L’Angolo de la Wanda – Dicembre 2004 – “LUIGI MOTTA emulo de Salgari, anca lú in desmentegón”

…a cura di Graziano M. Cobelli

gcobelli05@gmail.com

Quatro Ciàcoe: da Verona

LUIGI MOTTA emulo de Salgari, anca lú in desmentegón.

La matina de Santa Lussia del 1940, sveià da ‘n alarme aereo, corsa in cusina prima de andàr a ripararme in cantina ò catà con el tradissionàl “piato” (caramele, ofele, castagne ecc.) dú libri de aventure: “Le dó tigri” de Emilio Salgari e “El leopardo nero” de Luigi Motta. Strassi, sporchi, magnà da le tarme, co’ le pagine che ‘péna te i versi le va in olta come le foie de ‘n albaro in autuno, ‘sti dú libri ghe i ò ancora in biblioteca.
De Salgari ò parlà spesso su Q.C., anca parchè son stada mi, con n’insistensa durà 30 ani a farlo traslàr nel famedio del cimitero de Verona da quel buso desmentegà anca da Dio andó che l’èra logà dal 1911 (vedi Q.C. febràr 1986 e otobre 1986), ma de Motta no’ avèa speso ancora ‘na parola e el se ne merita çerto anca de più!
Nel libro che ò cità, gh’è pura un raconto curto che parte da pag. 155: “L’eroe del Transwaal” che m’è piasù assè! L’è ‘na storia de amor che se svolge nel Sud Africa al tenpo del sterminio dei boeri da parte dei inglesi. Si, rileséndolo ancó ò provà le stesse emossioni de quando ero buteleta e, o són restà la “candida” de alora (e a 70 ani la sarìa ‘na mèsa tragedia) opura Motta l’è stà decisamente un bon scritór!
Continuadór del genere salgariàn, Luigi, nato in quel de Bussolengo veronese nel 1881 e morto a Milan nel 1955, l’avea asocià el só nome a quel del concitadìn Salgari nel romanso “Naufragio dela Medusa”, ma po’ l’è stado autór par só conto de diversi romansi notevolmente bei.
Nel mentre, po’ Salgari, grande romansiér ma pessimo aministradór dela só arte, l’è stà tuta la vita tribulà dai debiti e massacrà dai editori, al punto che, stufo marso, l’à finì col farse, nela vale de San Martìn a le porte de Torin, el hara-kiri co’n rasoio no’ disponendo de ‘na spada da samurai, Luigi Motta, inveçe, de caratere simpatico e alegro, bon de farse valér e far anca ben i só conti, l’à savù sfrutàr al mèio el só laoro, fasendo grassi contrati editoriài, frequentando ambienti “in” e trascorendo lónghe vacanse nela riviera ligure dove che l’à coltivà importanti e valide amicissie. Tra l’altro, l’à tegnù corispondensa con càlibri come: Massimo Bontempelli, Gabriele D’Annunzio, Emma Grammatica e Giulio Verne.
El só stile narativo, manco esaltà, piassè “chieto” de quel de Salgari, l’à contentà più i papà e le mame dei buteleti. Insieme al spirito de aventura, nei só romansi: “El dominatore dela Malesia”, “L’ocidente d’oro”, “Le stragi del Gange”, ecc… trova posto sentimenti e trame dai intenti pedagogici.
Anca se l’avea aderì, par amor de chieto vìvar come bona parte dei italiani, al fascismo, Motta, che’l s’èra ritirà durante la guera nela só residensa de Montemarino, da le parte del Garda, el g’à dà aiuto e protessión a diversi prisonieri scapà dai tedeschi e a quei che no’ avea vossù aruolarse ne l’esercito dela Republica de Salò. Un só càncaro conpaesàn però el l’à denunciado ai “republichini” e ‘sti qua, el 4 febràr del 1944 i l’à incarcerà nel forte San Leonardo de Verona, po’ ala presón dei Scalsi dove ch’èra finì anca Ciano e conpari, e in seguito a Padova, a Venessia e po’ a Milan dove che l’è restà fin al 24 aprìl 1945.
‘Sta lónga e bruta esperiensa el scritór el l’à contada in un libro dal titolo “La grande tormenta” che però me risulta che nissun editór l’abia vossù finora stampàr.
Ingiustamente desmentegà parfin dala só Verona, de Motta è restà solo un busto confinà, in atesa de ‘na meio sistemassión, in un lógo de desbrigo dela biblioteca civica de via Capèl, tra casse sfondade, travi, scale e quintai de pólvar e el só nome su quela de la só natia Bussolengo.
Daltronde, ‘na mèio sorte no’ la gh’è tocà gnanca al pòro Emilio Salgari che a Verona (sempre pronta a esaltàr solo Barbarani) no’l g’à gnanca ‘na strassa de monumentìn, salvo, anca par lu, un picolo recente busto bronzeo ala Civica. Diograssia, però, de l’amigo Emilio se n’à ocupà almanco el bravo pitór e disegnadór umoristico Bruno Prosdocimi creando par Gardaland, a l’ingresso del celebre parco, ‘na splendida fontana atorno ala quàl gh’è riportà in rilievo sène dei più noti tra i só romansi.

Wanda Girardi Castellani