L’Angolo de la Wanda – Settembre bis 1996 – VERONA TRA ARTE E STORIA: “La Porta de la Bra l’orolojo «no’-gà-l’ora»”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

VERONA TRA ARTE E STORIA: “La Porta de la Bra l’orolojo «no’-gà-l’ora»”.

‘Sto orolojo el ghe fa corona a la Porta de la Bra, costruida probabilmente tra el XV e el XVI secolo. I du volti, adesso vèrti, i era in prinçipio fornidi de ante, tanto che ancora se ghe ne poI vedar i càncani (cardini). Soto al grande orolojo el 26 setenbre 1938, dal podio ‘positamente alestì, el Duce in visita uficial l’à assisti a la sfilada de le camise nere sul corso Porta Nova.
Ma, prima de tuto, me par giusto ricordar che propio da la Porta de la Bra è passà a cavaI, a spron batù, Romeo, verso l’esilio de Mantoa, come che testimonia la targa murà a la destra (da la parte de la piassa) con i versi del grande poeta inglese che, se no’ l’è vera che la storia el se l’à inventà lu (come che i à scrito su l’Arena, tenpo fa) ma el vesentin Luigi Da Porto. Bisogna paraltro darghe ato che se ghe ne deve a lu la notorietà mondial.
Ma tornando a l’orolojo, l’autor l’è stà un certo Antonio Nogarola che el ghe l’à regalà al Comune, inaugurandolo el 2 giugno 1872.
No’ l’era mai giusto, quindi al tenpo è fiorì in merito un saco de barselete e moti de spirito. Tanto par scominçiar i soliti veronesi “tuti mati” i l’à batesà “l’orolojo No’-gà-l’ora” storpiando el nome del poro artesan (Nogarola), Nel 1879, po’ un altro orolojar, tale Montemezzi da Vigasio, el gà modificà i ingranagi e da alora l’è senpre ‘ndà ben.
La Porta de la Bra, traverso un passajo ornà de merli a la ghibelina, la unisse el corpo de la Gran Guardia al palasso, sede del Museo Lapidario Maffeiano e de l’Ente Autonomo Arena de Verona.

Wanda Girardi Castellani