L’Angolo de la Wanda – Dicembre 2000 – “PAOLO MAFFEI; ‘na vita tra le stele”
…a cura di Graziano M. Cobelli
gcobelli05@gmail.com
Quatro Ciàcoe: da Verona
PAOLO MAFFEI; ‘na vita tra le stele
S’èrimo ne l’otantaçinque. El 18 de novembre, a Verona, ne la stupenda sala Maffeiana se consegnava el premio “Glaxo – Çità de Verona” a ‘na grande personalità del mondo sientifico; el prof. Paolo Maffei, catedra de astrofisica a l’università de Perugia.
Paolo Maffei l’avéa da poco regalà a la letura dei só fans, par la “Est-Mondadori” el volume “La cometa de Halley”; “esempio brilantissimo de divulgassion sientifica, opera de’n astronomo afermà in tuto el mondo par l’abondansa e la coretessa de l’informassion, la profondità del pensier, l’originalità e la sugestion del metodo espositivo”.
In ‘stó libro siensa e storia i è ligà a fil dopio in ‘na sintesi cultural che presenta anca tanti elementi de poesia.
El prof. Maffei, laureà a Firense, l’à lavorà nei osservatori de Arcetri, Bologna, Asiago, Amburgo e Catania dedicandose soratuto a ricerche de caratere osservativo, prima sul sol, po’ su le comete, nebulose e stele variabili. El s’à dedicà anca a ricerche de caratere storico: su la cartografia lunare, su l’ultimo conflito par l’afermassióon del sistema copernicano e a altre, in parte inedite. Dal 1963 al 1975 l’à svolto atività de ricerca a l’università de Roma e l’è stà’ uno tra i primi astronomi a dedicarse a le osservassioni nel viçin infrarosso, traverso le quali l’à scoperto dó galassie che porta ‘dèsso el só nome. El se dedica anca a ricerche ligà a l’evolussion de le stele e al studio de le stele variabili ne l’infrarosso.
L’è apartegnù a dó grupi internassionali per el studio del cel dal “Spacelab” e par quel de la cometa de Halley. Amirator de la natura sóto l’aspeto de la belessa e del mistero el s’à sempre dedicà con entusiasmo a la divulgassion de l’astronomia, traverso le riviste specialisade, la stampa quotidiana e periodica, la radio e la TV. Al tempo de la Halley, (la più celebre tra le comete, dal primo avistamento nel 240 a.C. fin al 30° passaggio ne la primavera de l’86) l’è stà ospite de Piero Angela ma anca de altri importanti programi de varie televisioni.
E ‘dèsso lassemolo parlàr lu co’ l’umiltà che contradistingue i veri grandi: “…spesso me fermo a vardar indrio e vedo quanto poco ò concluso de quel che avea intrapreso. Ò pensà de scrìvar la me autobiografia ma el titolo el dovarìa èssar: “La me vita e i me insucessi”. Si… ò scoperto do’ galassie che le porta el me nome, ò scrito tanti libri che i à vèrto nóvi orisonti a meiara de giovani. Ò portà l’astronomia in Umbria fondando un osservatorio e inviando un progetto che, se’l catarà continuadori, el sarà forsi la mèio realisassion astronomica in Antartide. Ò anca fato splendide scoperte che no’ ò publicado contando de rivàr al mèio, a la certessa, e ò laorà par dó volte ne la me vita a la realisassion de progeti ostacolà da la burocrassia e da l’incompression. ‘Na volta a Roma come brasso destro de Gratton, e ‘n’altra in Umbria dove ò speso 18 ani par costruìr qualcosa de importante, ò podù contar su persone che stimo.”
E mi, Wanda; formigheta ignorante, come ò fato a guadagnarme l’amicissia de ‘na simile personalità?
Quando sul giornal ò leto che i lo premiava a Verona són andà de corsa a la sala Maffeiana con quatro dei só libri; i più inportanti: “Al de là de la luna” – “L’universo nel tempo” – “I mostri del cielo” – “La cometa de Halley”, de la colana “Est Mondadori”, inbusà in un poco elegante sacheto de plastica, ne la speransa de fàrmene autografar qualchedun. Con mi è vegnù me fiol Flavio, acanito fan del Prof. e apassionà astrofilo.
Ghémo fato rivàr sul palco un masso de fiori co’ la firma dei “astrofili de monte Comun” (la località ‘ndove g’avèimo la specola e el telescopio) e lu l’è vegnù a ringrassiarne. Fata la conossensa, è partì, come par miracolo, ‘na interessante corispondensa che da alora no’ la s’à più fermà.
L’ano dopo quando, con la faméia, el Prof. l’è vegnù a Verona par la stagión lirica, mi e Flavio, con la nostra “127” i émo portà in giro par la çità e semo andà a pranso insieme a Castelvecio. Qualche ano dopo semo andà a catarlo noialtri a Perugia.
De tute le robe bele che g’ò ‘vù a ‘stó mondo, ‘sta quà l’è una tra le meio; ‘n’amicissia con un omo, un grandissimo siensiato, che l’è buséta e botón co’ l’universo;
Paolo Maffei… ‘na vita tra le stele.
Wanda Girardi Castellani
