L’Angolo de la Wanda – Settembre ter 1996 – “Nel centenario de la “prima de la Bohème” Puccini, re dei romantici a Verona”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

Nel centenario de la “prima de la Bohème” Puccini, re dei romantici a Verona.

Me sucede de spesso che qualche ospite, ‘na òlta entrà nel me saloto, (tanto, ma tanto danunsian) ‘viçinandosse a ‘na foto incornisà de argento, lì, in bela mostra, el me dimanda ci l’è mai quel bel’omo de altri tenpi, da l’aria un poco “assassina” con tanto de mostàci e sigareta in man. Ma, come? L’è el Maestro Giacomo Puccini! Gh’è parfìn el so autografo.
Mi, de ‘sto autor, el più romantico dei operisti; ‘n altro de i me amori… miga, paraltro, “segreti”, sò propio tuto, tanto più che noialtri veronesi, a l’80% patìdi de la lirica, ghe l’emo in predilession.
La prima rapresentassion pucciniana, a Verona; “Le Villi”, nel 1890 al Filarmonico, con el tenor Beduschi, el basso Broglio e la soprano Zilli, l’è passà-via inombrà da la morte del Duca d’Aosta.
Pa’ ritrovar el Maestro, s’à dovù rivar po’ al 1893/94 quando, senpre al bel teatro veronese, è andà in sèna la “Manon”, fresca-fresca de conposission e a tre sole setimane dal debuto al Regio de Torin ‘ndó l’avéa mandà el publico in visibìlio.
A l’inaugurassion de ‘sto secolo, nel 1900, sempre al Filarmonico è ‘ndà po’ in sèna la “Tosca” e anca qua la nostra l’è stà tra le prime çità d’Italia a rapresentar el truculento drama de Sardou incoronà da ‘na musica tra le più bele de la storia. In ocasion de l’avenimento Puccini, splendido omo oltre che magico conposidor, festeggià meio de’n Re l’è stado presente in sala e le cronache le riporta, a longhi e fondi colpi de péna, l’entusiasmo, specialmente quel de le done.
Tri ani prima, paraltro, anca el Teatro Novo l’avéa aclamà, pien fin ai lanpadari, un’altra opera de Puccini, forsi la più bela: “Boheme” mentre l’è del 1913 la premiere veronese, al Filarmonico, de “La fanciulla del West”.
Ma la grande guera l’à portà anca ne l’arte ‘na pausa forsada. Verona, martorià da le bonbe, stipà de eserciti e cariagi militari, col fronte praticamente a le porte, l’à dovù spetar che se finisse la buriana ma nel 1918… èco che “La Rondine”, nel cel tornà “sicuro” l’è volà subito sóra al “Novo” a farghe girar la testa a ‘n publico da grandi ocasioni.
Nel 1920, po’, èco ‘na memorabile ripresa de “Manon” al teatro più antico de Verona con el grande Aureliano Pertile e Giuseppina Baldassari-Tedeschi.
Nel 1923 va ancora in sèna “La fanciulla del West” e 3 ani dopo, la dolçe Butterfly, senpre al Filarmonico, la serà tragicamente la so storia d’amor tra l’ondesar de çentenara de fassoleti strucadi in man a sofegar sangiòti.
Altri sucessi i è seguì in altri teatri veronesi (tra i quài el Ristori andà in malora dopo l’ultima guera) fino al 1928 quando, dopo la morte del Maestro, l’ultimo capolavoro; la “Turandot”, la bela rosaria de Carlo Gozzi, in parte “concitadina, in quanto a métarghe le man, almanco al libreto (in colaborassion con Giuseppe Adami) gh’è stà el nostran Renato Simoni, l’è finalmente aprodà a l’Arena reduce dal sucesso scaligero, soto la diression de Toscanini.
Nel 1937, ancora la Butterfly l’è stà l’ultima a darghe l’adio al nostro Filarmonico poco prima che ‘l finisse in un bruiel (falò)!
Le opere pucciniane più rapresentà a Verona i è sempre stà la “Boheme”, la “Tosca”, la “Manon” la “Butterfly” e la “Turandot” e a cimentarse nei ruoli relativi gh’emo avù la Rosa Raisa, Giovanni Malipiero, Gina Cigna, Magda Olivero, Giacomo Lauri Volpi, la Dalla Rizza, la Favero, la superba Maria Callas ai so esordi, Renata Tebaldi, Maria Caniglia, Antenore Reali, Nicola Rossi Lemeni, Giuseppe di Stefano, Mario Filippeschi, Beniamino Gigli, Franco Corelli, Tito Gobbi, Bastianini, la Carteri, el grande del Monaco ecc… e, soratuti, el nostro indimenticabile Giuseppe Lugo; splendido Cavaradossi, Calaf e Rodolfo, specialmente ne le stajon a metà dei ani ’30.
Dopo la pausa par la seconda guera mondiale ritrovemo el grande Maestro lucchese con la “Turandot”, nel 1948, con la Callas e Rossi Lemeni. Da quel momento le stajon pucciniane i è andà, de ano in ano, col vento in pópa sensa che mai se verificasse un momento de “berba”.
Gh’è da zontar che anca el nostro Giovanni Zenatello, “l’inventor” nel 1913 de l’Arena come cuna e trono del teatro lirico, l’è stà uno tra i grandi interpreti pucciniani, ottimo specialmente ne la parte de Pinkerton in “Madama Butterfly”, al fianco de ‘n’altra splendida interprete; la Rosina Storchio.
Che altro dirve ?
Quando la sera, con insacà nel fianco la me cagneta Picia, me stravaco su la scassadissima ma comoda poltrona a vardar la TV o a lésar un qualche libro, el “Maestro”, da la so soasa d’argento pàr che’l me vàrda de straforo, con quela so aria un fiantin lasarona e mi, che in fato de fantasia no’ son de çerto in càlo, me pàr anca che’l me parla. Sento parfìn, tra le arie splendide de le so opere… che le me piase tute, el legero parfumo de quela sigareta, streta tra i déi de la drita e pontada a frecia su la firma elegante, sbiessa e sotolinià: GIACOMO PUCCINI.

Wanda Girardi Castellani