L’Angolo de la Wanda – Luglio ter 1996 – “San Lorenso… una de le più romantiche cèse veronesi”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“San Lorenso… una de le più romantiche cèse veronesi”

Dopo averghe dà ‘na sfregoladina a la piera igròmetro de la cesa de San Giovanni in Foro e dopo aver passà la porta “dei Borsari”, o “de Giove”, se infila el corso Cavour che, da ‘sta porta el va, drito sbarà, fin a Castelvecio lassàndosse a la destra l’arco de i Gavi, interessantissimo e del qual parlaremo in seguito.
El Corso I’è uno tra i più bei de Verona, sior de palassi splendidi de storia e de ornamenti (vedi: palasso Canossa, residensa de la Santa Madalena). De Cese, ‘nvesse, ghe n’è do: quela dei SS. Apostoli (in piazza SS. Apostoli, sul lato sinistro) e quela de San Lorenso, a destra.
Se ritien che la sia stà edificada sora un tenpio dedicado a Venere, in seguito al decreto de Costantino del 325 che vietava i culti pagani. Ma se ga da ‘rivar a ‘l 18° secolo par ‘verghe notissie sicure. Se sà che la ricostrussion (dopo el teramoto) de ‘sta splendida cesa l’è stà fata da Pacifico senonche nel 1117 g’à pensà un più grave sisma a darghe ‘n’altra disastrosa scòpola!
La ricostrussion atual l’è de l’ing. Da Lisca.
La fassada, ornà da du grossi torioni, serà e sacrificà in èpoche sucessive da altre costrussioni, ‘desso l’è finalmente godibile, almanco passando da l’interno. Belissimo el giardineto che circonda el tuto, dove se po’ consumar el boton de la machina fotografica davanti a le antiche colonete, al romantico posso ecc…
Se entra nel tenpio da l’ingresso lateral (i turisti i paga un modesto bilieto), ‘pena drento I’arco sormontà da la statua de Lorenso, a la qual, ani fa un fulmine g’à destacà la gradela e la palma, in fero batù; sinboli del martirio del Santo (ogeti ritiradi da la Sovrintendensa e mai più tornà, come tante altre robe e ogeti antichi e bei lampioni, forse finì a darghe lustro a la vila faraonica de qualche pessecan de la polìtica). La basilica l’è a tre navade con traseto. Sòra e longo i fianchi, core i “matronei”, da dove le done anticamente le assisteva a la messa. Gh’è da dir, purtropo, che un altar baroco el rovina un pocheto el magico efeto e la severità del conplesso.
San Lorenso, in Corso Cavour, la resta comunque una tra le più romantiche cese de Verona, andove l’è facile sognar a oci verti ‘na vèsta bianca tra i fiori de naransa, arente a “l’ideal”.

Wanda Girardi Castellani