L’Angolo de la Wanda – Aprile 2006 – “Quando Verona la s’à propio rabia’… (le pasque veronesi)”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Quando Verona la s’à propio rabia’…
(le pasque veronesi)

“se San Marco èsse volesto despiegàr la só bandiera
i francesi, trati a tera, tuti morti i sarìa stà!”

L’insuressión de Verona contro i “fradéi latini” francesi (quei stessi che çentoçinquant’ani dopo i à scadenà in centro Italia le só trupe d’assalto marochine, dàndoghe çinque giorni de “carta bianca”: la pagina piassè nera de la storia, tale da bàtar parfìn quela del “saco de Roma”) l’è scopià lùni 17 aprìl 1797, secondo dì de Pasqua, in n’ostaria de via Mazzanti e l’è durà ‘na setimana.

Par la só posissión strategica, Verona l’è stà’ conquistà un futìo de volte da ‘na brìgola de eserciti de tute le rasse, partanto, a mi, quando che sento dir “són veronese puro sangue”, me scapa da rìdar parché, a parte le inumerevoli invasioni de la çità del passato remoto, basta pensàr al “tira e mola” tra venessiani, francesi e austriaci; ‘na giostra ch’è durà quasi 500 ani, e al fato che tuti i eserciti invasori, da che l’è mondo, la prima roba che i fa quando che i riva l’è quela de darse da far co’ le done, volenti o no.
“veronesi puri”? Bah!
E dopo ‘sta sconsolada considerassión, passemo a l’argomento in tòla, “le Pasque veronesi” e ai avenimenti che l’à precedude e seguide.
Verona, i francesi no’ i la vedeva de bon ocio parché g’avéimo dà ospitalità a l’albergo “Due Torri” e pò’ ne la vila Gazzola (ne l’atuàl via del Pontiere) al conte de Provenza (o conte di Lilla), uno dei pretendenti al trono de Francia, tanto che’l Bonaparte el lo ciamava “Re de Verona”.
El 1° giugno 1796, nel giorno stabilì dal generàl Napoleón, i francesi, dopo averghe dà la supa ai kruchi a Borghetto sul Mincio, i è entrà nela çità scaligera in 12.000 sensa colpo ferìr.
El primo provedimento dei nóvi paroni l’è stà quelo de castigàrne inponendone imediade e dure contribussióni: requisissióni de bestie, robe e abitassióni! Come l’à scrito un cronista de l’epoca: “i soldà francesi i è entrà dapartuto portando via tute le done (e te paréa!) e tuto quanto piaséa a lori”
Napoleon inveçe l’è rivà scortado da 500 cavalieri, el 3 Giugno, ocupando l’atuàl palasso Forti (alora del conte Emilei).
El 30 Luio, dopo che i francesi, de note e a la chetichela i avea fato féte, è entrà po’ i austriaci saludà con entusiasmo da la çità che la se iludea de podér restauràr con lóri el governo venessian.
Ma se contro el “grande Còrso” alegramente i veronesi i avéa cantà:”Bonaparte nó’ vól parte/ ma el vól tuto par só parte/ e nel mondo nó gh’è parte/ che no’ voia el Bonaparte“, ben presto i à dovù cambiàr cusì la sonada: “Co’ san Marco dominava/ se disnava e se senava./ có’ la santa libertà/ s’à disnà e nó’ s’à senà/ có’ la croçe de Lorena/ nó’ se disna e nó’ se sena“.
La sera del 6 agosto el generàl Massena, “Duca de Rivoli”, ciamà da Napoleón “el fiól predileto de la vitoria”, l’èra zà rivado a Peschiera e a le dó de note eco da nóvo i francesi passàr la porta de San Zén dopo averla sfondà con diese canonade.
Ancora ‘na òlta Verona, sbandonà dai austriaci e dai venessiani, l’è ne le sgrinfie dele slandronade, afamade e ancora più incativide trupe del Bonaparte. I sacheggi e le violense i è stà talmente tanti e bruti che’l stesso Napoleon l’à afermà che i só soldà i s’avarìa meritadi tuti la fusilassión! Paraltro, ‘stó esercito in 20 mesi de guera l’avea lassà ne la sola Verona 4000 morti, sensa contàr quei de Rivoli, Caldier, Arcole e zone limitrofe.
In quel periodo quasi tute le cese, palassi e conventi i è stà trasformà in ospedài: prima fra tute la cesa de santa Eufemia, dopo averla spoià de quadri e aredi e distruto el resto, tonbe conprese (parfìn quela dela Anzolina Lonardi, protagonista dela “triste istoria” contà da l’abate Caliari. Vedi “Quatro ciacoe” otobre 1989). ‘Stessa sorte gh’è tocà ai conventi de san Bernardin, santa Anastasia, san Tomaso ecc… No’ i à lassà in paçe gnanca Cangrande de la Scala, tiràndolo-zó dal portàl de santa Maria Antica par portarghe via la spada (recuperà pò’ ‘bastanza de recente) e forsi un pressióso anél.
Come ‘na carica de cavalote i francesi, in passàr, i s’à sempre lassà drio solo desperassión e macerie!
Dopo alterne vicende militari e non, al sóno de la fanfara Napoleon l’è rientrà par la tersa volta in Verona, lassandola poco dopo in man a qualche guarnigión che l’à seità, par só conto, a farne più dàno che l’à podù. Ma la popolassión, sobilà dal clero, zà da’n tòco l’avéa tacà a mugugnàr contro i giacobini (francesi e nostrani), “regicidi e anticristo”, nonché ladri e profitadori (e qua ghe sémo!) e la rivolussión l’èra ne l’aria come a Milan, Brescia, Bergamo ecc…
