L’Angolo de la Wanda – Aprile 2014 – “La Tór Lamberti”

…a cura di Graziano M. Cobelli

gcobelli05@gmail.com

Quatro Ciàcoe: da Verona

La Tór Lamberti

Verona l’è ’na çità antica… e come tute le çità antiche l’è piena de cese e de campanili. Però el campanil che domina su tuti, quel più belo e più alto, la prima ponta che se vede spuntar su, rivando da distante… quel no l’è un campanil (anca se el de par) ma l’è la “torre comunale”: la Tór Lamberti.
Intanto la “tór” l’è veramente alta: co i so 84 metri l’è ancora ’desso (a parte le tóri de cemento de la Telecom) l’edificio più alto de tuta Verona: da la so cèla campanaria, ragiungibile comoda­mente co’ l’assensor, se pol averghe una stupenda vision a 360 gradi de tuta la çità.
Ma scominçiemo parlando de la so storia. La base l’è medievale: prima ancora che i Della Scala i deventasse i signori de Verona, la tore la dominava za Piassa Erbe, anca se solo con la parte che ancora ’desso se pol védar de matoni rossi intercalà a piera bianca. L’era stà costruida da la potente fameja de i Lamberti nel 1172: cioè in quel’epoca dove i siori i se costruiva le “case-torri” par far védar che i gaveva i schei (come a Siena, a San Gimignano, ecc). De ’sti Lamberti ormai se sa póco… de sicuro se sa che póco dopo el 1200 la fameja l’è stà bandì da la çità e che nel 1294 la tore l’è passà a caràtere pùblico, vegnendo inglobà nel palasso comunale che alora se stava costruendo. Con l’ocasion ghè anca stà messo in çima dó campane: una con el compito de segnalar a la citadinansa le situassioni de pericolo (incendi, tempeste, guere) e un’altra par ciamar a racolta i partecipanti del Consiglio comunal.
A le dó campane la popolassion la ga subito messo i nomi de “Rengo” e “Marangona”: el primo el vien dal termine “Arengo” cioè “arringo”, da “arringare”, ciamar a racolta… mentre l’origine de “Marangona” el dovarìa vègnar dal fato che la campana la serviva anca par segnalar l’inissio e la fine de la giornada lavorativa de i marangoni, ma la tradission veronese la ga costruì sora ’n’altra storia.
Se conta che ’na signora de la nobiltà veronese, mojér de un marangon, l’à spetà che l’amante del marì la passasse soto a la so finestra par tirarghe in testa ’na piéra e risòlvar così el problema. El momento però no l’è stà de i più felici parché ghera in corso la procession e oviamente così i l’à vista tuti. Par fortuna, sicome la signora l’era sióra, come punission l’è stà condanà solo a pagar de tasca propria una de le do campane de la tore. Oviamente, essendo ela mojér de un marangon, la campana l’è stà ciamà “Marangona”.
Nel 1311 a le do campane ghe n’è stà zontà ’na terza, ciamà la “Consolata” (o Bajona). ’Sta campana trecentesca l’è l’unica ancora al so posto.
La Tór Lamberti l’è restà così come l’era nata fin a l’ano de grassia 1403, quando dopo èssar stà colpì da un fulmine (oviamente a l’epoca no i aveva ancora inventà el parafulmini), el comune l’à deciso, oltre che de ripararla, de alsarla fin a la bela altessa de 84 metri, zontàndoghe a la parte medievale a righe bianche e rosse una seconda parte in muratura e po’ una terza parte de marmo bianco in stile neoclassico.
I lavori (con alterne vicende) i è andà avanti fin a l’ano 1464. El risultato però l’è una meraveja: la parte in matoni rossi la va sù slanciata par terminar in çima con quatro grandi finestre trifore, una par lato, dotade ognuna de un pontesel bianco. El stile l’è ancora quel medievale, con lesene de matoni rossi intercalà a piéra bianca. Sora le quatro finestre la parte centrale la finisse con un cornicion bianco dal quale parte la cèla campanaria: stavolta a pianta otagonale e tuta rivestì de marmo, con una finestra bifora su ognuno de i oto lati. El tuto po’ el termina co ’l “capelin” de tegole rosse, molto basso.

Nel 1557 le storiche campane “Rengo” e “Marangona” i è stà fuse e rifate da i famosi campanari veronesi “Bonaventurini”. El “Rengo” che sóna ancora ’desso durante le grandi ocasioni l’è ancora quel del 1557. Ne l’ano 1779 la tore l’è stà finalmente anca dotà de un orolojo: el ga un quadrante solo, bianco e largo quasi come tuta la larghessa disponibile, con sora una curiosa “pensilina” a forma de pontesel, messa lì par protègiarlo da la pióva e dal bruto tempo.
’Sto orolojo l’è ligà a un modo de dir tipicamente veronese: quando uno el parla se pol dirghe “L’è la tór che rebate!” par farghe inténdar che el sta ripetendo a la papagala quel che è za stà dito da un altro! Par capir ’sta frase bisogna saver che da l’altra parte de la piassa ghè da epoca medievale n’altra tore, più pìcola, ciamà la “Torre del Gardello”. Alta solo 40 metri, la monta però el più antico orolojo mecanico de Verona: pensemo che l’è in funsion fin dal 1421, con tanto de campana che bate regolarmente le ore. Da la vissina Tór Lamberti (che l’era sensa orologio) el campanar el spetava che el “Gardello” el batesse le ore par poder bàtarle subito dopo anca lu. I veronesi i le savéa e da lì è nato el modo de dir.

Tornando a i lavori del 1779, visto che vansava un pochi de schèi, le campane i è stà portade a 5: a le tre storiche: “Rengo” (in Si bemolle), “Marangona” (in Re) e “Consolata” (che la se consola, essendo la più vecia de tute, e che la bate in La…), ghe n’è stà zontà altre dó: la “Rabbiosa” (in Fa diesis) e el “Campanello delle ore” (in Si), ligà oviamente a l’orolojo e che à mandà finalmente in pension el campanar.
’Sto grupo de çinque campane l’è ancora quel che nel 1797 à sonà a martel durante le “Pasque Veronesi”.
Fin a póchi ani fà, ci voleva andar sù fin a la cèla campanaria el doveva pertegarse una scala streta che girava intorno a un pósso fondo 80 metri: el spassio che serviva ’na òlta par tirar sù le campane. Adesso ghè l’assensor: la salita la costa solo póchi euro e le foto de Verona che se pol far da quela altessa i le val tuti. Unica atension: evitar assolutamente de èssar a tiro de le campane quando scata el mezogiorno!

Wanda Girardi Castellani