L’Angolo de la Wanda – Dicembre ter 1995 – “«S. PIO X» …EL PAPA CHE À “LICENSIÀ” PAR SENPRE LE VOÇI REGINE”.
…a cura di Graziano M. Cobelli
gcobelli05@gmail.com
Quatro Ciàcoe: da Verona
So’ ‘ndà a védar al cine “Farinelli” e m’è vegnù la curiosità de savérghene de più, cusì, raspando-raspando e contro ogni prevision, m’è saltà fóra un Papa…
“«S. PIO X» …EL PAPA CHE À “LICENSIÀ” PAR SENPRE LE VOÇI REGINE”.
In ‘stó secolo de Patriarchi de Venessia ch’è ‘ndà al soglio pontificio, ghe n’è stà’ tri e ogniun, par el so verso, l’à lassà un segno fóndo ne la storia de la cristianità.
Al conclave che s’avéa verto el 1° agosto 1903 par darghe un sucessor a Leone Xlll, al 3° scrutinio, malgrado el parer contrario de Ceco Bepe, el favorì l’èra ancora el Cardinal Rampolla anca se gh’èra ci ghe preferiva el Cardinal Gotti.
Sóto-sóto però za se stava profilando la candidadura del Patriarca de Venessia, Giuseppe Sarto.
Un conclave pitosto turbolento, tanto che pàr che ghe sia stà’ adiritura un “tentativo de intimidassion par via de velen” (secondo Giancarlo Zizola). Vera o no, velen o pì senplicemente un qualche piato ‘ndà de mal, resta el fato che ‘na çinquantina de cardinài ‘na note i è ‘ndà intorno fin matina col bocal, dovendo pò’ ricórar ai spissiài.
El nostro Bepi Sarto a quel conclave el gh’èra andà col so bravo bilieto feroviario de andada e ritorno convinto de no’ averghe i numari par deventar Papa, tanto pì che, oltre al so dialeto trevisan, el s’avéa parlar, come unica lengua strània, l’italian!
Da’l resto, come pì tardi ‘n altro grande Patriarca deventà Papa; Giovanni Roncalli, al papato lu no’l ghe tegneva un granché, ansi, tanto l’è vera che a un dato momento vedendo aumentar le so quotassioni, l’avéa esclamà: “Par l’amor de Dio, desmenteghève de mi che no’ gò le qualità par far el Papa!”
Al 7° scrutinio, el 4 de agosto, finalmente elèto, l’à po’ sbassà la testa e piansendo l’à dito: “Acèto, come se acèta ‘na croçe!” Papa Giuseppe Sarto; Pio X, l’èra, come émo dito, un veneto puro sangue, trevisan de Riese ‘ndó l’èra nato el 5 giugno 1835, giusto 160 ani fa, da ‘na faméia numarosa. So mama la cusìva in casa e so papà l’èra ussier comunal. El pan l’èra scarso ma la Fede l’èra tanta, cusì, fin da buteléto, l’avéa sentì, forte, a ciamarlo la voçe de Dio. Dal seminario de Treviso l’è vegnù fóra prete a 23 ani e la so prima parochia el ghe l’à ‘vuda a Tombolo, nel padoan.
Nel 1875 l’è tornà da le so parte, a Treviso e in seguito l’è deventà Vescovo de Mantova. Par la so umiltà e povertà che’l lo portava parfìn a rifiutar la tònega bordà de rosso, de lu la gente à dito: “El xè vegnù co’ la vesta brisa / e ‘l xè partìo sensa gnanca la camisa”. Nel 1893 quando che l’è andà a S. Marco, subito, par jutar i poaréti de Venessia l’à mandà al monte de pietà parfìn l’orolojo d’oro rinunciando anca a la capa cardinalissia nova, contento de portar quela vecia del so predecessor, lavà e giustà da so sorele.
Da la catedra de S. Marco, passà a quela de S. Piero, no’ l’à canbià né abitudini, né prinçipi. L’è stà el primo Papa a abolir el plurale majestatis e l’abitudine de aplaudirlo quando che in Vaticano l’andava in publico: “No’ l’è miga giusto aplaudir el servo in casa del paron!”.
Gnente guardie de note a la porta de la so stansa, parché: “Ànca le guardie le gà el dirito de andar a dormir!”, e gnente racomandassioni e privilegi par parenti e amiçi. Spiritoso come tuti i veneti, a uno che l’èra ‘ndà a dimandarghe el “capel cardinalissio” par un amigo, el gà risposto: “Lu l’à sbalià indirisso… mi no’ son miga un capelar, son solo un “sarto”.
A ‘na veceta che, basàndoghe l’anel, la ghe dimandava: “Come stàlo, Santità ?” el gà risposto subito: “E come vólla che staga? Da Papa!!”
Nel 1903 con la celebre “motu propio” su la musica, l’à decretà tra l’altro l’abolission dei emuli de Attis, overo dei “Farinelli”, ripristinando ne la Cesa el spirito del concilio de Nicea (325) che a quel tenpo l’avéa aversà (par po’ acetarla par secoli) l’abitudine de castrar i buteléti par formar dei sopranisti. Sbufando, Papa Pio X, l’èra sbotà: “Ma no’ gh’è miga bisogno d’èssar castradi par poder cantàrghe ben le lodi al Signor!”
Par el resto, paraltro, Papa Sarto l’è stà un antimodernista e un conservador de la forsa de çento cavài, basta lésar una de le so encicliche: “Pascendi” (1907). El Fogazzaro che’l gh’èra ‘ndà contro, sentendo aria poco salubre, l’avéa fato marcia ‘ndrio de corsa, salvàndose in corner ma tanti altri (specie preti) manco furbi de lu, i g’à rimesso, ci la tònega e ci de pèso.
Nel 1912, Pio X l’à istituì el studio del Catechismo con dimande e risposte, in preparassion a la prima comunion; un uso che l’è durà fin al Concilio Vaticano 2°.
Òmo, oltre che sensa macia… sensa paura, a l’ambassador austriaco che nel 1914 el ghe dimandava de benedir le trupe austro-ungariche, el g’à risposto forte: “Mi benedisso solo la pace!”; un ato de coràjo sensa precedenti, prima, e po’ mai imità.
Pochi mesi dopo, el 20 agosto 1914, a la vigilia de la grande tompesta, l’è morto e ‘dèsso, col spirito ne la gloria dei altari, el so corpo, sensa ponpa ne monumenti, el riposa ne le grote vaticane.
Wanda Girardi Castellani
