L’Angolo de la Wanda – Dicembre 1995 – “La Berlina”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“La Berlina”

A vedarla d’istà, con l’inmancabile fila de turisti a rinfrescarse i fruti, sentà sui bordi de la fontanina o, mèio ancora, nel periodo de Nadal, quando che par sotovia i ghe monta l’originalissimo presepio fato de sòche e de scòrse de albaro, no’ l’è facile inmaginarsela al tenpo quan’ che i ghe picava soto le teste de i giustissiadi!
La Berlina de piassa de le Erbe, ciamà anca “tribuna”, l’è piantà giusto in centro de la bela piassa del marcà, come un elegante soramobile, tra i banchi e i veci onbreloni taconadi, con, da ‘na parte la “Costa”, a pingolon del cavalcavia che unisse el palasso de la “Rason” a la Domus Aurea e, da quel’altra, el monumento deto “la tetona”, opara de Egidio Girelli, inalsà ne la piassa XIV novembre a ricordo del primo bonbardamento su civili, nel 1915.
L’è lì dal 1207, volù da Azzo D’Este e in prinçipio la g’avea in meso ‘na scragna de piera da ‘ndove el Podestà el riceveva la ciave de la çità. Da la Berlina vegnea anca leti i bandi a la popolassion, dopo che’l ‘Rengo el l’avea ciamà a racolta.
Soto el dominio de la Republica Veneta, durà, tra alterne vicende, dal 1405 a la metà del 17° sec…, soto a la “Berlina” se usava espor le teste de i condanadi a morte, par I’identificassion. Uno de i ultimi, l’è stà el brigante Falasco (del qual se semo ocupà su “Q.C.” n. 1 -1986).
In seguito, la Berlina l’è servì par i comerci, tanto che ancora su le colone se poI vedar i sinboli par la misura de le tele: “per” (pertega) – “bras” (brasso) e “passus”.
‘Sto monumento l’è anca ligà al ricordo de ‘na tristissima storia d’amor.
Fregnano Della Scala, fiol natural de Mastino II°, el brilava in Verona par la prestansa fisica e l’elegansa del vestir. L’èra inbatibile nei tornei durante i quai l’usava rancurar i longhi cavei fati a tressa, soto l’elmo. So papà l’èra orgolioso de ‘sto bel fiol cusì ardito, tanto che’l g’avea fato conferir el cìngolo de Cavalier da Obizzo D’Este fin dal 1345. Po’ el l’avea mandà a far el Podestà a Vicensa nel “’47”.
Ma Fregnano el g’avea se de ben altro potere e par questo el tramava con i Gonzaga de Mantoa e con Azzo Da Correggio par inpadronirse de la Signoria al momento bon.
Con falsi documenti, ‘profitando de la momentanea assensa del Signor, l’à persuaso la çità de la morte de Cangrande II° alontanando le milissie fedeli al Scaligero, fasendo entrar quele mantoane par po’ farse proclamar, lu, “Signore de Verona”.
Cangrande II°, deto, tra l’altro, “Canius rabidus” par via che l’èra pitosto carogna, avù notissia de quel che stava sucedendo, con un esercito de cavalieri brandeburghesi de la Val Sugana l’è calà a Vicensa, l’à ciapà-su le milissie locali e padoane e l’è pionbà come ‘na sita a Verona. Fregnano l’à conbatù da prode ma quando che’l s’à visto perso l’à çercà scanpo in Adese co’ ‘na barca. La storia la dise che ‘l s’abia rebaltà, ‘negàndose, ma l’è più probabile che “i l’abia… negà”! Fato stà che, ‘na òlta ripescado, el so corpo l’è stà picà-via a la berlina de piassa Erbe, ‘ndò che l’ è restà par un tòco, secondo l’usansa de i tenpi, a monito e ludibrio de la plebe. Ma la so dona, ‘pena che la l’à savù, l’è corsa a ‘brassarlo a le ganbe, sigando da farse sentir infin in Bra e i veci i conta che nissuno è riussì a destacàrghela, deventà mata par el dolor.

Wanda Girardi Castellani