà anca ‘n’altra; el norvegese Roald Amundsen, el più grande e famoso esplorador polare che generosamente l’èra partì in arioplan par portarghe socorso ai nostri; sparì durante el volo e, gnanca lu, mai più ritrovado.
Tri ani dopo el Comandante Nobile l’à fato un longo viajo a bordo de ‘n altro rompigiasso russo, el Malyghin, a la vana ricerca dei resti de l'”Italia” co’ i so siè òmeni strapegadi via da l’involucro dopo el destaco de la navesèla.
Ala tragedia del dirigibile “Italia” è seguì po’ un saco de polemiche e el comandante l’è stà acusà de incapacità nel comando e de èssarse salvà par primo fregandossene dei so omeni. I l’à anca fato responsabile de la morte de Amundsen… insoma, presto-presto i g’à adebità anca la crucifission de nostro Signor. S’è dovudi rivar fin al 1945 parché Nobile el fusse riabilità.
Personalmente, son convinta che el g’à d’aver fato del so mejo, viste le condissioni e le circostanse e a salvarse par primo i ghe l’à praticamente costreto co’ la motivassion che solo lu l’avarìa po’ podù, dal canpo base, organisar i socorsi par el resto del grupo, conpresi i tri che i s’èra aventurà a piè. Par difèndarse, el Comandante l’à scrito libri e articoli e altri i ghe n’à scrito altri menbri de la spedission, ma, par çerti versi, ancora ‘dèsso su la façenda del dirigibile “Italia” no’ s’à diradà le nebie, par mi ingiuste, del dubio. Tuto questo, setant’ani fa… ‘na tragedia ma anca ‘n’altra storia de ardimento italian… e veronese, da no’ desmentegar e dela qual dovemo èssar, tuto somado, orgoliosi.
‘Na bona documentassion su l’argomento la se cata al Museo Aeronautico de Vigna di Valle (da le parte de Bracciano) dove gh’è ‘na intiera session dedicà ai modèi de dirigibile de Nobile e ai cimeli de le so inprese.
El Comandante l’è sconparso po’ el 30 lujo 1978, novantène, 50 ani dopo l’epilogo de l’aventura polare.

Wanda Girardi Castellani