L’Angolo de la Wanda – Febbraio 2004 – “DOPO SOLO 50 ANI LA TIVU L’È DRIO ANDAR DE MAL”

…a cura di Graziano M. Cobelli

gcobelli05@gmail.com

Quatro Ciàcoe: da Verona

DOPO SOLO 50 ANI LA TIVU L’È DRIO ANDAR DE MAL

La TIVU italiana, dunque, l’è nata el 3 genàr del 1954 e mi me lo ricordo ben parché el mese dopo, precisamente el 16 febràr, è nato anca me fiol Mirco.
No’ è passà pò’ tanto tenpo che me papà, firmando ‘na barca de canbiali, l’à portà a casa el primo televisór; un “Geloso”, grosso e pesante come un monumento, al punto che avemo dovù métar a sgobo me sio Gino (noto marangón de Veroneta) parché el ghe fasesse in pressia un sostegno adato. Tra questo, la decisión de ‘ndove piassarlo, el laoro de sistemàr l’antena sóra i copi (noialtri erimo in piano tera), cavi, fili, inpianto, ecc… semo andà ‘vanti ‘na setimana.
Come in borgo Venessia nel 1933 semo stà i primi a ‘vérghe la radio (‘na Kennedy con giradischi), nei camilioni de Via Santa Marta, nel 1955, semo stà i primi a ‘vérghe la TIVU’ e semo stà anca i unici, almanco par un pàr de ani. Naturalmente ai primi tenpi gh’è stà’ ‘na processión de curiosi e anca tante ciàciare e bagolessi; “Ma ‘dove ài catà i schei? Che i abia vinto al loto? Che i abia eredità?”
Ma el belo l’è stado quando che è scominçià la trasmissión de Mike Bongiorno: “Lassia o radopia”. La sera che l’andava in onda se inpeniva tuti i bar e le ostarie in possesso de ‘n aparechio Tivu e se inpeniva anca casa mia. I vegneva zó tuti, buteleti conpresi, con scragne, careghe e cussini, tirandosse drio fiaschi de vin, fogasse, frìtole e panetini. Me papà el cavava zó anca la porta del tinèl par consentirghe al publico ‘na visuale piassè granda e me mama la metéa sula stua, a turno, tute tre le “napoletane” de casa e… cafè par tuti!
E ci se li pol desmentegàr?: Luigi Marianini, Paola Bolognani, la tabacara Garoppo (che, parvia de quel “pontesèl” che ‘avarìa podù sostègnar almanco du-tri vasi de gerani, l’è entrà de prepotensa nei sogni de bona parte dei omeni italiani) la Lòngari (ah, siora, la m’è cascà su …) la catastrofe nassionàl del “controfagoto” e tute le memorabili vacade che diséa el presentadór.
Ma che bei personagi che gh’èra: Padre Mariano, l’olandese Peter Van Vood, Angelo Lombardi; l’amigo dei animali, col so Andalù e la simpatica Bianca Maria Piccinino. E i comici? i era ùn meio de l’altro: Carlo Campanini e ‘l nostro Walter Chiari col só celebre “Sarchiapone”. La copia Tognazzi e Vianello che i consumava un “troncio” par far un stussicadenti. L’inimitabile Gino Bramieri e Mario Riva che purtropo ‘l g’à lassà le pene a Verona, in ‘Réna, durante ‘na trasmissión del “Musichiere”, concorso vinto dal presidente del Sil, dr. Andrea Cason, con la cansoneta “Un paradiso da vendere” cantà da Wilma De Angelis.
E le gemele Kessler? e Don Lurio? Rascel, Totò, Franca Valeri, l’imitadór Alighiero Noschese e tanti altri che n’è restà ne la mente ma anca nel cor!
A quei tempi e fin ai ani setanta avemo podù gòdarse comedie, opere e operete, cantanti del càlibro de Claudio Villa e Luciano Taioli, cantautori come De Andrè, Tenco, Battisti e atori come Giorgio Albertazzi, Massimo Girotti, Paolo Panelli, Vittorio Gassman, Paolo Stoppa, Rina Morelli, Nino Manfredi, Gian Maria Volontè, Nando Gazzolo, Ugo Pagliai, Lea Massari, Giancarlo Giannini, Alberto Sordi, Alberto Lupo, Raffaella Carrà, (giovane atrice in “Tutto per bene” del me adorado Pirandello), inteligenti presentadori come Enzo Tortora e Corrado e bele, brave e “naturali” Signorine buonasera come Nicoletta Orsomando e Aba Cercato.
Le previsioni del tenpo ne le dava el colonèl Bernacca e noiatri el ripagavimo infilandolo nele barselete!
Parfin la publicità l’èra godibile; “carosello”, la gioia dei butini, tanto che se ghe la parmeteva come premio e prima de métarli in nana.
È passà çinquant’ani. Se usa dir che “tenpo e paia maùra le nèspole” ma nel caso de la TIVU no me par che ‘sto proverbio el ghe calsa massa! Co’ la scusa de “l’audience” i ne rifila programi pitosto scarsòti e spesso decisamente lòfi. Inbotidi de miliardari spot, spesso volgari, semi, insulsi cresse la fila dei quiz con vincite che corisponde a 20 ani de stipendio de’n operaio, el più de le òlte otegnù con risposte a dimande da scole elementari o inbrocade a caso! La lege 103-1975 la dise che la RAI la g’à da concórar al svilupo sociale e culturale del paese ma inveçe coi so programi salvo eccessioni la tradisse ‘sto scopo e soratuto quei pòri Cristi che ghe paga el cànone.
Par el resto, i ne sforna roba da “parochieta” fodrà de spirito de patate, tanto che par rìdar el più de le òlte se g’à da farse le gatarissole soto a le lesène. E lassemo star çerti programi che oltre a èssar amorali i è anca assurdi (e costosi). ‘Na copia de me conossensa par métar in piassa tute le magagne de faméia in un programa su RAI 1, i à viajà in prima, in aereo, i è stà ospità in ‘na suite de ‘n albergo de lusso con tanto de machina e autista personale ecc…; tuti schei che vièn fóra dale scarsele nostre!
Unico ragio de sol; i programi de Piero Angela, de Licia Colò e simili. Ma tornando a la publicità, spesso anca sporcaciona, no’ se pol più gnanca pararli in leto prima, i buteleti, parché i spot specie quei ludri, senpre inevitabilmente alusivi sul sesso, con ciape, tete e bronbrìgoli al vento (come quei, in genere, che publicisa i profumi) i salta fora a tuti i momenti.

Ah… che nostalgia de Topo Gigio!

Wanda Girardi Castellani