L’Angolo de la Wanda – Dicembre bis 1996 – “CI DAL LOTO SPETA SOCORSO…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“CI DAL LOTO SPETA SOCORSO…”

“El mostra le ciape come l’orso!”. Cusì, alincirca, se concludéa el vecio proverbio; sentensa de me mama verso ci se acaniva a zugar al loto magnandoseghe drio, el più de le òlte sensa costruto, anca le braghe.
E qua rispolvaro mi l’argomento “loto”, za tratà tenpo fa da la me amiga Lucia, tanto par zontarghe qualcosa, visto che, a quanto me risulta, i è ancora in tanti a interessarsene.
De solito a “dar i numari boni” i era i morti de fameja, in sogno opura se i ricavava da disgrassie, deliti e cataclismi, in base a’na tradission che se perde nei meandri dei secoli più scuri, cusiché: insognarse de basar un morto faséa “11”, pestar ‘na caca faséa “8”, védar la Madona faséa “77”, la croçe faséa “83”, el prete faséa “24”, un soldà faséa “10”, schei “62”, ‘na crapa da morto “35”, un teramoto “69”, ‘n’inondassion “61”, un delito “62” e via discorendo.
Quando in çità o in paese sucedéa qualcosa de straordinario, davanti ai boteghini del loto se faséa la brìgola ma mi, a memoria mia, no’ ò mai sentì de qualchedun che se sia fato sior.
In conpenso ò sentì de tanti che i s’à indebità fin a le rece insistendo su ‘na qualche quaterna fin ridurse a portar le strasse al monte.
Come tuti i zughi de ‘sto mondo, anca el loto el gà ‘na so storia che la scominçia nel 1500.
A Genova, çità andove che i schei i è particolarmente importanti, in ocasion de la sèlta semestral de 5 membri dei “Serenissimi Colegi de la Camara e del Senato” se usava far de le scomesse. I çinque nomi destinadi i vegnéa serà in t’un bussoloto con quei che i costituiva i 1200 candidadi. Col tempo i nomi i s’à ridoti a 90 e dato che’l bussoloto (o urna) el se ciamava “seminario” el zugo de scomessa sui nomi estrati l’èra dito “el zugo del seminario”. La Repubblica genovese, da prinçipio contraria a ‘sta scomessa de schei, l’à finì (vedéndoghene el tornaconto) col acetarla, tanto che nel 1644 la l’à fata sua afidandoghela a dei apaltadori autorisadi che i g’avéa l’obligo de versarghe un tanto su ogni zugada. El zugo l’à po’ ciapà el nome de “zugo del loto” difondendose in Piemonte, a Venessia, nel stato Pontificio e a Napoli che , za da alora, la ghe n’è deventà la patria. Nel’urna, però, inveçe dei nomi dei candidadi a la camara s’à scominçià a mètarghe quei de butele poarete e virtuose (un genere oramai estinto, almanco parvia de la seconda condission); le 5 favoride le se guadagnava ‘na dota!
Clemente Xll, pò’, l’à volù che, oltre che la dota a le butele estrate, ghe vegnesse dà un premio anca ai zugadori, stabilendo par primo le combinassioni: ambo, terno e quaterna. Ma nei altri stati italiani gh’èra manco mànega larga e miga i nomi de 90 butele poarete vegnéa imbussolà, ma semplicemente 90 numari e quindi i premi i vegnèa pò’ spartidi solo fra i zugadori.
Ala vigilia del 1870 el loto, deventà zugo a scopo de lucro, l’avéa za conquistà tuta l’Italia, manco la Sardegna ma quando la nassion la s’à unida, anca i sardi i s’à lassà conquistar. A ‘stó punto el zugo del loto no’ l’è stà più fato par l’interesse de questo o de quel ma solo del Stato ‘talian.
Ancò le regioni che magiormente ghe dà incremento ai boteghini (‘dèsso par la magior parte sparidi a favor de le tabacherie) i è, ancora, naturalmente, la Campania, pò’ la Liguria e el Lazio. Pensè che a l’inissio dei ani “30” za el gètito del loto l’èra intorno al meso miliardo con vinçite pari a 260.000.000, (e parlemo de tenpi quando la machina dei gerarchi, la “Balilla”, costava sui 5000 franchi). Gh’è proprio da dir che el loto, malgrado le varie rife, loterie e i “grata e vinçi” (l’ultimo grido in fato de busarade), el resta la magior fonte a la qual el Stato ‘talian el pol ancora beararse! Infondo, a vardar ben, ‘na puntà de 5/10 carte da mile par alimentar un sogno de la durà de qualche giorno no’ l’è po’ tanto!
Atenti però che se la vinçita la supera ‘na çerta cifra, al posto dei schei ris-cè che’l Governo (al “can” come che l’è) el ve daga un qualche tòco de tera sperso ne le strèpole e bon si e no par le cavre… cusì inveçe del benessere sognado ve catè a la fin-fine ‘na rogna in più sora un magasin de nove tasse.
Beh, tanto parché sì voialtri, ècove un pochi de nùmari da ris-ciar (prossimamente ve insegnarò le càbale):
Padova l’è “5” – Verona, “37” – Venessia, “81”- Rovigo fa “72”- Treviso fa “35” e Vicensa “67”. Pò’, Mario fa “43”, Vitorio “37”, Francesco “39”, Andrea, “13”, Lucillo fa “44”, Adriano “54”, (cusì ò sistemà tuta la redassion!).
Giornal fa “30” e giornalisti “50”, poeta “26”, corni fa 28″, schei “46” e miseria “43”. Politici “59”, Governo “22”, coparli tuti… “82” !

Wanda Girardi Castellani