L’Angolo de la Wanda – Dicembre 2006 – “MEDIOEVO PROSSIMO VENTURO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

MEDIOEVO PROSSIMO VENTURO

Cusì se intitola un celebre libro de E. Vacca; gran bel titolo, paraltro superà, parché nel medioevo ghe sémo zà drento infin al còl!
In un altro articolo g’ò ‘vú modo de pontàr el déo su la selva (nera) dei maghi e de le strie che ne prospera intorno, fasendo schei a capelade. Gh’è quel nùmaro da circo del mago Othelma, gh’è quel de Benevento, quel de Arcella, quel de San Remo, quel de Canicatì, e gh’è quei minori de Camacìci, de Perétola, de Rosegafero ecc.
La magia la pól èssar egissiana, dei druidi, mesopotamica, dei Rosacroce e via discorendo e i maghi i se serve; ci de l’ordine ermetico de la Golden Dawn, ci del sciamanesimo, ci de l’Abramelin, ci de la numerologia, ci de la “clavicula de Salomone”, tra magie bianche, nere e soratuto sessuali, messe sataniche e, ci ghe n’à più ghe ne meta. Un esercito de gente la va in olta portando al còl o in scarsela amuleti de tute le forme, dal più celebre, napoletanissimo corneto a la più stramba de le croçi, convinti de èssarse cusì messi al sicuro contro tute le rogne. Mi ‘ste robe le m’à sempre incuriosì parché la sempiàgine umana ligà a la superstissión, la spassia a l’infinido come i númari. Beh, ‘na note de qualche tenpo fa, dopo un programa TV, son corsa a controlàr el lunario, che par caso, inveçe che nel terso milenio, no’ fussimo ancora a l’epoca de l’inquisissión. “Indemoniade” che le descriveva el “maligno” come ‘vérghelo lì. Preti esorcisti, psicanalisti dacordo con st’altri nel crédar a ‘ste bàbole del diàolo, ansi, “i diaoli”, parché miga se presenta sempre quelo, come miga el se presenta ne la stessa vesta, pur avéndoghe la costante del segno “666”, marchio de la bestia, el muso, corni, sòcoli, barbeta e coa rigorosamente da beco. Lù el viaja soto diversi nomi: ‘na olta l’è Belzebù (re de le mosche) ‘n altra òlta l’è Baffometto (che almanco l’è un nome simpatico che me fa scapàr da rìdar), pò: Demonio, Farfarello, Satana, Mefistofele e principe de le tenebre, tanto che vièn fato de dimandarse se inveçe del diàolo no’l sia par caso un bancarotiér che à fato féte. Naturalmente, (presentandose vestì da frate o da prete) el se ocupa esclusivamente de done a le quàle de spesso el ghe fa anca la “festa”; i omeni i è al sicuro par quante vacade che i fassa (unica ecessión el Faust, che paraltro l’è riussì a tirarghe a la fìn un trépo, mandandolo in bianco).
A la TV, un prete interogà in proposito, con un soriso sodisfàto come uno che vardando al lùni la schedina el se inacorsa de avèr centrà un 13 de quei furbi, l’à dito: “el diaolo el va da le done parché el se serve de lore par tentàr l’omo!” (pòro inocente) Mi no’ ò capì però che rassa de laoro da c… el fassa ‘sto sèmo de diaolo entrando ne le done, se de solito pò le “possedute” le siga come le anguane, le spua rospi, panaroti e pantegane, le gòmita verde, le spussa come tombini, le sacramenta a maneta ogni òlta che le vede un prete, ‘na cesa, ‘na croçe o se i le spiansa de aquasanta e le diventa brute come el pecato mortàl. Insoma, no me par che ‘sti quà i sia numari boni par tentàr i omeni! Dirìa se’l diàolo el le fasesse deventàr tute de le Carmen Russo, de le Alba Parietti o de le Cicioline… bah, che’l demonio el sia un fià “testa da pero” ghe n’ò vù el sospeto fin dai tempi de le rosarie de me papà. Paraltro, devo confessarve che, pur essendo pitosto sètica, dopo la trasmissión sudeta, quando son ‘ndà in leto ò cassà la testa soto la trapontina pronta a bàtar el rècord de Menèa al primo rumór poco ciaro! Par fortuna el giorno dopo, a mesodì, su canàl 5 sémo passà dai diàoli ai gnomi! Gh’èra una che la giurava de avérgheli ne l’orto e la l’à descriti par fil e par segno: fisico, abitudini alimentari (i fa le tortine de crema e i ghe le fà tastàr) e, manco a farlo aposta, sessuali. A interogarla, con tuta serietà, gh’èra un presentador che’l s’avarìa meritado ‘na medaia da chilo solo par èssar riussì a no’ rodolarse sul paimento da le sganassade. Gh’è da dir che ghe l’ò anca mi n’amiga che la giura de ‘vérghe i gnometi nel campo ma la vive sola, fora de man tuto el tempo de l’ano e g’ò el sospeto che ghe piasa anca el goto!
Se’l discorso dei gnometi el m’à fata rìdar e riportà al tempo quando che, a 5 ani, ghe credéa anca mi, quel’altro del satanismo el m’à inveçe mandà in bestia! Va ben che ‘sti quà i è tenpi scuri ma almanco la TV nassionale la dovarìa ocuparse de robe più serie e ghe ne sarìa tante! Me mama pò’ la sostegnéa che i angeli e i diaoli gh’i emo quà intorno; i primi i è i omeni boni, i secondi quei cativi. In quanto a esorcismi (un campo andó parfìn la Cesa l’è divisa), credo che i unici eficaci i sia: i carabinieri o un bon randèl de drio a la porta, da sostituìr prossimamente (se sèita ‘sta ànda) co’ ‘na lupara o, meio, co’ un bazùca.
A ‘sto punto ghe sarìa da dir dó parole anca sui ‘stròloghi (specialmente sui vari Fox, Branco ecc. de la TV) e sui guaridori. Da uno de ‘sti ultimi ghe son stada anca mi nela speransa de liberarme de ‘na bruta siàtica. ‘Sto mago (ricercatissimo e caro inpestà) el disea de èssar ispirà diretamente dai bonzi del Nepal. Mi, a èssar sincera, de bonzi no’ ghe n’ò visto gnanca uno ma de gonzi, quei si; tanti e tuti col portafoglio a fisarmonica in man. In quanto ai ‘stròloghi, a scoltàr me fiol Flavio (che ‘l se interessa de astrononia che l’è tuta ‘n’altra roba) i è tuti ‘na mànega de palchisti-balonari che, paraltro, stranamente, i se tira drio ‘na brìgola de gente, anca de cultura, che gnanca i se alsa dal leto la matina se l’oroscopo no’l ghe dise che l’è ora.

Wanda Girardi Castellani