L’Angolo de la Wanda – Febbraio 2009 – “RICORDANDO GIUSEPPE FACCINCANI (8-2-1923 – 29-8-1997)”

…a cura di Graziano M. Cobelli

gcobelli05@gmail.com

Quatro Ciàcoe: da Verona

RICORDANDO GIUSEPPE FACCINCANI (8-2-1923 – 29-8-1997)

Par quel profondo rispeto che’l me ispirava, no’ son mai stada bona de darghe del “ti” come che faseva tuti i altri, epura lo conossevo da sempre. Só papà l’èra colega de laoro del mio a la centrale elettrica de viale Piave e quando nel magio del 1949 i operai adeti a la pulissia de le grilie i à scominçià a “pescar” dal canàl Camuzzoni i tochi de ‘na dona, subito me pàre l’à avisà el “fiol del só amigo Faccincani”; Bepi, giovane giornalista del giornàl “l’Arena”.
‘Sto delito a l’epoca l’à fato un gran can-can e l’è stado propio el prof. Faccincani, novèl Sherlock Holmes a risòlvar el caso individuando oltre che la vitima, Guglielmina Strapparava, 52 ani, fitacamare in via Valverde, anca l’autór del bestiàl assassinio, scadenà da la gelosia; Alessandro Marchese convivente de la morta.
La solussión del “gialo” de la dona fata a spessatin, la g’à guadagnà al nostro cronista-investigadór el plauso de la redassión del giornàl e la giusta, meritada notorietà tra i veronesi.
De la pòra Strapparava però no’ è mai saltà fora la testa, cusì quando se se cata in un logo inbugà de ratare ancora ‘desso se usa dir: ”gh’è de tuto, forsi anca la testa de la Strapparava”!
Del prof. Faccincani me ricordo l’impegno par far incementàr ‘na targa su la casa ‘ndove è nato el nostro grande Emilio Salgari, in via porta Borsari, e me ricordo pure la só “crociata” a favór del nostro mai desmentegà buratinàr Nino Pozzo.
Prima de la guera el dopolavoro de l’Azienda Eletrica ogni tanto el ghe ofriva ai fioi dei dipendenti un spettacolo de buratini… A Santa Lussia oltre al paco de zugatoli e de dolçi gh’èra sempre par noialtri buteleti ‘na rosaria rapresentà dal “Mondo Piccino” con Fasolin, Rosaura, Sandròn e tanti altri personagi elegantemente vestidi da la mama del Nino.
Tornà la pace, forsi parché durante el “ventennio” quando scadéa de laoràr de sabato anca el nostro buratinàr l’usava presentarse in orbace, acusà d’èssar stà fassista i l’à messo al bando, costretto, par no’ morìr de fame, a esibirse in strada e nele corti passando po’ col piatìn. Quando che l’ò visto cusì andar par carità, me s’à strucado el cor e subito g’ò scrito a Bepi Faccincani domandandoghe aiuto.

Memorabile l’articolo che subito el “nostro” l’à stampà su l’Arena soto el titolo: “el Noschese dei buratinai” (Nino el podea, come Alighiero Noschese, cambiàr la voce a só piasér). Grassie al “sveiarìn” de Bepi… el Comune finalmente el s’à deciso a far qualcosa e l’à impegnà Nino Pozzo a portàr el só teatrin nei nassenti campi zugo dandoghe la possibilità de poder vìvar, finalmente ‘na vita manco grama.
Bepi Faccincani oltre che un bravo giornalista l’èra un valido poeta come se pol constatar dal só libro postumo “Poesie” (editoriale della Scala). Ma se dovessi métar in fila e in ordine de valor i só meriti scominçiaria col dir che l’èra un bon omo dal cor grando, un “signore”, un galantomo.
Par trent’ani l’à coordinà la redassión de la cronaca e l’è stà el capocronista de giornalisti che i sarìa deventà importanti come, par esempio, Giulio Nascimbeni. Formidabile organisadór del lavoro giornalistico l’à curà ne l‘Arena importanti inissiative, come: el Fondo de Solidarietà, el Premio dela Bontà e la Banca del Zugatolo. Par ani l’è stà inoltre Presidente de l’Associassión stampa e infine de L’unione giornalisti cattolici.
A ciapàr in man le redini del Cenacolo de poesia dialetàl “Berto Barbarani, grassie a un plebissito de voti, el g’hè vegnudo nei ani otanta.
Dopo ‘na vita siora de sodisfassioni ma anca costelà de dispiaceri, un destìn maligno l’à vossù portarnelo via nel mentre che’l tornava a casa co’ la so Ivana da un pelegrinagio a la tomba de padre Pio a san Giovanni Rotondo.
Grande l’è stà el dispiasér, specialmente par noialtri veronesi, ma ne resta e ne restarà sempre la consolassión de averghe ‘vù la fortuna de conóssarlo.

***

di G. Faccincani

SERA

Nella piazza dei tigli
lenta si spegne la sera.
Due cuori amanti indugiano
nella penombra lieve
dei giardini.
Gli occhi socchiusi
cercano sogni.
Settembre è qui, sorride
ed è grazia di acque dolci
che aspettano la mia bocca
e le mie voglie,
accese come luci
a una a una alle finestre.

***

MERIGGIO

In un pomeriggio
di affettuoso sole
mi sorprese incantevole l’oblio
di magica festa
ma il pianto di un bimbo
solo nel grande cortile
imbrattò di tristezza
ogni cosa
e son tornato ad essere vile.

***

Wanda Girardi Castellani

***

Foto da Google

***