L’Angolo de la Wanda – Luglio bis 1996 – “Quando i “Indiani” i à cavalcà in ‘Rena”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Quando i “Indiani” i à cavalcà in ‘Rena”

El me primo incontro con William Frederick Cody, meio conossù con el soranome de Bufalo Bill (“Guglielmo, el buffalo”, secondo l’alora cronista de l’Arena, Cap. Emilio Salgari) l’è stà nei raconti de me nono, Emilio Girardi che, a l’epoca de l’esibission nel nostro anfiteatro del circo del colonelo Cody, nel 1890, el g’avéa 9 anni. La so fameia no’ l’avéa podudo pagar el bilieto d’ingresso che’l costava ben un franco, pur el s’èra portà fin ala morte el ricordo de ‘n incontro con i pitoreschi cow-boys e i “indiani pelle-rossa” che, tra el 3 e il 17 de april i avea scorassà, su e zo  par el Liston de la Bra tra la curiosità, condì da un fià de malfidensa, dei vero­nesi.
Verso la fine del 1940, po’, ò ritrovà quei legendari perso­nagi tra le pagine de “La sovrana del Campo D’Oro”; uno tra i più fassinosi tra i volumi del me concitadin Salgari.

Bufalo-Bill (1846-1917), dunque, reduce dai sucessi de Londra, Parigi, Napoli, Roma, Bologna e Milan, anuncià da ‘na carga de propaganda e precedù da la fama del so corajo e de le so aventure, l’èra sbarcà a le 8 de matina del 14 april a la stassion de Porta Nova tra ‘na marea de gente lì da ore a ‘spetarlo (ma zà altro personal e altro material l’èra rivà da ‘na diesina de giorni). Drio ai primi i à po’ scaricà diversi altri cari de material e bestie e un çerto numaro de carosse con i “primi atori”: cow-boys, vaqueros messicani, peoni e indiani Sioux, Arrapahoes, Brulè, Piedi Neri, Cheyennes, Piedi Bruciati, Apaches  e in testa i capi: Camicia-rossa, Orso de le Ròce, Cuore Nero, Corno D’Aquila, Collo Basso, Piccolo Capo, Orso Duro e el neodo de Mano Gialla; un pelle-rossa copà da Cody in un famoso conbatimento corpo a corpo a la fine del qual el “vincitore” (Cody) el s’èra aproprià del scalpo del vinto. Dai manifesti e da le locandine publicitarie s’à podù saver che la Compagnia la se componeva de 100 indiani, 100 tiradori, caciatori, cavalerissi ecc… 200 bestie (bufali, muli ecc…).
Dai cari bestiame è vegnù zó anca un çente­nar de cavai (i legendari mustangs… paraltro batudi sensa tanta fadiga dai nostri buteri maremani) oltre a la famosa diligensa “Deadwood”, teatro de un brol de spaentosi assalti ognun dei quai g’avéa assà el so segno, più o manco disa­stroso.
Verona l’èra da mesi tirà come ‘na sfiondra, ne l’atesa de ‘sto avenimento. Tuti, grassie ai giornài, i savéa de quel che Bufalo Bill l’avea fato con Custer e l’epico “Setimo Cavalegeri” da l’ecidio del qual l’èra riussì  fortunosamente a “sfetar” .
De quela sanguinosa, memorabile batalia è restà inpressa in una dele pagine più nere dela storia americana la morte de Custer par man del capo sioux Sitting Bull che inoltre, secondo l’usansa, dopo averlo copà el ghe n’aveva pure magnado el cor.
Tuti, tra le altre, i savéa dei 5000 bufali che da solo el “colonel” l’avéa abatù par procurarghe la carne ai operai afamadi, impegnà ne la costrussion de la ferovia Kansas-Pacifico. Deputato a la legisladura del Nebraska, inbatibile pistolero, cassador e ‘dèsso anca ator, l’à riunì 118 ani fa, sui scalini de la ‘Rena, in do rapresentassion (scominçiade a le 14,30) del so circo e malgrado el tempo senpre lì-lì a minaciar sece roèrse, più de diesemila spetatori con l’incasso, par quei tenpi “favoloso”, de £.15.000.
