L’Angolo de la Wanda – Aprile bis 1997 – “Mostra del libro”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Mostra del libro”

Par mi, entrar a la mostra del libro antico (3″ edission) organisà a Vilafranca Veronese da “EMMAUS-ITALIA”, l’è stà come, par un buteleto, catarse nel magazin de zugatoli de santa Lussia!
Oto locali pieni come ovi de libri, antichi e non, veci dischi in vinile, de B. Crosby, Tina Turner, Battisti, Battiato, ecc… spartidi musicali, album de figurine ecc…
Le date de edission dei libri, le va dal “500” ai nostri giorni; 6000 i volumi, 3000 le riviste e un numaro inprecisà de altre “pressiosità” vendù a pressi più che acessìbili.
Pecà solo che mi, invesse del sabato 1 marso, giorno de I’inaugurassion, son rivà la matina dopo quando, pèso de ‘na càrica de le orde barbariche de Attila, le prime çentenara de bibliofili le avea za fato canpagna rasa del mèjo in esposission. Con tuto questo, son riussida ‘stesso a rastrelar anca mi un saco de roba, parfin un libreto da messa de pèle (ano 1817) al presso de 15.000 franchi; un colpo miga da poco!
EI palasso che ospita ‘sta inportante mostra-marcà l’è uno tra i più antichi e bei de Vilafranca, el “Morelli-Bugna-Bottacisio”, in via Pace, e I’esposission la s’à svolta sabato 1° marso e dominica 2, e po’ sabato 8 e dominica 9. EI ricavà da la vendita el servirà a vèrsar nove comunità Emmaus in Italia e par i progeti de solidarietà verso i paesi de Burkina, Benin e Perù.
Par i apassionadi come mi, le 3 ore da l’apertura, a la matina, e le 3 del dopodisnar, i è stà propio poche; poche par cavarse el gusto de sfoiar libri come “L’istoria del Concilio de Trento” o, più “tera-tera” senplicemente ripassarse, in un bagno de infansia, le anade del “Vitorioso” e quele de la “Dominica del corier”.
Ghe tornaremo ‘st’ano che vien, a la 4^ edission… con più tenpo e, soratuto, con più schei!

Wanda Girardi Castellani