L’Angolo de la Wanda – Aprile 2013 – “Le sié “battaglie di Verona””

…a cura di Graziano M. Cobelli

gcobelli05@gmail.com

Quatro Ciàcoe: da Verona

Le sié “battaglie di Verona”

Se a un veronese a caso i ghe domandasse qualcosa circa la “battaglia di Verona”, penso propio che la magior parte no i savarìa cosa rispóndar. Sicuramente tanti i ga ancora ricordi più o meno scolastici de le “battaglie del Risorgimento”: Custoza, Solferino, Curtatone e Montanara, ecc., ma Verona?

Ben: andando su Wikipedia (che ormai l’è più comoda de le enciclopedie fate de libri pesanti e polverosi) i te mostra che de “battaglie di Verona” ghe n’è stà la belessa de sié!
Ghè da dir comunque che Verona la ga ’na storia plurimilenaria… Infati la prima batalia l’è stà combatuda ne l’istà del 249 tra le trupe de Decio e quele da Marco Giulio Filippo (dito “l’Arabo”) par la conquista del potere imperiale. Filippo che l’era l’imperador romano in carica el ga lassà la pèle e Decio l’è deventà el nòvo imperator. Pecà, parché Filippo, “l’Arabo”, probabilmente l’era cristian (a sentir Eusebio de Cesarea) e se el fusse restà lu sul trono, probabilmente el cristianesimo el sarìa deventà religione de stato sessant’ani prima rispeto a l’ano 313 de Costantino el Grande.
La seconda “battaglia di Verona” l’è stà combatuda del 312 e l’à visto in campo i eserciti de Costantino I e de Massenzio. I du eserciti i se stava inseguendo su e zo par l’Italia da un bel po’ de tempo e a la fine, come savemo, Costantino l’è riussì a vìnsar Massenzio al Ponte Milvio de Roma, deventando imperador unico e come regalin rèndar el cristianesimo lìbero, adirittura religion de stato, par tuto l’impero (editto di Milano del 313). Ma tornando al 312 (apunto un ano prima) Massenzio el s’era trincerà a Verona, proprio in cità, parché, essendo sta qua proteta su tri lati da l’ansa de l’Adese e con el quarto fortificà (mura de Gallieno) l’era praticamente imprendibile! L’assedio l’è stà dificile ma a la fine Costantino l’à vinto e la cità la l’à acolto come un liberador. Su l’arco de Costantino a Roma, uno de i fregi l’è proprio dedicà a la batalia vinta a Verona.

Tèrsa batalia: 6 Aprile del 402, al tempo de le invasioni barbariche. Dal nord era arivà zo i Visigoti de Alarico I con tuta l’intension de rivar fin a Roma. A Verona però i s’era trovadi davanti l’esercito romano guidà da Stilicone (nome che el m’à sempre fato un po’ rìdar, parché tendo a lèsarlo “Stiticone”)… Comunque i romani i à vinto e i visigoti i è dovù alsàr le tende e tornàrsene de là de le Alpi. Savemo che a la fine a insediarse a Verona sarà i Ostrogoti de Teodorico (Teodorico di Verona dove vai tanto di fretta?), ma sarà solo 50 ani dopo.
Quarta batalia: stavolta semo nel 489, el 30 de setembre. A Verona ghera i Goti de Odoacre e a conquistar la cità era rivà proprio el nostro Teodorico. El re ostrogoto l’à combatù coragiosamente e con furbissia e a la fine Odoacre l’à dovù scapar via e andar a Ravenna, dove tri ani dopo Teodorico el ghe darà la batalia finale, vinsendo. (E tuti savemo del bel mausoleo, udo, che el s’à fato costruir a Ravenna).
Quinta batalia: se salta de alcuni secoli fin al 1799. L’è stà combatuda tra l’esercito austro-ungarico, comandà dal generale Kray, e quello francese, napoleonico, comandà dal general Schèrer. I francesi i stava cercando de conquistarse un bel po’ de Italia cisalpina (e savemo che i ghè riussì) ma in zona ghera za i austriaci. In ’sta batalia (combatù proprio a le porte de Verona) i francesi i à ciapà de le sonore legnade, ma poco dopo a métar le cose a posto è rivà Napoleone in persona che de vitoria in vitoria l’è rivà fin a Venessia (portàndose a casa nel ritorno, come souvenir de viagio, tuto quel che l’à podù portarse via).

Sesta e ultima batalia, nota anca come “battaglia di Santa Lucia”. El 18 Marzo 1848 era scopià le cinque giornade de Milano. El comandante de l’esercito austro-ungarico nel Lombardo-veneto, el feldmaressialo Radetzky, vista l’impossibilità de domar la rivolta a Milan l’era partì “armi e bagagli” par andar a trincerarse ne la çità fortificada de Verona, la più importante del quadrilatero.
El re de Sardegna Carlo Alberto, visto el momento propissio, l’à dichiarà guera a l’Austria e l’à scomincià a invàdar la Lombardia con do divisioni. Par i Piemontesi l’è stà un’avanzata veloce parché al 13 de April i era za a le porte de Peschiera. El re l’à pensa ben de no afrontar Peschiera diretamente ma de agirarla, puntando su Verona, pensando che, s’a cascava la “capitale” del quadrilatero, cascava anca le altre tre çità, par mancansa de comando e de rifornimenti. El 26 i Piemontesi i à passado el Mincio e al 30 i era a le porte de Verona. El 6 Magio è inizià l’ataco… Radetzky però l’era proteto ben, sempre par via de l’ansa de l’Adese e de le fortificassioni su le “Toresele”, tanto che più che una batalia risolutiva l’ataco piemontese el s’à trasformà in tuta una serie de combatimenti atorno a la cità, el più de le volte senza un risultato preciso. A la fine, come savemo, i austriaci de Radetzky i à resistido e Carlo Alberto l’à dovù ritirarse, lassando Verona ancora austriaca par un bel po’ de ani.
Ogniuna de ’ste pagine de storia le meritarìa una descrission molto più longa e precisa, ma el me intento l’era de segnalarve che anca la nostra çità l’è stà teatro de varie batalie.

Wanda Girardi Castellani