L’Angolo de la Wanda – Aprile 1997 –”DÒNE… GH’È QUEL CHE GUSSA!” (l’ultimo moléta)
…a cura di Graziano M. Cobelli
gcobelli05@gmail.com
![](https://www.ilcondominionews.it/wp-content/uploads/2015/02/castellani2.jpg)
Quatro Ciàcoe: da Verona
“DONE… GH’È QUEL CHE GUSSA!” (l’ultimo moléta)
(scampoli dei veci mestieri)
Almanco ‘na òlta a la setimana el so sigo l’inbónbega ancora le strade del borgo rivando fin su, al me quinto pian: “Dòneeee… gh’è el moléta! gh’è gnente da gussar?”
Po’ el se ferma in parte a la strada, sistemandose a la mancopèso tra le machine parchegià e el speta i clienti che a ocio e croçe i è senpre de manco… forsi parché tante “siore”, fornì de massa altura, al posto che dàrgheli al “moléta” le preferisse portarghe i feri a “l’arotino” de piassa de le Erbe, che fa tanto più “chic”!
El “nostro” l’è pitosto veciòto quindi, inveçe de la tradissional bicicleta, a urtar ‘vanti la botéga el g’à messo un motociclo. Però le sdinse che se ghe alsa intorno i è propio come quele de ‘na òlta e lu, el “moléta”, cusì, inluminà da ‘na nuvola de steline dorade, co’ i ociai scuri, soto el coèrto da ‘na tetòia verde che ghe fa stranbe onbrie su la facia pienòta da la sbèssola inçercolà de peli grisi, el fa vègnar in mente el Dio Vulcano indafarà ne la so mitica oficina.
L’ultimo moléta de ‘sté parti el se ciama Venturino Boninsegna e el vien da San Michel extra. Penso che’l sia anca l’ultimo de la so categoria e me dimando, dopo de lu, dove se g’avarà de ‘ndàr sbàtar la testa quando la fòrbese la scominçiarà a far “segheta” e i cortèi de casa a smorsegar inveçe che tajar!
‘Na òlta su e zo par Verona de “moléta” ghe n’èra a diesine. Casa par casa, corte par corte, paese par paese, ‘péna el consueto riciamo el risonava: “Dòneee, el moléta!”, le “vestali” casalinghe, custodi del fógo, le coreva in strada con cortèi e fòrbese e qualcheduna anca con un goto de vin. Lu el postava in tera le ganbe e la ruda, libara de girar par-aria, la vegnéa ciapà da la séngia de trasmission che passava su ‘na pulegia inestà a la fin de l’asse de la mola. Un pedal da banda… un bussolòto con el so rubineto che butava aqua; da ‘na gossa a un fil continuo, a seconda de la necessità. El serbatoio l’èra un gran bidon da conserva, lustro e colorado, andó de solito spicava, soto la marca “l’alpino” un bocia, con tanto de péna e alpenstok, inpegnà a scalar ‘na çima.
Spetando che le done le rancurasse le tampèle da farghe el fil, dopo aver messo in moto la baraca pedalando, el ne dava spetacolo a noialtri buteleti gussando qualche fòrbese o cortèl de riserva, de quei che pingolava de fianco a far vetrina e ogni tanto, tirà par le strasse, ghe scapava pura ‘na qualche eresia a l’indirisso de un tra i remenghi più grandi che i ghe cantava ‘na canson sbragà che lo invitava a gussarghe tuto ‘n altro tipo de arnese.
Po’, finì el laoro comissionà, nel consegnar el strumento tornado lustro, el ghe dava ai clienti la inmancabile racomandassion: “‘stè ‘tènti che’l taja come un fero da barba!”
Ma ve rendìo conto de quante robe, piàn a piàn (e gnanca po’ tanto a piàn) le sta andando sul granar de ‘l Papa?
Tante robe e soratuto tanto color… tanta fantasia… tanta poesia perse ne tuto ‘sto convulto corer a testa bassa e co’ i paraòci come i mussi.
Wanda Girardi Castellani