L’Angolo de la Wanda – Aprile bis 2000 – “ADIO, DON LUIGI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“ADIO, DON LUIGI”

Mèrcoli 27 genar, la cesa de Sant’Ambrogio de Valpolesela I’èra piena frasà de gente vegnù da ogni dove par darghe l’ultimo saludo a Mons. Luigi Fraccari, “I’angelo de le tombe sconossude”, tornà al Padre el 24, s.m.
Don Luigi l’è quel che dopo lònghe e fadigose ricerche el g’aveva dà un nome a 14.000 tonbe ignote semenà pa’l mondo da I’ùltima guera, e I’avea finalmente identificà, dopo ben 40 ani, anca el soldà de le “SS” fusilà con Don Domenico Mercante al bivio de Cerè, el 27 april 1945. Come ricordarè, ‘sto tedesco, ciamà par la so fede profonda “I’SS co’ la corona del rosario”, I’èra el caporalmagior altoatesin, “Lehonard Dalla Sega”; nome che finalmente, grassie a don Luigi, I’èra ‘stà inciso, sostituendo la parola “ignoto”, su la lapide de Ala, nel 1986.
A la comovente cerimonia che s’èra svolta a la presensa de la moier e dei fioi del martire, gh’ero anca mi e g’ò avù la gioia e l’onor de recitar davanti al vescovo de Trento la poesia, esposta na la cesa de Giazza, che tanti ani prima avevo scrito par el martire che par mi e par tuti fin a quel momento I’èra stà solo: “Uno dei tanti”.
In ‘sti ani ò visto de spesso don Luigi e ò visto tuta la documentassion, sia del Dalla Sega, che don Luigi el ritegneva un Santo, tanto da farse promotor de ‘na causa de beatificassion, che de i circa 14.000 morti che I’avea identificà.
A I’uficio funebre, davanti a quela bara rivà da Cavrin a la cesa parochial de Sant’ Ambrogio, gh’èra i alfieri co’ le bandiere de ‘na vintina de grupi de Alpini e varie altre associassioni militari. EI discorso de adìo el l’à fato, con voçe rota da la comossion, el vescovo de Verona, Padre Flavio Carraro. Po’, el Pàroco don Angelo Garonzi, depositario del testamento stilà da Don Luigi nel 1997, I’à leto pure ‘na so letara che I’avea spedì da Berlino ai neodi nel 1973, ne la qual el coragioso Prete el manifestava el desiderio de restar là, ne la casa rifugio fondà ‘pena dopo la guera par iutar i italiani internà ne i lager nasisti e quei po’ emigradi par çercar laoro. Cusì, ciamà da la so profonda fede e pietà cristiana, I’èra partì el 19 april del 1944 co’ la benedission de’n Santo, don Calabria, tornando po’ ne la so Sant’Ambrogio solo quando ghe I’à costreto l’età e le condissioni de salute.
Personalmente, no’ me desmentegarò mai ‘sta maraveiosa figura de Sacerdote che’l m’aveva dà I’inpagàbile tesoro de la so amicissia. ‘Desso, viçin al trono de “l’Altissimo”, contornà da tute le meiara de àneme che con amor e pietà cristiana I’à çercà e incontrà, sò che gh’è ci pregarà anca par mi. A revedarse, caro don Luigi!

Wanda Girardi Castellani