L’Angolo de la Wanda – Dicembre 1996 – “Cantando sotto la Stella”
…a cura di Graziano M. Cobelli
gcobelli05@gmail.com
Quatro Ciàcoe: da Verona
“Cantando sotto la Stella”
El prossimo 21 de dicembre 1996, ale 15,30, ne la sala Vini de la Gran Guardia (piassa Bra Verona) ghe sarà la cerimonia de premiassion del concorso fato dal “C.T.G.” scaligero, in ocasion de la nona edission de: “Cantando soto la stela”.
El concorso fato ne l’intento de trovar testi novi in tema natalissio, da musicar, e adati ai buteleti, l’à visto la partecipassion de oltre 200 poeti triveneti con versi sia in dialeto che in ‘talian. Tra questi, ghe n’è stà selto 15: 7 in dialeto e 8 in ‘talian, po’ musicadi dal noto compositor, el salesian prof. don Mario Gonzo, insegnante de musica a l’Ist. don Bosco, autor de altre splendide raccolte (“Canti il Veneto con noi?”, “La bella Verona”, “Voria cantar Verona” ecc…). Le cansonete i è stà po’ cantade dal coro de i buteleti del “C.T.G. Insieme”, con le voci soliste de Enzo, Luciana, Lisa, Maria, Elena, Paola e Chiara. De tuto sto pò-pò de laoro è stà in fine parecià do cassete: una par el dialeto (7 brani) e una pa ‘l ‘talian (8 brani), reg. studio LOF, confessionade in una elegante scatoleta che la porta a I’esterno ‘na foto a colori de la Bra con la stela; celebre archiscultura de l’architeto Rinaldo Olivieri, sinbolo del Nadal e de I’anual rassegna mondial de i presepi nei còvoli de l’Arena, e a l’interno i 15 testi par poder mèjo seguir l’ascolto.
I poeti autori dei testi i è, par el dialeto: Rygier Segna Silvestrini (Treviso) “Soto la stela bianca”, Italia Bortoloso Fracasso (Villaverla-VI) “Le cante de nona Beta”, Berto Rossignolo (Verona) “Canta Nadal”, Wanda… mi (Verona) “Pan e ciocolata”, Iginia Fabi Lotto (Vicenza) “Un Nadale più vero”, Alberto Albanese Sr (Treviso) “Nina Nana bel bambin”, Adelia Anzi Battistella (Verona) “La pegoreta de lana”. In ‘talian: Wanda… mi (Verona) “Gli angeli piangono”, Andrea Cason (Treviso) “Toccami con gli occhi puri”, Claudia Ferraro (Pescantina-VR) “E gli angioletti di lassù”, Danilo Tonini (Schio-VI) “Un suono di campane”, Sandro Borchia (Bussolengo-VR) “Cantami o notte”, Gemma Bellotto (Cortelà di Vò Euganeo-PD) “Vecchia pastorella”, Osvaldo Noro (Puos D’Alpago-BL) “Filastroccadi Natale”, Luciana Ceresoli (Padova) “Cantano i cieli”.
Dopo la premiassion de i poeti, da la Gran Guardia, traversando i giardini, se trasferiremo tuti soto la stela dove, aIe 17,30, el coro dei buteleti del “C.T.G. -Insieme” l’eseguirà le cante premiade.
Ci fusse interessà a ‘verghe le cassete, basta che ‘l se rivolga, ala brava Luciana Ceresoli, uno tra i più “oiadi” motori de la manifestassion, presso la scola “Gaspare Gozzi” Via Montanari n. 55 Padova, o a la Cartoleria Salesiana de via Regaste san Zen, a Verona.
Wanda Girardi Castellani
