L’Angolo de la Wanda – Aprile 2005 – “MARIO SALAZZARI; l’arte a tuto tondo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

MARIO SALAZZARI; l’arte a tuto tondo

L’ò conossù nel 1949 al ristorante “Torcolotti” in via Zambelli dove g’avea sede el Cenacolo de poesia dialetal “Berto Barbarani”. Pò’, dies’ani dopo, me ghe son trovada a fianco in ocasión del concorso de poesia organizà dai “Veterani de san Pòl”; lu par l’enesimo primo premio con la poesia “La mora catìa” e mi a la me prima segnalassión con la poesia “Fumo”.
Mario Salazzari l’è stà ‘na notissima personalità artistica, poliedrica, eclettica, anticonformista, versatile. Poeta, dunque, scultór, pitor e musicista, amigo dei futuristi Umberto Boccioni, Marinetti, Quirino Sacchetti, l’èra nato a Lugagnàn de Sona el 16 novembre 1904 e l’è spirà a 90 ani, su un leto de l’ospedàl de Borgo Trento el 6 giugno 1993. El s’avea diplomà a l’Academia Cignaroli nel 1924 ma zà nel 1920, a soli sedes’ani, l’avea realizà la só prima opera: el monumento ai caduti nel quartiér de borgo Roma a Verona. Nel 1926 l’è stà nominado “Maestro d’arte” durante l’inaugurassión del monumento al Pontiere a Piacenza onorà da la presensa del Re Vitorio Emanuele III.
Nel 1941 l’à messo in opera i du grupi equestri sui pilastri del ponte de la Vitoria, monumento dedicà ai morti de la prima grande guera. Un’opera che dopo la fine de la seconda, l’à scadenà un meso putiferio quando qualche “bachetón”, alsando el naso el s’à inacorto che i du “bucefali” i era straordinariamente fornì de atributi maschili… ”afari” che paréa incònbar de pingolón su la testa dei passanti. Alora, dal pulpito de le alte sfere s’à pensà ben de coèrsar la vergogna… ma, fin che i çercava la maniera più cònsona de farlo, più velocemente g’à pensà i studenti veronesi fornendo i due staloni de abondanti mudandoni. L’è stà’ inoltre ugualmente bardato il destriero di Vittorio Emanuele in Brà, al qual i g’à anca sistemà de le “Dóe” trasformandolo in un caval a dondolo. Par completàr pò’ la carnevalada, i à portà a spasso par el centro cittadin anca dei mussi… pura in mudande!
Ma tornando al nostro Mario, dopo l’8 setembre1943 par aver militado nele file partigiane l’è stà caturado, torturado, processado e condanà a 30 ani de galera ma el 25 aprìl 1945 l’è riussì a taiàr la corda! Dopo la guera l’à ripreso l’atività de scultór con el monumento al partigiàn colocà in piassà Brà, de fassada a la ‘Rena. Contenporaneamente, l’à riscominçià a ocuparse de pitura, poesia e musica partecipando a diverse manifestassioni d’arte:
Quatro Bienali Nassionali a Verona, L’angelicun a Milan, Mostre internassionali del Bronseto a Padova e la Quadrienale Internassionale d’Arte Sacra a Roma.
A Verona l’è presente con ‘na vintina de opere publiche e altri inportanti laori i figura in altre çità d’Italia, in Francia, Inghiltera, Stati Uniti, Brasile, Cina.
El 28 de agosto 1993 è stà organisà una mostra postuma nel Comune nativo de Somacanpagna.
Tra le poesie più conossude, fra le tante che n’à lassà Salazzari, ricordemo , oltre a la “Mora catìa”, “El leto grando”, “La canta de Verona”, e tra le opere edite: “Un mal che lima e ruma”… Tra le tante opere de scultura, inveçe: El monumento ai caduti de Tombetta, la targa del genio pontieri in Lungadige Capuleti, el monumento al Soldato (Piazza Palazzina), la targa in onore de la divisione Pasubio, el monumento ai martiri de Cefalonia e Corfù (Bastione circonvallazione Oriani) e altri monumenti ai caduti delle due grandi guerre. L’architrave della chiesa di Ceraino, vari bassorilievi in Municipio e Gran Guardia, statue al cimitero monumentale e altri cimiteri ecc…
Fin’ora, purtroppo, la città de Verona, sempre così pronta nel ricordar el pur grande Berto Barbarani, no’ la s’à gnancora occupà de onoràr come el se merita anca ‘stó altro grande veronese che g’à dà lustro con ben 4 arti a la só çità.
El paese natìo, Lugagnàn, almanco, el g’à dedicà una via che la se trova tra via Brennero e via san Francesco.
Senpre meio che gnente!

Wanda Girardi Castellani