L’Angolo de la Wanda – Febbraio 1998 – “Diàoli e gnometi”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Diàoli e gnometi”

Cusì se intitola un celebre libro de E. Vacca; gran bel titolo, paraltro superà, parché nel medioevo ghe semo za drento infin al còl! E se n’à inacorto pulito tuti quei che el du de marso, a le 10 e vinti de sera i s’à sintonisà su RAI 2, a Mixer.
In un precedente articolo g’ò ‘vú modo de pontar el déo su la selva (nera) dei maghi e de le strie che ne prospera intorno, fasendo schei a capelade. Gh’è el mago de Benevento, quel de Arcella, quel de San Remo, quel de Canicatì, e gh’è quei minori de Camacìci, de Perétola, de Rosegafero ecc… La magia la pol èssar egissiana, dei druidi, mesopotamica, dei Rosacroce e via discorendo e i maghi i se serve; ci de l’ordine ermetico de la Golden Dawn, ci del sciamanesimo, ci de l’Abramelin, ci de la numerologia, ci de la “clavicula de Salomone”, tra magie bianche, nere e soratuto sessuali, messe sataniche e ci ghe n’à più ghe ne meta! Un esercito de gente la viaja portando al còl amuleti, convinti de èssarse cusì messi al sicuro contro tute le rogne e basta vardar la publicità televisiva, tegnendo presente che la costa da un milion a 3/4, al minuto. Mi ‘ste robe le m’à sempre incuriosì parché la sempiàgine umana ligà a la superstission, la spassia a l’infinido come i numari. Beh, la note del 2 marso, son corsa a controlar el lunario, che par caso, inveçe che nel 1993, no’ fussimo ancora a l’epoca de l’inquisission. “Indemoniade” che le descriveva el “maligno” come ‘vérghelo lì. Preti esorcisti, psicanalisti dacordo con st’altri nel crédar a ‘ste bàbole del diàolo, ansi …i diaoli, parché miga se presenta sempre quelo, come miga el se presenta ne la stessa vesta, pur avéndoghe la costante del segno “666”, marchio de la bestia, el muso, corni, sòcoli, barbeta e coa rigorosamente da beco. Lù el viaja soto diversi nomi: ‘na olta l’è Belzebù (re de le mosche) ‘n’altra òlta l’è Baffometto (che almanco l’è un nome simpatico che me fa scapar da rìdar), pò: Demonio, Farfarello, Satana, Mefistofele e principe de le tenebre… tanto che vien fato de dimandarse se inveçe del diàolo no’l sia par caso un bancarotier che à fato féte. Naturalmente, (presentandose vestì da frate o da prete) el se ocupa esclusivamente de done a le qual de spesso el ghe fa anca la “festa”; i omeni i è al sicuro par quante vacade che i fassa (unica ecession el Faust, che paraltro l’è riussì a tirarghe a la fìn un trépo, mandandolo in bianco).
A Mixer, un prete interogà in proposito, con un soriso sodisfato come uno che vardando al lùni la schedina el se inacorsa de aver centrà un 13 de quei furbi, l’à dito: “el diaolo el va da le done parché el se serve de lore par tentar l’omo! (pòro inocente) Mi no’ ò capì però che rassa de laoro da c… el fassa ‘sto sèmo de diaolo entrando ne le done, se de solito pò le “possedute” le siga come le anguane, le spua rospi, panaroti e pantegane, le gòmita verde, le spussa come tombini, le sacramenta a maneta ogni òlta che le vede un prete, ‘na cesa, ‘na croçe o se i l’e spiansa de aquasanta e le diventa brute come el pecato mortal. Insoma, no me par che ‘sti qua i sia numari boni par tentar i omeni! Dirìa se’l diàolo el le fasesse deventar tute de le Carmen Russo, de le Lory Del Santo o de le Cicioline… bah, che’l demonio el sia un fià “testa da pero” ghe n’ò vù el sospeto fin dai tempi de le rosarie! Paraltro, devo confessarve che, pur essendo pitosto sètica, quando son ‘ndà in leto ò cassà la testa soto la trapontina pronta a bàtar el record de Menea al primo rumor poco ciaro! Par fortuna el giorno dopo, a mesodì, su canàl 5 (trasmission “ore 12”) sémo passà dai diàoli ai gnomi! Gh’èra una che la giurava de avérgheli ne l’orto e la l’à descriti par fil e par segno: fisico, abitudini alimentari (i fa le tortine de crema e i ghe le fà tastar) e, manco a farlo aposta, sessuali.
A interogarla, con tuta serietà, gh’èra un presentador che’l s’avarìa meritado ‘na medaia da chilo solo par èssar riussì a no’ rodolarse sul paimento da le sganassade. Gh’è da dir che ghe l’ò anca mi n’amiga che la giura de ‘vérghe i gnometi nel campo ma la vive sola e fora de man tuto el tempo de l’ano.
Se’l discorso dei gnometi el m’à fata rìdar e riportà al tempo quando che, a 5 ani, ghe credéa anca mi, quel’altro del satanismo el m’à inveçe mandà in bestia! Va ben che ‘sti qua i è tenpi scuri ma almanco la TV nassionale la dovarìa ocuparse de robe più serie… e ghe ne sarìa tante! Me mama pò’ la sostegnéa che i angeli e i diàoli gh’i emo qua intorno; i primi i è i omeni boni, i secondi …quei cativi. In quanto a esorcismi, (un canpo andó parfìn la çesa l’è divisa) credo che i unici eficaci i sia: i carabinieri o un bon randel de drio a la porta, da sostituir prossimamente (se sèita ‘sta ànda) co’ ‘na lupara o, meio, co’ un bazùca.

Wanda Girardi Castellani