Propio in quei giorni Verona l’à adotà ‘na cocarda giala e blu; i colori che i è restà ne la só bandiera.
I giacobini veronesi i avéa çercà de ocupàr la çità ma la gh’éra andà sbusa. L’èra comunque fatal che tra de noialtri e i francesi se vegnesse a le man, infati, la matina del 17 April 1797, seconda festa de Pasqua, par le strade se leséa: “Semo pronti a la difesa – viva san Marco! viva la Republica! viva Verona!” Subito la popolassión, sensa ordinamento e freni la s’à scadenà perseguitando francesi e giacobini, soratuto quei de casa. L’èra la guera civìle, saludà dal Rengo che da la tór Lamberti batendo a martèl el galvanisava el popolo, comandà a la mèio da Francesco Emilei.
Da la provincia, eco vegnàr-zó çentenara de contadini armà de forche, baili e rengàie. A quei s’èra unì anca 200 soldà austriaci.
Oto giorni de bombe, canonade, campane a martèl, massacri e incendi e po’ la capitolassión, fin che’ popolo el cantava:
“Se san Marco èsse volesto/ despiegàr la só bandiera/ i francesi, trati a tera/ tuti morti i sarìa stà“.
Ma intanto, Castelvecio l’èra un inferno e tantissimi palassi i era danegià de bruto da le canonade che seitava a fiocàr dapartuto. I à centrà anca el palasso “de l’orolojo a aqua” (via Quatro Spade) de proprietà del grande astronomo veronese Antonio Cagnoli che, desperà, l’à visto anca andàr in tochi el só telescopio, pò’ in seguito, ripagà personalmente da Napoleón con 5000 franchi. Ma de le canonade de quei giorni se pól ancora védar i segni, par esenpio, sui muri de la cesa de san Giorgio.
El 25 april 1797, co’ la viliaca defessión dei dú Provedidori venessiani, a Verona finiva el dominio veneto e i francesi i metéa le sate ancora ‘na volta su la tera scaligera castigando, tanto par canbiàr, i só abitanti con altre dure requisissióni e violense a no’ finìr. Tanti i è stà i patrioti arestà e inpresonadi in castel san Felice: Francesco Emilei, Augusto Verità, el capucìn Luigi Maria Flangini, Agostino Bianchi e altri. Tra questi, i è stà’ fusilà el 16 magio nel val dei bastioni de porta Nova el conte Emilei, el conte Augusto Verità e Luigi Flangini.
In quei giorni el leon de san Marco l’è stà’ scopelà-via da tuti i palassi e le strade e parfìn tirà-zó da la colona de piassa Erbe (par tornarghe-su l’à dovù po’ spetàr el 17 de aprìl del 1886, aniversario de le pasque veronesi).
El 29 agosto del 1805, pò’, par slargàr el corso al passagio de i só cariagi i francesi i à parfìn demolìdo l’arco romano “dei Gavi” muciando (par fortuna) i tochi nei cógoli del’Arena… roba che ghe n’à consentì nel 1932 la ricostrussión.
Co’ le Pasque veronesi finiva el dominio de la Serenissima. L’èra durà, dal 24 giugno 1405 al 17 giugno 1509 (103 ani, 11 mesi e 24 giorni) e dal 16 genàr 1517 al 25 april 1797 (280 ani, 3 mesi e 10 giorni). In tuto quasi 4 secoli”
El 9 luio 1797 nassea la Republica Cisalpina ma el popolo, sempre oco, miga l’avea capì el contegnù del tratado de Campoformio. El s’à incorto de l’inbròio solo quando che el comissario de guera Tibeau l’à trasferì l’esercito da ‘na parte a l’altra de la çità che la s’à catà cusì spartìa fra francesi e cruchi; mesa de quà e mesa de là! S’erimo al 21 genàr 1798.
I francesi i à po’ lassà la só mésa torta a Genàr del 1814 sostituidi el 4 febràr dai 1800 kruchi guidadi dal generàl Stefanelli.
I veronesi che, dopo el longo va-e-vièn i avea inparà ormai la lessión, no’ i g’à messo tanto a capìr de che rassa i fusse i nóvi “liberadori”, tanto che un frutaról che, come tanti altri l’avéa ciapado da ‘sti qua ‘na bona rata de legnade, decantando i só limoni, sotovoçe el ghe zontàva, in bona rima: “è andà via el re de denari e è rivà quel de bastoni!”
El 14 Otobre 1866 finalmente è sbarcà a Porta Nova, che al tenpo l’èra solo ‘na stassión militare, i primi soldà de l’esercito italiàn, el giorno dopo che da la stassión de Porta Vescovo era slojà el regimento Wimpffen.
De quel lontan 1797 le uniche robe bele che n’è restà de la Republica Cisalpina i è le indicassióni stradali e i numari civici de le case. Anca le 72 arcade de l’Arena i èra stà numarade parché 33 de queste i era abità. Inoltre ghe dovemo ai francesi l’istitussión de l’ospedàl civile e dela biblioteca comunale. La çità l’èra stada divisa in rioni, dei quai, par èssar ciari “furón scritti i nomi sui cantoni”.
Anca dei morti el Bonaparte el s’à ocupado trasferendoli, dal terén intorno ale cese, fin alora tute aree cimiteriali, al de fora de le mura de la çità, come che testimonia rivolgendose al veronese Ippolito Pindemonte, Ugo Foscolo ne “I Sepolcri”.

Wanda Girardi Castellani