L’Angolo de la Wanda – Dicembre 2005 – “Al grande TENOR GIACINTO PRANDELLI el Premio “Giuseppe Lugo” 2005″

…a cura di Graziano M. Cobelli

gcobelli05@gmail.com

Quatro Ciàcoe: da Verona

Al grande TENOR GIACINTO PRANDELLI el Premio “Giuseppe Lugo” 2005

Aria de festa e de entusiasmo a Villa Vento, la sera del 30 giugno u.s., par la consegna del premio che anualmente vièn dado, in onor e in memoria del nostro “Bepi” Lugo, ai tenori che ha fato conóssar meio la lirica italiana nel mondo. Stó ano l’ormai prestigioso riconossimento rivà a la Xll edissión, l’è stà oferto al “Patriarca” dei tenori italiani; Giacinto Prandelli; famoso interprete del melodrama. Nato a Lumezzan de Brescia nel 1914, novantun ani… ma no’ se diria, infati, a colpo de ocio el ghe ne dimostra ‘na vintina de manco; drito, suto, lustro da farghe invidia a un giovanoto. Mi me lo ricordo ben quando nel 1946 l’à esordido in Arena a fianco de la Oneglia Fineschi ne la Traviata de Verdi. Mi e me papà erìmo rivadi un fià in ritardo… co’ le nostre brae “vetovaglie” (panetini inbotidi, fruti, sanpagnete e un fiascheto de vin) come ancora i usa far i veronesi, quei veri, ligà a le vece tradissioni. G’avevimo de tuto… manco i cussini che alora la Croce Verde no’ l’avea gnancora tacà a nolegiàr. Beh, emo catà posto solo da la parte de via Anfiteatro andove el sol l’avea ciocà tuto el dopodisnàr sora i scalini de piera, tanto che i èra deventà roènti. No’ semo andadi a ‘ròsto ma el dì dopo… no ve stago a contàr che ”corse”… e sensa i dopi-servissi!
Scalini broènti a parte, quela sera Giacinto Prandelli, magistràl Alfredo in ‘na memorabile Traviata, l’à conquistà tuti i veri amanti de la lirica tanto che quando nel 1950 l’è tornà par cantàr nel Mefistofele, s’à visto l’Arena piena-frasà!
Su la só longa biografia leso, tra le tante robe inportanti, che l’è stà’ el tenór preferido dal Maestro Toscanini… e digo poco!
El debuto el l’à fato nel 1939 al teatro Verdi de Busseto; come a dir che l’è partido subito col piè giusto!
Ne la só longa e strepitosa cariera Prandelli l’à cantà con tuti i più famosi artisti de l’opera mondiàl, come: I soprani Toti Dal Monte (madrina, tra l’altro, del giornàl trevisàn de poesia “El Sil” direto da l’amigo Andrea Cason), Rosetta Pampanini, Pia Tassinari, Gina Cigna, Magda Olivero, Maria Callas, Renata Tebaldi, Rosanna Carteri ecc… – I mezosoprani: Gianna Pederzini, Ebe Stignani, Fedora Barbieri, Elena Nicolai, Adriana Lazzarini, Giulietta Simionato, Fiorenza Cossotto, ecc… Soto la diressión dei maestri: A. Toscanini, Victor De Sabata, Gianandrea Gavazzeni, Tullio Serafin, Francesco Molinari Pradelli e tanti altri. El s’à po’ esibito nei meio teatri d’Italia e del mondo: La Scala di Milàn, el San Carlo di Napoli, la Fenice de Venezia, el Metropolitan de New Jork, el Strine Auditorium de Los Angeles, l’Opera–House de San Francisco, el Colon de Buenos Aires, ecc…
L’à cantato par ben 31 anni e el só repertorio el comprende oltre 70 opere. Ma ‘na fila lónga assè i è po’ i concerti che l’à dado in tuto el mondo!
Le só più aplaudite interpretassioni i è stade: ne l’Adriana Lecouvreur, ne la Francesca Da Rimini, nel Mefistofele, ne la Fedora, la Boheme, e la Butterfly.
Giacinto Prandelli el g’à inoltre un bon spassio nel libro di Ettore Campogalliani: “Storie di voci “sacre” e di pensieri profani… per i sentieri dell’opera” (ed. Dongiovanni Bologna 1982-pag.83).
Ne la bela cerimonia che s’à svolto a vila Vento, dopo aver fato sentìr al publico qualche bela incisión co’ la voçe del festegiado, a consegnàr la targa (co l’incisión de la figura de Giusepe Lugo sul sfondo de l’Arena, firmà da l’instancabile “deus ex machina” de tute ‘ste manifestassioni, el Maestro Luciano Pollini), al vivacissimo tenór novantunène, l’è stà’ la só “colega” de tante rapresentassioni; Adriana Lazzarini, sempre bela e eternamente giovane, afiancà dal paron de casa, comm. Giuseppe Pezzini. E… dopo… s’à snoselà el concerto, naturalmente ‘vèrto come ogni ano, da ‘na incisión de Lugo ne la celebre “cansón al vento”.
Presentadi dal bravo Roberto Alloro, à cantado: el soprano Alessandra Rezza, el tenor Piero Giuliacci, el baritono Carlo Kang e el basso Marco Paoluzzo. Al pianoforte, Maria Cristina Orsolato. Ne l’intervallo s’à esibì le brave balarine del Centro studi teatrali “Centrepoint” par la coreografia de Pia Sheridan.
Durante la cerimonia à parlado de la carriera de Prandelli dù tra i più ativi menbri del nostro Comitato: el Sig. Gianni Zatachetto e ‘l Prof. Marco Materassi.
El tuto seguì con tanta atensión, ma anca con tanta comossión, dal festegià e da la só bela e elegante Signora.

Wanda Girardi Castellani