L’Angolo de la Wanda – Dicembre bis 2003 – “WANDA: UN NOME IN CIELO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

WANDA: UN NOME IN CIELO

Adesso xe uficiale: la scritrice veronese, nostra colaboratrice, WANDA GIRARDI CASTELLANI, no la xe più solo famosa in tera, ma la lo xe anca in cielo, tra stele, pianeti, quasar, galassie e asteroidi. So fiolo Flavio, bancario de profession, apassionà de astronomìa da quando el gavea oto o nove ani, ne l’osservatorio “Pleiade” de Pescantina, el xe riussìo a individuare 16 corpi astrali, non ancora segnalà da altri e de questi ghe xe stà riconossùa la “paternità” de ben 11 pianetini.
La scoperta xe del 1998 e ghe ga vossudo fin ‘desso par avere el riconossimento da parte de l’Unione Astronomica Internazionale, l’ente che catàloga i corpi celesti. In passato, Flavio Castellani el ghe gaveva dà el nome Giulio Verne anca a un cratere lunare, a uno su Marte e a un pianetin. Sta volta el xe stà autorisà a dare tri nomi. Cussì el ga fato: uno a Francesco Bianchini, astrònomo veronese (1662-1729), un altro a Emilio Salgari e, sorpresa!, uno a so mama Wanda Girardi.
Na gioja grande, emozionante, savere che quel corpo celeste, che ga un diametro de circa diese chilòmetri e che gira intorno al Sole a na distanza de 400 milioni de chilòmertri, el se porta in giro el to nome, scrito par senpre su le mape celesti. Anca se ormai la nostra “Wanda” la xe… in òrbita, oltre el sètimo cielo, ghe mandemo istesso le nostre congratulassion, da darghe anca al fiolo Flavio pa ‘l traguardo sientìfico ma anca pa ‘l gesto d’amore par so mama.

Mario Klein