L’Angolo de la Wanda – Agosto 1999 – “LA SESTA EDISSION DEL PREMIO “GIUSEPPE LUGO” AL TENOR GIUSEPPE GIACOMINI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“LA SESTA EDISSION DEL PREMIO “GIUSEPPE LUGO” AL TENOR GIUSEPPE GIACOMINI”

‘Stó ano scade el çentenario da la nassita del tenór veronese G. Lugo par onoràr el quàl el 24 lùio 1994 è stado istituì a Custoza el prestigioso premio dedicado ai tenori che magiormente i à contribuì a difóndar nel mondo l’opera lirica, con particolar riferimento a quela italiana.
Nel quadro dele manifestassioni, el 27 lùio avemo inaugurà una mostra de foto, costumi e cimeli de Lugo, a villa Venier de Somacampagna (Vr) e el 28 lùio, a Villa Vento (Custoza) un concerto in so onor.
El Comitato, pò’, l’à deciso ‘stó ano de consegnar el premio, precedentemente oferto ai tenori: Placido Domingo, Josè Carreras, Franco Corelli, Giuseppe di Stefano e Carlo Bergonzi, al  Maestro Giuseppe Giacomini, in Arena, la sera del 11 agosto p.v.
GIUSEPPE GIACOMINI el s’à diplomà a l’Istituto Musical C. Pollini de Padova e l’à scominçià a la grande vinçendo vari inportanti concorsi internassionali.
El debuto el ghe l’à ‘vù a Vercelli nel 1967 ne la “Butterfly” de Puccini. Nei 33 ani de la só longa cariera artistica  l’à cantà in tuti i più famosi teatri del mondo, dal Metropolitan de New York, al Colon de Buenos Aires, al Coven Garden de Londra, a l’Operà de Parigi, a la Scala de Milan, al San Carlo de Napoli, ecc…
Nel mondo de la lirica Giuseppe Giacomini l’è conossùdo come el tenor dramatico italian, par ecelensa. La facilità, la morbidessa, e, nel ‘stesso tenpo, la potensa de emission, l’à fato particolarmente adato a parti impegnative come: Radames, Canio, Andrea Chenier, Calaf, Manrico e Otello.
A l’Arena de Verona l’à debutà nel 1978 nel Trovador de Verdi, soto la diression del Maestro Gianandrea Gavazzeni.
Nel 1980-’85-’96 l’emo aplaudì in Aida, direto da Nello Santi e Daniel Oren. Nel 1989 l’à cantà ne “La forsa del destin” de Verdi, soto la diression de Anton Guadagno e nel 1990, sempre co’ la diression de Daniel Oren, l’à rapresentà magistralmente Cavaradossi in ‘na memorabile “Tosca”.
In quei periodi areniani, l’à afiancà i soprani: Katia Ricciarelli, Maria Chiara, Linda Roark Strummer, Giovanna Casolla, e i mesosoprani Viorica Cortes, Fiorenza Cossotto, Bruna Baglioni e Dolora Zajick. Memorabili: el so Otello e el so Canio, al nostro teatro Filarmonico.
Sior de’n repertorio de ben 28 opere, l’à fato prestigiose  registrassioni e video: “Fausta” de Donizetti (1981), “La forsa del destin” al Metropolitan de New Jork (1983) e “Tosca”, sóto la diression del Maestro Muti e inoltre un maraveioso “Don Carlo” per la TV francese, a Bordeaux nel 1991.

Wanda Girardi Castellani