L’Angolo de la Wanda – Aprile 2007 – “ME FIOSSO DE GUERA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

ME  FIOSSO  DE  GUERA

Coréa (da n’ rifugio antiaereo a l’altro) l’ano 1941; el secondo de guera.
Me papà, pilota marconista, l’èra stà, tra i primi, riciamà in aviassión ma par fortuna i l’aveva lassado a Aviano, nel Friuli. Mi, me mama e me fradel Silvano de du ani, inveçe, come la magioransa dei veronesi, a quei tempi, andaimo in leto vestidi e co’ le sporte imbugà dei pochi valori de fameia, pronte su la porta.
La sirena d’alarme co’ la só voçe spasemada la se fasea sentìr sempre più de spesso, de giorno ma ancora più de note. Mi, peraltro, g’avevo un sono cusì de piombo che gnanca la sentivo e me mama la g’avéa el só bel da-far a metarme in piè par strapegarme in cantina (R.C. – rifugio casalingo) dove che s’èrimo atressà con generi de conforto, careghe, taolini, libri e ‘na stueta a legna. La soto aprofitàimo anca par ‘scoltàr, segretoni me tanti OO7, radio Londra. Bonbardamenti a parte, gh’èra a rèndar la vita ancora piassè difficile quel “strarónpi” de “Pippo”. Siccome però se se ‘bitua a tuto, noialtri veronesi che anca ne le situassioni pèso riussimo a conservàr ‘na s-cianta de bonumór, ghe schersavimo insima tanto che quando, dopo un par de giorni de assensa l’è rispuntà… s’emo dito: “no’ l’è Pippo… l’è Renato, parché Pippo l’è malato. Co’ na bonba e ‘na mitralia el tièn sveia mesa Italia!”
La nostra contraerea da le toresele la seitava a tirarghe ma i era tute “padele”. Par questo la s’à ‘vansà el soranome de “Tosca” in quanto… come l’eroina pucciniana “non fece mai male ad anima viva”…
Beh… quel’ano frequentavo la prima comerciale; ondes’ani… un corpo da dona, tanto che a vardàr in zó faséa fadiga a vèdarme le scarpe, ma la testa… l’èra sempre da ondes’ani; malmaura!
Drio le diretive de la GIL, oltre che somenàr carote e brocoli in tuti i scanpoli de tera bona trasformando cusì anca le vanese de corso Porta Nova in “orticeli de guera”, ne l’intento de portàr conforto ai nostri conbatenti de tuti i fronti, i à coinvolto  anca i nostri “Profe” co’ ‘na lista de nomi de soldadi tra i quai la scola l’à invità noialtre butelete a sèliar un “Fiosso” con el quàl corispóndar ne la vesta de “madrine de guera”.
A mi… no’ m’à parso gnanca vera! Da quela sognatrice che zà ero fin da picenina (vedi “le età de l’amor”. Q.C. aprìl 2004), me son figurà “madrina” de’n fusto de róaro… tipo Amedeo Nazzari (l’atór del momento… mitico nei pani de “Luciano Serra, pilota) . Purtropo ne la lista no’ gh’èra aviadori e me son dovuta adatar a un marinàr somergibilista del quàl me ricordo solo el nome; Alessio… Ma, varda caso, proprio in quei giorni la radio (EIAR) la trasmetteva ‘na cansoneta: “Rapidi ed invisibili partono i sommergibili/ cuori e motori, assaltatori contro l’immensità./ Si va per l’alto mar ridendo in faccia a monna morte ed al destino/ colpir e seppellir ogni nemico che s’incontra sul cammino/ È così che vive il marinàr nel profondo cuor del sonante mar/ del nemico e delle avversità/ se ne infischia perché sa che vincerà!”
Col me solito entusiasmo ho tacà dunque a scrìvarghe a ‘stó marinàr, su carta de quaderno, de le bele letterine, anca se un poco contrarià dal fato de avèr savudo che l’èra un “teracatù – estremo” in quanto nato in Puglia, proprio ne l’oridèl del taco.
Oltre a corispondar con el marinàr, co’ l’aiuto e sóto la diressión de me mama, però, faséa anca passamontagna, guanti e sgalfaroti par i nostri soldadi in Russia; material che po’ la Gil la se incaricava (se sperava) de far rivàr a destinassión.
Da Alessio intanto rivava posta sempre più de spesso cusì ho savudo che l’èra stado decorà par aver portà in salvo a nodo, dopo l’afondamento de’n caciatorpediniere sul quàl l’èra inbarcà, un uficial. Ma se no’ me ricordo mal, de naufragi el ghe n’avea fato dei altri. Insoma, l’èra un eroe e mi scominçiavo a sognàr a oci verti…
Se-non-ché…
Quel’ano, co’ ‘na licenza premio in scarsela, inveçè de andàr a casa sua… zó-zó, a l’estremo del taco, l’è vegnù su a Verona par védarme mi e con qualche progeto in testa… dato che mai, evidentemente, el s’èra imaginà che g’avesse solo ondes’ani! L’è rivà cargo de regài ma quando me lo són visto davanti, picolo e tracagnoto, con du mostaci a la “Peppone”, i cavei  inpiantà fin a mesa fronte e le sopracilie a “sesa” incrosà sóra el naso; un “King-Kong” in miniadura vestio da gelatàr, son andà a torme i patini a rudele e son scapà in palestra lassando vigliacamente me papà e me mama a spatolarse quel poro can del me fiosso de guera.
I mei, con tanta gentilessa i g’à fato notàr che mi, anca se ero bona de scrìvar ben tanto da parér piassè maura, in verità ero ancora  pitosto “indrio”, ma st’altro, par gnente smontà, el g’à dito a me pàre che da le parte sue le done le se sposa a bonora e che partanto lu, se gh’èra da spetàr qualche aneto… l’avarìa pasientemente spetà.
Ostrega… (l’à comentà el me vecio) vorà dir che intanto ghe la metaremo soto la paia come le nèspole!
A mesogiorno, tirà se no’ altro dai stiramenti de stómego causà da la fame, son tornà a casa ‘ndove che me mama l’avéa parecià e cusinà fasendo del so meio par consolàr me “fiòsso” de la me acoliensa decisamente “algida”.
Sicome s’èra de dominica , el menù de casa Girardi l’èra: paparele in brodo co’i figadini e carne lessa co’ l’inmancabile pearà (questa… de conpetensa de papà Aldo che’l ghe sbatéa drento el péar con el baìl faséndoghe, de conseguenza, prosugàr el rubineto ai comensali). La sotoscrita, po’, pena magnà la s’à serà in camara  co’ la scusa de dovér far i conpiti e studiàr cusìta el “fiosso” a ‘n çerto momento, ‘na òlta capì l’aria che tirava, l’è andà con Dio, par i fati sui.
Naturalmente, la corispondensa l’è finida li.
Poro Alessio… è passà tanti ani ma ogni òlta che ghe penso próvo rimorso anca se la bona scusante l’è proprio quela che ero ‘na buteleta.
Serto che se’l g’avesse someià almanco un pocheto a l’Amedeo Nazzari de “Luciano Serra, pilota” o a quela facia da tòla de Osvaldo Valenti ; tenebroso bel principe mongolo ne la ”Corona de fero” sarìa stà n’altra roba….
Eh… si, …tuta n’altra roba!

Wanda Girardi Castellani