L’Angolo de la Wanda – Aprile 2000 – “Borgo Trieste”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Borgo Trieste”

Quando nel 1960 son vegnù a metar radise in borgo Trieste, le case i era poche; tuto intorno rùderi de case de campagna ‘bandonà, erba e sassi. Po’ la Mondadori, da San Nasàr I’à trasferì da ‘ste bande el stabilimento e questo l’è stà el scominçio. La Dita, avendo salvà tuti i machinari da bonbe e requisissioni, scondendoli in case e magasini, I’avèa podù, apena finì la guera, èssar za in grado de stampar la prima inportante rivista italiana; “Epoca”. L’inproviso “boom” del laoro, à fato sì che se dovesse çercar nòvi spassi e altri dipendenti. Tanti de questi i è vegnù da Ostiglia, Mantova, Modena, ecc…, assunti dal so grande conteraneo, l’indimenticabile Arnoldo, nativo, apunto, da Poggio Rusco (Mantova) e se sentìa propio la necessità, par ‘vergheli sotoman, de farli spostar a Verona e più precisamente nel neonato borgo Trieste. A ‘sto punto eco spuntar grandi complessi edilissi, i più fabricà da la Ditta stessa. Essendo, po’, anca el me Severino un impiegato de Arnoldo, in uno de questi son vegnù a starghe anca mi con I’ùltimo nato, Flavio, de pochi mesi. Ancò, el borgo l’è uno tra i più moderni e “verdi” de Verona, servì de asili, scole elementari, medie, istituti de ragioneria, ecc… Cesa, piassa e giardini. ‘Desso gh’èmo anca la nostra màscara che da du ani la sfila co’ le altre nel cortèo del vènardi gnocolar .
Nel 1998, con a la presidensa el Sior Bonato Giorgio, s’èra costituì el comitato par la creassion e conseguente elession de ‘na rapresentansa che la fusse tuta nostra, al cèlebre Carneval de Verona. Essendo el borgo ligà, par via del nome, a la bela e storica çità, n’à parso che gnente ghe fusse de mèio che elegiar “EI canpanar de san Giusto e la so mula” (butèla, in triestin), do figure simpatiche e soratuto proletarie.
EI nòvo Comitato I’à elèto sede el Bar Mappie’s Day, in via M. Della Torre n. 21/23, tacà a la piassa CavalIeri. L’inaugurassion e relativa prima partecipassion de la nostra màscara l’è ‘stà al vènardi gnocolar del 1999 e ‘st’ano, nel 2000, borgo Trieste I’à fato ‘ncora mèio. Dopo tanti ani I’èra ora che ‘sto quartier definì “Dormitorio”, el se desse ‘na scurlada, sveiàndose dal letargo e metendo al bando finalmente la malinconìa. EI sveiarin el ghe I’à dà, in rapresentansa de quel de san Giusto, el nostro canpanar, dal canpanil de la Cesa, novo de baia, che’l sbatòcia tuto el dì a “maneta” propio su la Sede del so più cèlebre “colega”.

Wanda Girardi Castellani