L’Angolo de la Wanda – Novembre 1996 – “El novo museo de Bolca”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“El novo museo de Bolca”.

Nel numaro 2 de “Q.C.” – Ano X 1992 (Ndr), con el titolo “Bolca, quatro passi ne l’Eocene” ò parlà de la famosa “pessara” e de la fameja Cerato che in oltre du secoli de laoro l’à cavà da la piera viva oltre 100.000 esenplari de fossili da ‘n atòlo coralin de 50 milioni de ani fa.
Spiegarve tuto da novo, forsi no’ l’è el caso, ma ci gavesse voja de saverghene qualcosa de più, basta che ‘l vaga a rispolvararse el numaro che go dito.
Quel che interessa’ desso saver l’è che, sto ano, 1996, el 28 de lujo, è stà inaugurà, senpre a Bolca, el novo museo; ‘na bela e original costrussion che, come ‘na pressiosa capa, l’à serà ne le so luminose valve ‘na colession de pessi, piante e vari altri fossili, unica al mondo.
Par ci riva in machina, no’ gh’è problema de parchegio; la “quatrorude” se pol metarla al sicuro nel piassal del museo dove gh’è anca tole e banchete par ‘n’eventual ristoro al saco.
El bilieto d’ingresso el costa: 7000 (setemila) franchi, par i adulti, 5000 par i buteleti da i 7 ai 14 ani e 4000 par le scolaresche.
L’orario de ingresso: da novenbre a febrar – da le 10 a le 12 e da le 14 a le 17. Mentre da marso a otobre: da le 9 a le 13 e da le 14 a le 18,30. Par ci volesse po’ fermarse a pranso o a sena, Bolca l’è ben servì… e gnanca qua no’ gh’è problemi. La fameja Cerato l’à anca acostà al museo un bar tuto imerso nel verde. Apena dentro el museo, gh’ è’ na sala grandissima a scopo essensialmente didatico dove paraltro za se poI amirar diverse varietà de pessi e conchilie, po’ se passa in ‘n’altra sala piena de esenplari splendidi e rarissimi come el “rajifonnes desyatidae” e el “chondrichthyes” che l’è po’ un avo lontan del cocodril. Un altro esenplar da restarghe davanti a boca verta l’è el “platinx macropterus”… nomi che ingropa la lengua ma che, in conpenso, i fa riferimento a maraveje da far lustrar i oci.
Traverso ‘na scala (ma par ci g’à le ganbe falòpe gh’è anca l’assensor) se acede al salon superior dove se cata i reperti più bei come el famoso “pesse farfala”. Tra canpioni de fauna costiera de aque salmastre; ‘na vetrina de splendidi corài e po’: palme altissime che le dà l’inpression de poder ancora ondular le grandi foje a le caresse del vento. Un grande cocodril e po’ e po’… convien che andè a vedar tuto diretamente par conto vostro!
Par ci voI portarse drio un ricordo, gh’è anca la possibilità de poder cronprar qualche pesseto o qualche conchilieta fossile a pressi più che acessìbili (5/10.000 franchi).
EI sig. Cerato, sinpaticissimo e disponìbile, l’è senpre lì, pronto nel so museo a dar spiegassioni a ci ghe le dimanda, con ‘na didatica talmente bela che se starìa a scoltarlo par ore.
Par eventuali prenotassioni par grupi o scolaresche, rivolgerse a Massimiliano Cerato – 37030 Bolca di Vestenanova (Verona) tel. 045-6565111.

Wanda Girardi Castellani