L’Angolo de la Wanda – Luglio 1997 – Ah … ‘ste done !!!
…a cura di Graziano M. Cobelli
gcobelli05@gmail.com
Quatro Ciàcoe: da Verona
Ah … ‘ste done !!!
Statue da basàr, “personagi” vissudi o legendari, ai quai mandarghe letere e invocassioni. Santi da pregar; carte da consultar e fature da strolegar, tuto par catarse, tegnerse o far tornar un moroso.
Noialtre done semo senpre stà dele romantiche sognatrici, quindi, che’l nostro magior interesse el sia l’amor l’è un fato sul qual no’ ghe piove. Parcosa?
L’è notorio che, mentre i mas-ci i va in çerca dela femena più bela e fresca e in genere no’ ghe ne inporta un figo se po’ l’è stupida come ‘na galina, la dona inveçe la çerca el “capo” e un “capo” el pol èssar anca vecio come el cuco, scancanà e bruto come el pecato mortal, l’inportante l’è che’l vansa-su in qualche canpo; arte, siense, politica, laoro ecc… Insoma; la dona la vede al de là de l’aparensa! Eco alora spiegà come mai l’è facile védar copie sconpagnà de omeni, che a l’aparensa no’ i gà nissuna atrativa, con done bele e tanto più giovani (vedi Pavarotti, Costanzo ecc…) mentre l’è un caso raro assè che suceda el contrario. Come giustamente l’à sentensià l’amigo Dino Durante: “I dise che l’inteligensa la val più de l’avenensa ma mi no’ ò mai visto preferir a ‘na bela fiola, magari oca, ‘na veceta piena de cultura e de çervel… el ché vol dir che val de più un par de tete de’n ragionamento filosofico”; amen!
Tuta sta paparèla par riportarve po’ a la prima considerassion; che “le done i è eterne, incalide, romantiche sognatrici”!
Qua a Verona le butèle, oltre a andar a métar fiori e leterine su la tonba de la sfortunà concitadina Giulieta, impetrando el so aiuto par catarse, tegnerse o far ritornar el moroso, par el stesso motivo le usa andar a caressarghe el peto a la bela statua de bronzo (Nereo Costantini-1969), messa nel cortìl del palasso Capuleti in via Capel, tanto che a ‘sta statua, dai e dai, gh’è deventà un sen lustro come l’oro.
Anca la piera igrometro de corso porta Borsari l’è méta de done inamorade parché basta che le ghe infila un déo in un crepo nel canton par èssar sicure de catarse el moroso entro l’ano o de scoprir se par caso quel de turno el gà fato i corni.
Ma miga solo a Verona sucede de ste robe! A Ravenna, a l’Academia de arte ravennate, gh’è la statua, opera de Tullio Lombardo, de Guidarello Guidarelli (cantà anca da D’Annunzio), cavalier de Cesare Borgia, morto nel 1501 in un’ostaria a seguito de’n duel inpegnà par el possesso de ‘na “Còta” de maia de fero. Beh, ‘sta statua l’è talmente bela che tute le done le se ghe ne inamora, tanto che a forsa de basi le l’à quasi consumà e, soratuto, le l’à fata deventar, da bianca, rosa, a furia de mostaci de rosseto. L’Academia alora la g’à messo arènte un severo guardian che, al massimo, el sèra un ocio par qualche baséto su un pié.
Anca a Napoli ò trovà ‘un pàr de statue; roba da done; una l’è ne la splendida capèla del principe Raimondo De Sangro, in via De Sanctis, dove de statue maraveiose ghe n’è, paraltro, più de una (el famoso Cristo velato del Sammartino, la “pudicizia” del Corraini ecc…) ma quela che ne interessa l’è el “disinganno” del Queirolo. Se trata de un omo tuto involtolà in ‘na rete da pesca, laorada “a vento”, cioè… destacà da la statua stessa al punto da poderghe infilar drento le mane. E l’è propio li che le done le ghe i è infila ne l’intento de “liberar” le voie de l’omo desiderà, nei so confronti. L’altra statua; calamita de noialtre, l’è quela, altretanto splendida e comovente, del sfortunà Costantino de Svevia, alogà in ‘na cesa. Anca lì: turiste co’ la machina fotografica, caresse, lagrime, sospiri e via cusì!
Ma la storia più singolare l’è quela che gà riferimento a un giornalista republican, parigin; tale Victor Noir, copà a rivoltelade da Pierre Napoleon Bonaparte, neodo de Napoleon, al qual, in veste de padrin, l’èra andà a portar ‘na sfida de duel,el 10 de genar del 1870.
21 ani dopo, grassie a ‘na sotoscrission popolare, ‘sto “colega” vintiduène, l’è stà traslà nel cimitero de Père Lachaise co’su la tonba ‘na splendida statua, opera de Jules Dalou; statua de’n verismo inpressionante. Le done, alora, le à tacà a andarla a basar su la boca, convinte che, grassie a ‘sta operassion, co’ la zonta de la deposissión de’n fior drento al cilidro, che l’artista el gà messo, rugolà ai pié, le g’avarìa avù ‘na domanda de matrimonio entro un ano. El scritor Corrado Augias che de recente l’à contà ‘sta storia nel volume “I segreti de Parigi” (Mondadori editrice) el ne fà saver, paraltro, che el bronzo (causa sfregamento) miga l’è deventà color oro solo su la boca; l’è lustro anca soto la pansa e su le ponte dei pié “circostansa che par èssar spiegà la richiedarìa ‘na ipotesi de tipo acrobatico che l’è meio no’ solevar” (C.A.)
Ma tornando a le robe de casa nostra; anca el posso che se cata nel cortil d’onor del castel scaligero de Soave e gà ‘na storia: “Se dù i se impromete amor eterno e sincero sora ‘sto posso, pol capitar che drento al secio vegna-su da l’aqua un anel con un gran smeraldo splendente; un anel che Elena Pigozzo, dama de corte de Imperatrice de Svevia, la g’avéa butà dentro quando el so amor, Costantino dei Nogarola, che’l ghe l’avéa donà come pegno eterno, l’èra morto, lassandola sola”.
Naturalmente, ci vol aferarlo sensa averghe la condission necessaria de ‘n amor fedele e sincero, inveçe de l’anel el se cata in man solo ‘na foia morta.
Oviamente, le butele dei dintorni, ‘péna le se cata quel giusto, l’è gà ‘na pressia cagna de portarlo a spingolarse su la véra.
Anca mi, ai me tempi, gò menà el moroso ma, pur essendoghe da parte mia tuto quel che ghe voleva de anèi no’ ghe n’ò visti mai. Me consolo pensando che gnanca a le me amighe la gh’è andà mèio e a nissun altra dona, dal 1300 ai gioni nostri; se vede che ‘st’altri, in quanto a fedeltà e sincerità i è pitosto scarsòti!
Beh, sicuramente de storie come quele che v’ò contà ghe n’è tante altre, nel Veneto, in Italia e nel mondo; parché no’ fàrghele saver ai letori de “Quatro ciacoe”?
Spetemo le vostre segnalassioni.
Wanda Girardi Castellani
