L’Angolo de la Wanda – Ottobre ter 1997 – “Moto… che passion!”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Moto… che passion!”

Una tra le tante passion de casa mia I’èra quela de la motocicleta e da che son nata a quando me pare, par ragiunti limiti d’età, no’ I’à dovù rinunciarghe, ghe n’ò senpre visto d’atorno qualcheduna; prima ‘na “DKW”, po’ ‘na “GILERA”, po’ ‘na “GUZZI” e po’, ripiegando su cilindrate più picole, ‘na “LAMBRETA” e par ùltimo ‘na “VESPA”, venduda de corsa dopo che i mei, su la strada de Vicensa, par poco no i g’à lassà la pel!
Me ricordo che nei ani trenta, sentà sul selin dedrìo, ghe n’ò fata anca mi de strada; mi, me papà e, piantà sora el fanal, sant’ Antonio con tanto de masseto de fiori.
Beh, quando su “I’Arena” ò leto che domìnica 13 luglio 1997 ghe sarìa stà la sfilada de le moto “d’epoca” par ‘na corsa de regolarità organisà dal Motoclub Giulieta e Romeo de Verona, con partensa davanti al Municipio e po’… su, par i Lessini, (Cerro, Boscocesanova, Roverè, Campo Silvano, San Giorgio) armà de machina fotografica a le 9, za ero in Bra.
Le moto in competission, i era 62, divise par grupi a secondo de la cilindrada; I’ultimo numaro incolà sul fanal l’è stado el 105, partido po’ par ultimo.
Tra le splendide moto schierà davanti a palasso Barbieri, ò visto tuti i nomi più prestigiosi; le Gilera, le Benelli, le Morini, le Guzzi, le Ducati ecc… oltre a Lambrete, Vespe e altre “bestie picole”.
La più bela de tute: ‘na Guzzi – 1° model fabricà da Carlo Guzzi nel 1914. ‘Sta favolosa machina, tegnuda che la par nova de bala, I’à partecipà a tute le corse europee. Notevole el claxon a tronba e la borseta de corame, pura d’epoca. Da amirar anca el “Iook” del “centauro”.
l motociclisti, salvo rare ecessioni, i era pitosto vecioti ma tuti fieri e orgoliosi de le so moto e in parfeta tenuta; cinturon de àstico, polacheti e casco, anca tra el publico ò notà diversi ansianoti, pieni de nostalgìa e tuti co’ le bave a la boca, primo fra tuti Angelo, vecio “centauro” mai rassegnà a la quatrorude.
Le moto i è scominçià a tor el via, una a la òlta partendo da le più picole, a le 10.40… a distansa de 30 secondi. L’ultima, la 105, l’è partida verso le 11.
Tra i motociclisti ò inbrocà anca uno tra i più noti poeti de Verona; el dotor Bepi Sartori co’ ‘na bela “Guzzi” verde-militar, oviamente saludà da mi e da Angelo Antoniazzi con sbraiti de incorajamento.
Vedendo passar I’ùltima Gilera m’è tornà in mente quando che se cantava: “Pitosto de ‘na dona, me cronpo ‘na Gilera e vago stronberando da la matina a sera”.
Moto… moto, ah, che nostalgia!

Wanda Girardi Castellani