L’Angolo de la Wanda – Aprile 2002 – “I PONTI DISTRUTI – I todeschi scapando davanti ai “liberadori” i s’à leteralmente taià drio i ponti”
…a cura di Graziano M. Cobelli
gcobelli05@gmail.com
Quatro Ciàcoe: da Verona
I PONTI DISTRUTI –
I todeschi scapando davanti ai “liberadori” i s’à
leteralmente taià drio i ponti
EI dopodisnar del 25 apriI 1945 (mèrcoli), sentendosse za el fià de le trupe anglo-americane sù i calcagni, i todeschi, oramai quatro gati spelumà che i partigiani, volendo, i avaria podù fermar anca solo a peade nel dedrìo, nel ritirarse verso el Trentin i à prima fato saltar tuti i ponti de Verona, qualchedun za minà fin da la fine de agosto 1944.
In apocalìtica sucession, dunque, nel giro de poche ore è ‘n dà a tòchi: el romànico ponte Piera, quel de la Vitoria, quel Scaligero de Castelvecio, quel de la Ferovia in Basso Acquar e via-via fin a quelo de la diga del ceo (Chievo).
Del Ponte della Ferovia: è stà abatude le arcade estreme sora le sponde de l’ Àdese, nel mentre le 5 centrali sul fiume le à tegnù bòta.
Ponte San Francesco: distrute le arcade de sinistra e centraI; quele de destra solo danegià.
Ponte Aleardi: no’ l’èra gnancora del tuto costruì ma, tanto par no’ èssar de manco, el g’à rimesso i du piloni ‘pena tirà-sù.
Ponte Navi: croà le arcade de sinistra e quela centrale; quele de destra solo danegià.
Ponte Novo: croà le arcade de sinistra e centraI; quele de destra danegià. Dani gravi anca ai edifici nei pressi.
Ponte Piera: de le 5 arcade è restà su solo l’arcada de destra e el rudere de ‘n pilon.
Ponte Garibaldi: (ciamà “dei strachi” par le figure sdravacà ai quatro lati): distrute le arcade de sinistra e centraI mentre quela de destra la risulta solo danegià. Gravi assè i dani ai edifici viçin.
Ponte della Vitoria: è ‘ndà-zo anca qua le arcade de sinistra e centraI mentre quela de destra l’à tegnù duro. Le càriche i è stà de ‘na violensa terìbile tanto che i edifici de la sponda sinistra i è stà semidistruti.
Ponte Scaligero de Castelvecio: è restà solo i ruderi de le do pile.
Ponte Cadena: è restà solo l’arcada de destra e gravemente danegià.
Ponte della Diga del ceo (Chievo): abatù le 4 arcade de sinistra.
Ponte de la ferovìa de Parona: I todeschi i à risparmià la fadiga de farlo saltar, grassie a le incursioni de le USAAF.
A la sera era stà fato scopiar la polvariera de Corubio (tra Parona e Pescantina) che l’à lassà un buso de oltre çento metri de diametro. Diversi i morti anca tra i cruchi che, ritiràndose, i se stava dirigendo a piè verso la statal del Brenero.
EI 26 apriI 1945, a le 6,20 de i tremendi scòpi i à fato tremar anca tuta Verona; l’era una tra le più grandi polvariere de l’Italia; quela de Avesa. Par fortuna che par tuta la note, in prevision de quel che i avaria fato i todeschi in fuga, la popolassion l’avea laorà a alontanar da le galerìe meiara de casse de tritolo e altri esplosivi.
Dopo quela note de inferno, verso le 9 è rivà i primi americani de la 5a Armada, acolti da la popolassion con el sono de le canpane de la Tòr Lamberti e de tute le cese ancora in piè.
Nel dopodisnar del 27 apriI i genieri aleadi i avea za costruì su quel ch’ èra restà del ponte de la Vitoria ‘na passarela su barconi.
Qualche giorno dopo la stessa roba i à fato su i ruderi del ponte Aleardi.
Ne i ani ch’è seguì, i ponti i è stà tuti rifati rispetando la precedente architetura e el stile, salvo par el ponte de la Vitoria. Paraltro, i “strachi” no’ i è più tornà sul ponte Garibaldi e ci-sa che fine che i avarà fato!
Tornà come prima inveçe el bel ponte Scaligero e quel Romano, inauguradi, el primo a l’11 setenbre 1951 e l’altro ne la primavera del 1959.
Wanda Girardi Castellani
Ringrassio I’amigo, Nane Ainardi par l’aiuto che ‘I m’à dà ne la stesura de I’artìcolo (foto conprese).
