L’Angolo de la Wanda – Dicembre 2008 – “ARFIO ASSASSIN”

…a cura di Graziano M. Cobelli

gcobelli05@gmail.com

Quatro Ciàcoe: da Verona

ARFIO ASSASSIN

 

El me amigo Angelo (che’l Signor ghe l’abia in gloria), el contava in giro che sóra de la me casa no’ volava più nessun usèl, dato che a forsa de magnàr aio avea tanto impestà l’aria de ‘ntorno che se qualche rondena o qualche passaroto i s’avesse ardegà a passàr da ‘ste bande i sarìa cascà-zó come piombi.
Mi la me parea ‘na esagerassión ma par èssar sinceri gh’è da dir che nel me apartamento a l’ultimo pian no’ gira da ani ‘na mosca, na sdinsala, un mussolìn. Vuto védar che l’è proprio a causa del me arfio?
Angelo (sempre lu) el ghe zontava che de sicuro col me fià in tempo de guera avarìa abatù anca i arioplani meio de la “Tosca”, overo la contraerea de le toresèle, cusì ciamada in quanto, come l’eroina pucciniana “non fece mai male ad anima viva”.

Che l’aio el me piasa l’è un fato risavudo. El me piase coto… el me piase cruo…el me piase soto oio. Praticamente ghe lo meto dapartuto salvo che nel cafelate.
L’origine de ‘sta pianta importante l’è in discussión; gh’è ci la mete in Sicilia, ci in altri loghi ma i più in India. Ne la storia de l’omo la coltivassión de l’allium sativum la risàl al neolitico. I è meiara de ani che l’è conossudo, insieme col sal, come el primo condimento.
In Egito l’èra dado in pagamento ai operai e ai schiavi che costruiva le piramidi. Aio e séole i servia a nutrìrli e a darghe la forsa de soportàr le só immense fadighe.
Anca i greci i tegnéa in bona considerassion l’aio pura se i le ciamava “fetido”. Durante le Olimpiadi gh’èra l’usansa de farghene magnàr un spigo ai atleti prima de le prove e, da parte sua, Ippocrate, celebre dotór vissù nel V sec. a.C., l’à studià a fondo le virtù de sta pianta che la pol curàr diversi mali, oltre a profumàr e a darghe gusto a la cusina. Ne l’Odissea, canto X, Mercurio po’ trasformandose in un buteleto el ghe dà a Ulisse ‘na testa de aio insegnandoghe a usarla contro i filtri de la maga Circe.
A sfoiàr la storia de l’aio gh’è da inpenir un messàl! L’èra usado a la grande anca ne l’antica Roma pura se l’èra ‘doparà più che altro da la plebe. Orazio adiritura el lo odiava a causa de’n pranzo tuto a base de aio che’l g’avea oferto Mecenate. Era sucesso pò’ che Lidia, la dona che’lu l’amava, dopo aver sentì el só fià la ló avéa molà par sempre.

Catemo in seguito l’aio in tute le epoche, doparà in cusina e in medissina dove l’è usado sora tuto par sbassàr la pressión. L’è inoltre un disinfetante potente. Messo taià a fetine su i cali el te libara pura da quei. Tra i mile usi che se ghe ne pol far, gh’è anca quel de aiuto contro l’insonia; bisogna bóiar un bicer de late con dentro un spigo de aio, e quando el leva el boio, se cava el spigo e se beve el late (stando atenti a no’ broàrse).
Prima de tuto l’aio el va tegnudo dentro a n’aliera de tera cota con dei busi tuto intorno parché possa girar l’aria.
La só morte l’è la bruscheta: se taia dele bele fete de pan e se le mete su ‘na griglia o drento al forno a brustolarse pò’ se le sfrega co’ l’aio, se le bagna de oio, par po’ spalmarle de pomodoro, péar e sal.
D’inverno, quando fioca le costipassioni e le bronchiti se g’à da far un brodeto legero de verdure con la zonta de ‘na diesina de spighi de aio ben pestadi insieme a mandole e nose. Prima de servir ‘sta minestra sora dele fete de pan, condirla con oio vergine de oliva.
E ècove ‘na minestra provensal par 6 persone: 6 cuciari de oio vergine, ‘na testa de aio cota e pestada. Apena che l’aio l’à ciapà color se ghe zonta du litri de aqua e un masseto de erbe (parsemolo, aloro, ciodi de garofolo, salvia, péar e timo. Far bóiar tuto par diese minuti e servìr su tochi de pan vecio.

Invesse d’istà quando el caldo el tól la fame, se fa bóiar del riso e dopo averlo scolà se lo condisse con ‘na salsa fata de oio, du spighi de aio, parsemolo e limon… e no’ desmenteghemose del famoso “bìgoli, oio, aio e pearonçìn”. Me mama metendo in asedo dei spighi de aio pestadi con péar e ciodi de garofolo, in un par de setimane la podea portàr in tòla un asedo aromatico bon da pociarlo col pan! Anca l’oio el diventa un condimento piassè gustoso se se ghe zonta ne la bossa qualche tocheto de aio!
L’aio el g’à inportanti virtù antibiotiche, antisetiche e l’è un potente batericida, vermifugo e diuretico. Dai ultimi studi pararìa che’l servisse adiritura par la prevensión dei tumori del stomego e de l’intestin.
L’aio el fa ben quasi par tuto… quasi, parché, par esempio, l’è sconsiliado a le done che lata parché el late el ciaparìa un gusto poco gradido ai bocia. No’l va ben gnanca par i diabetici e par ci g’à mali de pèle.
Inveçe, ci g’à mal de denti el pol catàr solievo sguaratandosse con asedo boido con un spigo de aio. Altro rimedio: un fagotìn de aio pestado serà in ‘na garseta, infilà ne la recia o, se el dente l’è carià, métarghe sora ‘na fetina de aio.
Ma ‘sto miracoloso “re de l’orto” el serve pure par fermàr la caduda dei cavei, frissionandose la testa un par de volte a la settimana con ‘sta lossión: 10 grami de aio pestà messo par 20 gg. in 100 grami de alcool a 60 gradi. Par butar zó la cicia basta magnàr dele bele salatone de aio, cucumari, carote e parsemolo mentre par liberarse dai brufoli se g’à da far bóiar ‘na testa de aio nel late e bagnarse con quelo la parte infeta.
In finis… l’utilità de l’aio come afrodisiaco.
I conta che Enrico lV el sia stà’batesà con in boca un spigo de aio e che se sospeta che ‘l fusse sta questo el motivo de la só “potensa” tra i ninsói. D’altronde tuti savemo che anca el Re Sole, acanido consumador de aio l’è passà a la storia come un campion ne “l’ars amandi”.
Gh’è da dir che se se vol aumentàr l’efeto l’è bona regola potensiàr l’aio con sedano a santoregia.
Quando pò’ se presenta un qual problema, se catarà sicuro rimedio frissionandose co’ l’aio la parte bassa de la spina dorsàl e… in casi estremi, anca qualcos’altro.
Oltre a l’aio g’à la so utilità anca la tressa andó l’è tacado respirandoghene el vapor dopo averla boida.
De tresse de aio da un poco de tempo in qua ghe n’ò sempre par casa… primo parché i è decorative, pò’ parché la me badante l’è ‘na romena de la Transilvania… e no’ vorìa ‘na qualche note catarme un smorsegón sul col e du denti cressui.

Wanda Girardi Castellani

***

Foto da Google

***