L’Angolo de la Wanda – Aprile 2009 – “S’à smorsà ‘na stela de l’Astrofisica”
…a cura di Graziano M. Cobelli
gcobelli05@gmail.com
Quatro Ciàcoe: da Verona
S’à smorsà ‘na stela de l’Astrofisica
Nel numaro de dicembre, ano domila, soto el titolo “Una vita tra le stele”, “Quatro ciacoe” l’à publicado un me articolo sul prof. PAOLO MAFFEI, un astrofisico de ciara fama, tra l’altro massimo esperto nel campo de le comete. Ne l’ano del passagio dela Halley la casa editrice “A.Mondadori” l’à publicà nela so colana “Edizioni scientifiche e tecniche” l’ultimo libro del prof. Maffei dal titolo “la Halley: dal passato al presente”. ‘Sto volume l’à otegnudo, tra l’altro, el premio “GLAX0” a la só setima edissión. ‘Stó riconossimento che la grande industria farmaceutica veronese la dedica a la divulgassión sientifica, ne l’ano 1985 l’à premià dunque el nostro grande astrofisico. L’è stado in quel’ocasion che me fiol Flavio (appassionado astrofilo e entusiasta fans del prof. Maffei) e mi, g’avemo avudo el piaser e l’onor di conossarlo durante la bela cerimonia nela sala Maffeiana.
Da alora avemo scominçià ‘na corispondensa che l’è durà ben 24 ani; ‘na corispondensa che soltanto la “siora co’ la rengaia l’à podudo taiàr!
La bruta notissia l’è stà’ riportada su internet nel giro de un par de ore: “Perugia- E’ morto stamani a Foligno l’astrofisico Paolo Maffei conosciuto in tutto il mondo soprattutto per aver scoperto due galassie che oggi portano il suo nome”.
Maffei l’aveva lavorado nei osservatori de Arcetri, Bologna, Asiago, Amburgo e Catania dedicandose soratuto al studio del sol, dele comete, dele nebulose e dele stele variabili.
Dal 1963 al 1975 l’à insegnado a l’università La Sapiensa de Roma. Nel 1975 l’èra stà nominado diretor de l’Osservatorio astrofisico de l’università de Catania e dal 1980 el g’à ‘vu la carica de professor ordinario de astrofisica al dipartimento de fisica a l’università de Perugia. Nel 1968 l’à scoperto intorno a la costelassión de Cassiopea dó nove galassie batesade col nome Maffei 1° e Maffei 2°.
L’èra conossudo anca par le so publicassioni de caratere sientifico divulgativo edite da Arnoldo Mondadori nela colana EST (edizioni scientifiche e tecniche):
“Al de la dela luna” – “I mostri del cielo” – “L’universo nel tempo” – “La cometa de Halley” Par le edissioni del’Arquata de Foligno i è inveçe, de Giuseppe Settele, “El diario e la questione galileiana”.
I funerai i s’à svolti martedì 2 marzo nela Catedral de san Feliciano alla presenza de autorità ma anche e soratuto de la gente de Foligno e de Perugia vegnuda a esprìmar l’afeto e el dolor par la perdita de’n siensiato che g’à dà lustro a la só çità.
Personalmente, la perdita de quel che ò considerà el meio e ‘l più importante dei amiçi la m’à lassà ‘na profonda ferida e un doloroso senso de udo; un udo che pol essar in parte colmà lesendo: “La Cometa di Halley”, che l’è de sicuro el so capolaóro de divulgassion, nel qual la storia de la cometa e de i so passagi viçin a la Tera, ogni 75 ani, se incrosa co’ la storia de l’umanità, de imperi che nasse e tramonta, de batalie, guere e distrussioni, ma anca de scoperte e de evolussion de la conossensa, in un grópo streto che conduse el destin de i omeni ne la sèna de l’Universo; ne la qual, tuti noialtri de passagio, intrerpretemo ognun la nostra parte nel deventar de le cose.
Wanda Girardi Castellani
***
Foto da Google
***
