L’Angolo de la Wanda – Dicembre 2001 – “AMIGO NINO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Amigo Nino

Tutti noialtri, a vardar ben, semo el “prodoto” de l’ambiente de fameia, de le nostre esperiense, de la scola e de i amiçi con i quai emo vissù e fato comunela, specie ne i ani de formassion.
Mi, a farme come che son, con i me pregi e i me difeti, oltre che me mama e me papà, i è stà du grandi personagi: el poeta napoletan Michele Bichelli, segretario del Cenacolo “Berto Barbarani” de fine guera, che ‘l m’à insegnà a conossar e apressar la bona mùsica, la bona poesìa e, soratuto, le bone leture, e, prima de lu, el buratinar Nino Pozzo, a l’ombra del qual, ne la stajon più bela, è fiorì come un sbaro de rose la me fantasìa.
De lu ò za parlà nel n° 1 de “Q.C.” del 1993 ma me par che sia giusto dedicarghe ancora un fià de atension e de spassio, dato che el 7 dicembre de ‘sto ano, se ‘l fusse ancora a ‘sto mondo, el compirìa 100 ani, essendo nato, apunto, el 7 dicembre del 1901.
‘Desso, da l’11 genar del 1983 el dorme el so sono eterno nel cimitero de Verona a du passi da me mari Severino che ‘l spartisse el ‘calto” col me primo neodin, Paolo, fiol del me Mirko e de quela brava butela de so moier, Annalisa.
Stamatina, son andà a dirghe ‘na Rèchia anca a lu; l’amigo Nino, ‘na persona che no’ me desmentegarò mai e che g’ò insegnà anca a me fioi a volerghe ben.
In un artìcolo de i ani ’50 el prof. Giuseppe Faccincani, una tra le meio pene del nostro giornal, “L’Arena”, el l’à definì “el Noschese dei buratinari” e dirla che’ sto nomìgnolo el se lo meritava propio parché el g’ avea in gola un straordinario strumento col qual el podea cambiar voçe come e quando el volea e l’era el vecio Pantalon “de’ bisognosi”, sempre drio brontolar, e l’èra la bela, dolçe Rosaura, l’alegro Fasolin, el semoloto Sandron “del bosco de sòto”, el tenebroso mago cusì: una voçe par ogni personàgio che ‘l metea in sèna. Ma Nino l’era anca un formidàbile ator e un omo colto.
No’ gh’è un momento de la me infansia che no ‘l sia entrà ne i me ricordi. Ne i ani Trenta el vegneva a farne gòdar col so “teatro del mondo piccino” a la sala dopolaoro de l’ Asienda Elètrica de viale Piave, dove che me papà l’à laorà fin a la pension. La festa più bela l’era al 13 dicembre, Santa Lussia, quando, oltre a vedar i buratini, se portàvimo a casa anca el “paco” de zugàtoli e dolçi, omagio de l’Asienda. De sòlito a mi me tocava el cavalin de cartapesta; bianco, co’ le gambe stenche piantà su la base a quatro rude. Ghe restavo sempre malòto e alora per consolarme sgataiolavo drio el palco de Nino e ghe fregavo la morte. Cissà-po’ parcosa quel bruto buratin el me piaseva tanto! Me ricordo che Nino quando che ‘l se incorseva del “sequestro” el vegnea a çercarme in sala. De règola me cucavo un sculasson da me papà anca se ‘l bon Nino, malgrado tuto, el me difendeva.
El mestier che ‘l saveva selto no l’èra tal da farlo sior, ansi, schei el ghe n’aveva pochi assè, pura, nei ùltimi ani, ogni tanto, par ricambiar i me inviti a pranso e a çena, el volea ofrime, a mi e a me marì, la çena in un ristorantin a du passi dal lussuoso “Due Torri”. EI m’à anca regalà un quadreto con tanto de dèdica e ‘na fotografia che me sa tanto cara. Me se vede mi, co’ la scuffia, el paletonçin col col de pelicia e Rosaura in brasso. Veramente mi volea la sòlita morte, ma Nino el m’ à piassà in brasso quela che l’èra la so più bela “atrice”. A vestirghe i buratini l’èra, fin che l’è vissuda, so mama, ‘na sarta formidàbile!
Dopo la fine de la guera el Comune el g’aveva dà l’incàrico de intrategner i butini nei ‘pena nati parchi-zughi citadini, cusì dal 1954 in su g’ò portà anca mi i fioi. Quando el me vedea el vegneva fòra dal gabioto e el me presentava al pùblico con ‘na caretà de complimenti. Po’ el me dimandava de recitar qualche poesìa. Par farghe piaser ghe n’ò scrito diverse adate ai butini cusì, quando che no ero presente… el le diseva lu, a memoria. Dopo la so scomparsa, con dei amiçi comuni ò fato un film, cusendo vari tòchi de vece pelìcole, in compagnìa anca de ‘n altro grande amigo e grand’omo: Toni Beltrami, el più noto e vecio ator del teatro veronese. Purtropo no’ sò che fine ‘sto film l’abia fato.
Beh… tute le altre notissie de Nino podarì andarle a lesar sul Q.C. de genar 1993.
Par intanto, ciao, vecio amigo, re de tute le rosarie, ricòrdete de mi, come mi me ricordarò sempre de ti… e, ogni tanto, al me neodeto che l’è lì a du passi, cònteghe una de le to bele fòle ma nò quela che a mi, cissà mai parcosa, la me piaseva tanto: “Fasolin nel soteraneo col morto”… nò, quela nò!
Dio, come avarìa voludo, Nino, poderte portar via, e par senpre, quel bruto buratin!

Wanda Girardi Castellani