L’Angolo de la Wanda – Giugno 1996 – EL COLOR DE VERONA – “El volto barbaro”

…a cura di Graziano M. Cobelli

gcobelli05@gmail.com

Quatro Ciàcoe: da Verona

EL COLOR DE VERONA – “El volto barbaro”

La più bela tra le poesie del nostro Berto Barbarani I’è sens’altro “Voria cantar Verona”; el prologo del poemeto “Giulieta e Romeo”. Uno de i versi par proprio che ‘l descriva el drama che el 26 de otobre 1277 s’à consumà in un pitoresco, antichissimo volto tuto cuerto che, da piassa de le Erbe, traversando via Mazzanti dove se poI amirar el nostro più bel posso e la celebre scala Mazzanti, el sboca ne la piassa Dante o “Dei Signori”, el saloto bon de la çità.
“… èco, vorìa castigar la çità de quela gente! che par odio o passion de signoria! senpre in barufa  par ‘n afar de gnente! drio i pilastri de i porteghi! nei vicoli sconti al fumo de le tòrse a vento / sempre su quela de sfidar pericoli! a tri, a quatro, a compagnie de çento / i se spetava par saltarse adosso! pronti a la spada ma al cortel più pronti…
EI Volto el porta el nome de Zaccana Barbaro, capitanio veneto e no ‘l ga quindi relassion con el barbaro assassinio de Mastino 1° de la Scala e de l so amigo Antonio Nogarola avegnudo lì… soto, come ricorda la targa murada da la parte de via Mazzanti.
La causa scadenante de ‘sto delito par che la sia stà el rifiuto de Mastino 1° a giustissiar un giovanoto dela so corte che ‘l g’avea usà violensa a ‘na butela de la casa dei Pigozzo; altra potente fameja veronese, çercando inveçe de conbinar un matrimonio “riparador” non acetà da i parenti de l’ofesa.
Ancora’ desso, passando soto quele travi infumegà e carolade; se g’a l’inpression che l’tempo el  se sia fermà a quela note scura e freda de ‘n tardo autuno distante, lassando par senpre i muri inbombegà del s-ciocar de le spade,de i sighi de aiuto le inprecasslonì, i tònfì de i corpi sora le piere, l’udor del sangue.
E senpre i torna a riafiorar a la mente, in quela tetra atmosfera, i versi del Poeta”… i se spetava par saltarse ‘dosso…!”
Ancò su l Volto Barbaro se afacia le vetrine de ‘na botega de cineserie ma da un verbal de stima del 23 genar 1619 se vien a saver chei Mazzanti i g’aveva propio lì, al tenpo, ben 8 boteghe afità a marcantini, orefici e parfin a ‘n vendidor de Malvasia.
Comunque… anca se no’ l’è più l’epoca de “le spade e i cortèi più pronti”, quando gh’è  scuro, par el volto Barbaro, no’ l’è tanto igienico passarghe gnanca ‘desso.

Wanda Girardi Castellani