L’Angolo de la Wanda – Dicembre bis 1997 – “Càbale e fiori”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Càbale e fiori”

CÀBALA DE ZOROASTRO
A’ sto re de i Batuani se atribuisse la prima càbala. L’avea conposto ‘na piramide con un milion de cifre e po’ el l’avea sepelì soto el Nilo. Quando la brilava piena nel cel la luna la fasea aparir su l’aqua de i numari che i africani, con çerti calcoli, i zugava con, par pòsta, un cubo de sal, un capo de bestiame o ‘na schiava.
Se mete alora in verticalle cifre de l’ano e, una par una, se le moltiplica par 12. Le some, po’, se le adissiona per po’ metarle anca lore in vertical… in scalando (una cifra, po’ do, po’ tre ecc…) e la soma total, oportunamente divisa in tre cifre, se la zuga al lòto.

CÀBALA DE CIANGCIANG (CINESE)
Cavar dal sacheto de la tonbola un numaro (es. el 9) e moltiplicarlo par el numaro corispondente al mese (es. el 27) 27 x 9 = 243 zontarghe i vostri ani (es. 31… e beati ci ghe i à ancora) = 274. Moltiplicar questo par el numaro corispondente al sogno fato (ex. capitano: 61) = 16714.
Èco i temi: 1-67-14 / 16-7-14 / 16-71-4.

CÀBALA RUSSA
Contar le letare del propio nome (es. Elisabetta = 10 letare) moltiplicarle par l’età (es. 10 x 43 = 430) moltiplicar ancora par el numaro del sogno (es. telegrama: 73-430×73 = 31390.
Èco el terno: 31-3-90.

ANIVERSARI DE NOSSE:
El primo… l’è de COTON (regalar majete, mudande, fassoleti, ecc…).
El secondo l’è de CARTA (ve la cavè con letare, buste, libri, ecc…).
El terso l’è de CORAME (cinture, portafòli, tacuini, scarpe, ecc…).
Da sto punto se va avanti a salto:
El quinto: de LEGNO (tuto manco ‘na mescola o un baston; pericolosi).
El setimo l’è de LANA (maje, majoni, coèrte, calsetoni, barete).
El decimo l’è de STAGNO (mastèle o seci; reperibili dai antiquari).
Dodicesimo: SEDA e LIN (‘na camisa sexi o… se l’è vecia, un fular).
Quindicesimo: CRISTAL (cope de sàmpagne… o gòti da sampagnete).
Vintesimo: PORCELANA (un bel vaso da poder ròmpar quando se bèga).
Vintiçinquesimo: e i è d’ARGENTO! (un cabarè, ‘na spila, 500 franchi, de quei co’la caravèla… magari co le vele roerse).
Trentesimo: nosse de PERLA! (e qua taca i problemi de scarsela, a meno che no’ le sia perle de vero).
Quarantesimo: nosse de RUBIN (a la maledeta, ripiegar su un rubineto da seciar, da bagno o bidè).
Çinquantesimo: nosse de ORO (tuto… manco che l’oro de i dentisti a scanso de dover portar po’ le strasse al monte).
Sessantesimo: nosse de DIAMANTE (un regal che gh’è poche probabilità de dover fare, incasomai, vista la probabile “vista” a quel’età, se poI far passar par un diamante un qualunque comun cuI de gòto).
Aniversari, a sto punto, no’ se ghe ne prevede, giustamente, altri.
Comunque, tuti i ani se pol sempre ripiegar su un masseto de fiori, gradido a tute le età.

Dal fiorista, tegner presente che tuti i fiori i ga el so significato:
ANÈMONI: son tuto tuo-a / AZALEA: amicissia / BEGONIA: amor suplicante / ROSA: superbia e crudeltà (anca parché le costa tanto e no’ le dura gnente) / CAMELIA: costansa nei afeti /
CICLAMIN: solitudine / GARDENIA: belessa e candor / DALlA: sterilità / GAROFOLO: poesia e amor / GELSOMIN: gentilessa / GERANIO: orgolio e presunsion / LILIUM: tanti amori /
GIACINTO: umanità / GIGLIO: castità / GINESTRA: amor par la fameja / FIORI DE CANPO: modestia / ORCHIDEA: aridità (de le scarsele… dopo averle cronpà) / MARGARITA: le robe più bele! (e se pol torlesu in tuti i cantoni… a gratis).
Consilio: quando se ga propio voja de far un inportante omagio floreale, andar zo a le 6 de matina co’ ‘na fòrbese in scarsela e scalvar i fiori de i giardini de i altri; almanco quei che ga la scarogna de spingolar-fora da reticoladi e cancèi.

Wanda Girardi Castellani