L’Angolo de la Wanda – Dicembre 2007 – “Veronesi tuti mati… sanzenati anca de più!”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Veronesi tuti mati… sanzenati anca de più!

Dopo un longo tira e mola, un par de ani fà è stà finalmente inaugurado el monumento al poeta Berto Barbarani, opera del scultor Finotti. Promotor de ‘sta inissiativa è stà el Circolo de poesia “Vita Veronese”, presiedudo dal celebre cogo-poeta Giorgio Gioco. La spesa… pitosto ciossa, l’è stà racimolada co’ le oferte de istituti de credito, circoli e vari estimadori del nostro poeta “numero uno”.
‘Na olta fusa, po’, la sistemassion de la statua l’è stada fonte de altre discussioni: gh’era ci la voleva a san Zen, ci in altri loghi. A la fine à vinto la fassion de quei decisi a metarla sul canton del marciapie, tra via Capel e via Cairoli, giusto de fronte a la piassa Erbe.
Subito l’opera messa lì a intrigar el passegio I’à caturà la curiosità de i turisti, la magior parte costituì da giaponesi che, armadi de tuti i tipi de machine fotografiche i fotògrafa tuto quel che i vede, anca quel che no’ i sa cosa che ‘l sia. De sicuro, par quanto che noialtri veronesi lo tegnemo in considerassion, penso propio che la fama del nostro Berto no’ la passa i confini del Vèneto.
Inoltre el novo omagio de Verona al so “Vate” no’ l’è che ‘l ghe sia piasù propio a tuti! Fasendose portavoçe de tuti quei che à scurlà la testa perplessi… ‘na çerta Dele de la Resela ga dedicà al monumento sta “pasquinada”:

MONUMENTO (del cuccurucù) a BERTO

“Du oci spirità che varda sbiesso
a l’ombra de ‘n capel che par ‘n’ombrela.
Come davanti ai s-ciopi de ‘n ploton
l’ofre el pèto tirando la patela.

Fassò da ‘n grembialoto da pitor.
Do fanghe a la “Charlot”, braghe a salame…
da drio la schena spunta un bastonçin
imparentà a ‘n osseto de polame.

Par tera gh’è un colombo parchegià
che ‘l speta a farghe in testa i so mestieri;
I’inmancabile omagio, pure a Berto;
quel stesso de i “coleghi” a I’Alighieri.

E a proposito de la bagolina (vedi osseto) che ‘l tien de drio la schena: du giorni dopo i ghe I’avea bela e che rota! Intanto a san Zen, tra i proneòdi del mitico barbaranian, Minico Bardassa, bojeva mugugni e malcontento. A la fine i à pensà ben de organisar anca lori ‘na Coleta par farse in casa a so volta un monumento o almanco, che sò… un’erma, un busto; ‘na làpide, ‘na piereta… calcossa!
Dài e dài, el busto i è riussì a ‘verghelo con sistemassion in via Fosseto, ne i giardini de I’AGEC. La targa in bronso la porta ‘sti “versi” a firma de Luciano Paolini:

Anno Domini 9-10-2006
“Sessant’anni son passati
Or qui più non giaci.
Lasciasti il suoI terreno
per riunirti con i più Avi tuoi.
Or che sei stato derubato
sei più amato, sei conteso
perduri nel tempo caro poeta
le tue odi alla veronesità.”

Il rione di san Zeno ti ricorda.

Solo che anca questo no’ I’à incontrà el gusto de la gente de san Zen la qual, a ‘sto punto, I’à manifestà el so parer, esponendo davanti al Bar un altro “monumento” consistente in un basa mento che inveçe de star rasotera el sostituisse el busto del poeta del qual manca pure la testa. In compenso da soto al deto basa mento vien fora un par de gambe con tanto de braghe. AI posto del colombo… ‘na bossa de scabio.
Su le face del cubo se pol lesar varie scrite, del tipo:

“e pensar che sarìa bastò scrìvar: San Zen che ride e paparele calde”.

Su ‘n’altra facia:

“Or qui non c’è un Barbagianni come te
Or che sei sensa schei voresti adoperare i miei.
Or che sei stato derubato di busto e testa
con le sole tue gambe noi facciamo festa.”

I sanzenati tuti mati

Sì, parche se l’è vero el moto “Veronesi tuti mati…” quei de san Zen, “cor de Verona”, el matesso i ghe I’à dopio!

Wanda Girardi Castellani