L’Angolo de la Wanda – Febbraio 1996 – “El protetor de i morosi”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“El protetor de i morosi”.

El mese de febrar l’è assè inportante! Figureve che al 24, soto el segno de i pessi, son nata mi!
Comunque, ò invià el discorso su ‘sto mese par rivar al Santo che se ghe festegia, el giorno 14: Valentin, protetor de i morosi.
A trent’ani l’èra za vescovo e l’è scanpà fin a çent’ani par po’ lassarghe la zàgola soto el sigureto!
‘Na vintina de Paesi, solo in Europa, i rivendica el possesso de le so relichie (qua: Roma, Venessia, Udine) tanto che gh’è da pensar che’l fusse stà grando come la statua de la libertà.
Quanto a le legende che gh’è fiorido intorno; anca qua ghe n’è ‘n bàito. La più credibile l’è però ligada a la çità de Terni, in Umbria, dove che Valentin l’è nato intorno al 170 d.C., el gh’è stà ordinà prete a soli vint’ani e a 30 l’à podù indossar la mitria vescovile. I conta che’l g’avesse avù miracolose qualità taumaturgiche; co’ un solo gesto de le man el guariva i maladi, el ghe ridava la vista ai orbi e l’ndrissava i gobi. Ma lu, al contrario de i pranoterapeuti de ancò, no ‘l ciapava un bèsso, tanto che fora de la porta el g’avea de quele processioni de maladi che no’ finiva più. La so specialità, però, l’era quela de comodar i problemi de cor, metendo pace tra le copie in crisi.
Bastava che i sposi o i morosi de rota i parlasse con lu e tuto andava a posto e Valentin, a paçe fata, el ghe donava po’ un fior che l’ èra destinà a no’ spanirse mai, in ricordo de la riconciliassion.
La notissia de i so miracoli la gh’è rivà a le rece de l’imperador Claudio che subito el l’à ciamà a la capitale. ‘Sto vecio quasi çentenario, che ‘l parlava senpre d’amor e che ‘l difendeva i cristiani, el g’à parso un pericoloso ronpitògne; un mato da cavar-via da le spese e ‘l l’à subito fato impresonar. Ma anca da la galera Valentin el seitava a ocuparse de la gente e specialmente dei inamoradi, procurandoghe parfin la dota a le butele più pitoche. A la fin, tuto ‘sto amor cristian el gh’è costà la pèle. San Valentin l’è stà decapitado a Roma, el 14 de febrar, probabilmente tra el 267 e el 270 d.C.
E ‘desso, quando scade ‘sta data, ricordève de darghe a le vostre done, ai vostri òmeni, se propio no g’avì schei o se sì un fiantin de la pigna, almanco un baseto che no’l costa gnente, disendoghe pura ne ‘na recia: “Te voi ben”.

Wanda Girardi Castellani