A far el paragon co’ le cifre e soratuto co’ le presense atuali che durante la stagion lirica, le pol rivar a 30.000 par sera, vien da dir: “Roba da rìdar!” Ma pensève che alora in ‘Réna no’ gh’èra praticamente foresti. In conpenso, grassie a un treno speciale organisà da la “società del tram” a pressi popola­rissimi, i nostri i s’avéa mosso parfìn da Cologna Veneta, Cal­diero, Lonigo, San Bonifacio, Soave, Vago, Illasi, Tregnago ecc…
Al spetacolo avéa partecipà, oltre che come cronista del giornal principale anca come protagonista, Emilio Salgari, andàndose a inbusar ne la scassadissima diligensa inseguì dai indiani.
Splendido e insolito spetacolo: rodèi, conbatimenti, gare de tiro; co’ le pistole, co’ i fusili, co’ le frece. Corse sfrenade intorno a la pista, dimostrassioni di varie abilità, specie da parte de ‘na “pistolera”; “la regina del rifle”, Miss Anne Oakley, e de’n cow-boy, Johnnie Baker, “re del Winchester”.
Applauditissima anca la cacia ai bisonti! El spetacolo l’è finì co’ ‘na fantasia a la qual à partecipà tuto el circo in un entusiasmante carosèl. I bilieti d’ingresso i costava: £ 3, quei de prima, £ 2, quei de seconda, e £ 1, i popolari.
Durante la permanensa a Verona de la troupe de Bufalo Bill gh’è stà anca un episodio divertente: a S. Piero Incarnario i stava laorando drio a un palasso, soto la diression de l’ing. Galli.
Verso le 16, scavando par le fondamenta, i operai i à catà una de le galerie romane che, partendo da la ‘Rena, le finisse a l’Adese. L’ingegner l’à subito fato coèrsar co’ la tera l’inbóco, seguitando pò’ i so laori. Dopo un quarto d’ora i à però sentì bàtar e subito dopo i à visto cascar un muro. Da lì è spuntà-fora tri cow- boys con tanto de capelon. Figureve la sor­presa! I tri americani, co’ ‘na lanternina, a gato-gnào, trovà ‘n ingresso a la galeria, in ‘Rena, i se gh’èra aventurà sensa gnanca saver se i sarìa podù vegnérghene fora. Par so fortuna i èra sbucadi a casa Da Lisca; savìo che colpo se, magari un par de secoli dopo, fusse spuntà da le “vestigia romane” i misteriosi reperti de tre crape da morto ornà da’n  capel da cow-boy?
In quei giorni Bufalo Bill el g’à avudo modo de conòssar e assùmar nel so circo un curioso personagio; el Fraca, un “omo forsudo” che, sempre vestì de ‘na maieta a righe tipo “Ape Maja” con pontà sora un garofolo fresco, personal giornalier omagio de’n fiorista veronese, el se esibiva ne le piasse tirando do móle de fero, sbregando massi de vece carte ecc…  Ani dopo, tornà a Verona dopo ‘na longa tournèe in giro par el mondo, el Fraca l’à riportà ne le piasse el so vecio spetacolo vantando de èssarse esibido davanti al Zar de la Russia. Naturalmente noialtri buteleti ghe faséimo in coro “buuuuuu!!” e lu el se rabiava parché davanti al Zar el gh’èra stà sul serio in compagnia dei cow boj e i pellerossa del circo del grande Cody.
Ma tornando al “colonel”; finì el contrato con la ‘Réna , smantelà l’acanpamento del “Canpon” e bandonà le stanse a la “Colomba d’oro” de via Oberdan, ricaricadi i vagoni  l’è ripartido ‘sta volta da la stassion de porta Vescovo, par continuar la so tournèe.

Beh, ‘sta cronacheta del 1890 firmà dal “papà de Sandokan”; el capitano Emilio Salgari su incarico del giornal “L’Arena”, ghe la dedico soratuto ai picoli letori de “Q.C.” che, pur se nati nel domila sicuramete i conosse e i ama “Pa-he-has-ka” (cavéi longhi, ne la lengua Cheyennes), overo el Colonel William Cody; “Bufalo Bill”… tanto che anca st’ano a la sfilada de le mascare al vénardi gnocolar se ghe n’à visto ancora tanti (anca me neodo Alessandro) vestìdi de fustagno maron co’ le franse, in testa la bareta de pèl de opossun con tanto de coa e su la spala el storico Winchester… naturalmente a stròpolo!

Wanda Girardi Castellani