L’Angolo de la Wanda – Febbraio 2000 – “Quando el silensio el copa”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Quando el silensio el copa”

Par inpossìbile, ma se poI vìvar quasi 40 ani nel stesso posto sensa conossar nissuno! Epura, basta torse un can co’ l’impegno de portarlo a spasso almanco tre-quatro volte al giorno; eco che se taca a far amicissia con tuti quei che, come ti, za da le prime ore de la matina, col caldo e col fredo, col sol e co’ la piova o la fioca, “forsadi del guinsalio”, i va a pascolar i amissi a quatro sate. In ste ocasioni, paciolando del più e del manco, de le òlte te vegni a conossar anca drami che mai te avaressi sospetà che esistesse; drami come quel che ò contà nel 10° nùmaro de ‘Q.C.”, otobre 1990, e che ‘sto ano, l’ultima note del nostro sècolo, s’à ripetù.
Dodese ani fa, quando ò catà la me cagneta Picia, tra i altri ò conossù la Elide; ‘na dona seca come un ciodo, piena de colane, co’ la sigareta sempre in boca e, a guinsalio, un lupo piassè grando de ela. Me ricordo che’ na òlta, incrociando la me cagneta in calor, el bestion l’à galopà verso de ela tirando in tera de strapegon la parona in mèso ai sassi. El giorno dopo el poro lupo a scanso de altre rogne, portà de urgensa dal veterinario, l’à lassà su’ na tòla operatoria le so robe più pressiose.
Un par de ani dopo, morto el lupo, i fioi i g’à regalà a la mama ‘na cagneta pìcola, batesà “Frègola” e con questa la Elide l’è tornà a girar intorno a la piassa con tute le so colane e l’eterna cica in boca.
L’ùltima òlta che l’ò vista l’è ‘stà na vintina de giorni prima de la fine de l’ano, po’, tra grane, luti e dispiasseri vari, son mancà par un meseto al vecio apuntamento su le banchete de la piassa e solo al du de genar, notando che la “Frègola” e la so parona le mancava a l’apèlo, g’ò dimandà in giro cossa gh’èra sucesso, cusì ò savù ‘na trista storia. lnacorsendose che la mama, che la viveva da “single”, no’ l’èra più del tuto lustra de mente, dopo averghe tolto la cagneta che proprio lori i g’avea dà a farghe compagnìa, da qualche tenpo i fioi i usava inciavarla in casa par paura che l’ andasse ci-sà ‘ndove.
La note del 31 dicembre i altri fituài de la casa i à sentì la Elide parlar forte e sigar, ma el can-can de i fòghi e de i petardi spanpanà a çentenara par ore a darghe el viàtico a l’ano che moriva e el benvegnù al sècolo che nasseva, i avea credudo che anca ela la fusse in bona conpagnia a far festa. lnveçe, ne la tarda matina del primo de l’ano, quando i è andà a vèrsar la porta, i l’à catà morta par tera.
Nel bordel de le “coete” che, alte tra le stele, le sfrisava el cel, nel s-ciocar de i stròpoli, nel tintinar de i biceri, ne l’alegrìa de i brindisi, nissuno à capì cosa stava sucedendo. Nissuno s’à inacorto che la pòra dona, sentendose mal, la dimandava aiuto.
Massa… massa bordel intorno par poder sentir che, ancora ‘na òlta, gh’èra ci stava morendo ne la so isola de solitùdine, copà dal “silensio”.

 Wanda Girardi Castellani