L’Angolo de la Wanda – Settembre 1996 – “EL PISANELLO… pitor da le sete virtù”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“EL PISANELLO… pitor da le sete virtù”

Gran apuntamento a Verona; museo de Castelvecio
dal 7 setenbre a l’8 dicenbre 1996, par la mostra
de le opere de Antonio Pisano deto “el Pisanello”

La mostra, fruto de ‘na preparassión durà tri ani, che dal 6 magio al 5 de agosto la costituirà el piato forte del celebre museo parigino del Louvre co’ l’esposission de 320 opere, tra le quali 200 disegni, la se trasferirà dal 7 de setenbre p.v. a Verona, arichida da diversi altri capolavori che sarà possibile amirar solo qua, in sala Boggian.
Oltre ai disegni podaremo amirar piture, afreschi, medaie, sculture e oreficerie, vegnù in presto da diesine de colession spanpanàde par tuto el mondo.
A curar le mostre, par Parigi l’è stà Dominique Cordellier del Louvre e par Verona la nostra brava e instancabile Prof. Paola Marini, diretrice de la pinacoteca e musei de Castelvecio.
El scopo de sta interessante inissiativa l’è quel de far conóssar, specie a le nove generassion, l’atività veronese de uno tra i più grandi interpreti de l’arte figurativa tra el gotico e el rinassimento.
Naturalmente, el “sùcaro su le fraghe” de l’esposission veronese el sarà el splendido afresco de la cesa de santa Anastasia; “san Giorgio e la principessa Trebisonda”, contornà da oltre 60 disegni de preparassion a l’opera.
Par ‘sto avenimento, assolutamente da no’ pèrdar, le poste italiane le emeterà un francobol dedicato al Pisanello; un boconçin de lusso par i filatelici!
Del Pisanello, oltre al fato che l’è stà uno tra i più grandi artisti italiani, no’ l’è che se sapia massa! L’è nato verso el 1380/95 a Pisa e a l’inissio del 1400 l’è stà a Verona dove che l’à lavorà, tornando de continuo, tra un viajo e l’altro ne le diverse corti d’Europa, fin al 1438. Tra le so opere godibili ne la me çità, oltre a l’afresco de santa Anastasia (1437-38), la Madona de la quaglia, (in Castelvecio) L’anunciassion (in S. Fermo Magg.).
La maggior parte de le opere esposte al Louvre, oviamente i è stà fruto del sistematico spòio del nostro patrimonio artistico da parte del giovane general Napoleon, dosènto ani fa, durante la canpagna d’Italia. Par gnente se usava dir: “Miga tuti i francesi i è ladri… ma “Bonaparte” si!” L’unica consolassion l’è che almanco, propio da ‘ste parte, a Rivoli, l’è sbrissià meténdo poco marsialmente el dedrio in aqua!
Paraltro, a quei tenpi i gà c…à anca la spada a Cangrande e forsi anca l’anèl (pararìa con el déo e tuto) e questo propio, mi, no’ ghe lo pardono!
Qualcosa po’ è tornà a casa… ma poco-pocheto! E questo val anca par el nostro Antonio Pisano, déto “El Pisanello” el cui ritrato, de profil, con tanto de bareton che’l par da cógo, scolpì su ‘na medaja, se podarà anca amirar tra le splendide opere esposte.
Guai mancar a l’apuntamento!

Par altre informassioni:
Museo de Castelvecio. tel. 045 8005817-
orario: 08,00 – 18,45 – chiusura al lunedì.

Wanda Girardi Castellani